Yo Roll：席「卷」全城

近呢大半年，成日聽到呢一句：「睇咗當去咗」，或者喺「食咗當去咗」。由於疫情持續，又反反覆覆，各位都收緊入境防疫措施，就算好似依家有啲國家全開放，但返番香港都要隔離，出門旅行都似乎遙遙無期。小弟去過關西、九洲、北海道，但就未去過東京，今晚嚟「Yo Roll」就當去咗新宿嘅歌舞妓町，哈哈！

「Yo Roll」個門面好搶眼，因為仿照歌舞妓町嘅牌坊嚟做，紅色招牌喺咁閃，遠遠都見到。企晌門口打打卡，應該可以呃到吓人，以為晌新宿啲壽司外賣店。睇到側旁掛住個牌「德島縣產米使用」，自然對出品更有期望。

雖然喺外賣店咋，但食物款式非常之多，鋪面上嘅電視屏幕就顯示出各款產品，有相片作參考，唔介意企定定慢慢睇。食物大類分為刺身、手卷、丼定食及卷物，有平有貴，豐儉由人。

嘢食食過先知得唔得，但包裝盒就睇得出唔喺啲平價軟膠貨色，摸上手比較硬淨，所以，啲壽司卷拎到返屋企都仲好穩陣，唔會走晒位。啲米除咗用德島產之外，仲早已加入赤醋做調味，更好食之餘，色澤帶啡，外觀卻好光亮。

櫻花卷 $48

呢個卷物喺全素，最啱我老婆，裡面有薑片、白蘿蔔、紅蘿蔔、沙律菜、紫蘇葉，所以，食起嚟有微微辣勁，而紫蘇嘅味好突出，喜歡嘅人就會覺得好幽香，否則，就會覺得太濃、太霸道。而飯粒捲得實淨，但唔會好死實，一口一件就啱啱好。

武士卷 $68
佢哋嘅卷物每份都喺8件，仲擺得斜斜哋，好靚仔，而呢款口味就夾有蔥拖羅、紫蘇葉、黃蘿蔔、芝麻。俾到拖羅級數，自然睇高一線，入口有點魚油香，好綿滑，雖然有加紫蘇葉，但就唔會好搶，加咗嘅黃蘿蔔，增加咗份爽脆口感，所以，整體而言，口感幾有層次。

忍者卷 $78

3款卷物中，呢個「忍者」就最吸精，因為表面唧咗大量黑松露蛋黃醬，仲加埋啲黑魚籽做裝飾，賣相分搶到盡，而裡面主要喺有牛油果同軟殼蟹卷，又喺兩款老婆嘅水食材。單睇整個組合，已經無得輸，入口有脆脆哋嘅軟殼蟹卷，加上腍滑嘅牛油果，口感相當有層次，配合埋個醬，味道非常豐富。題外話，武士卷嘅英譯，店家用「Samurai Roll」，但忍者卷又一樣用「Samurai Roll」，其實喺咪用「Ninja Roll」啱啲呢？

今晚所試嘅3款卷物都各有特色，如果，卷物癮起，不妨簡單嘅買盒返屋企細味。其實，都唔喺第一次幫襯呢種外賣店，從飲食雜誌都見都有不少呢類主打卷物嘅小店，只要食物做得好，一樣有發圍嘅機會，做到席捲全城。

個人評分
味道：8/10
環境：7/10
服務：8/10
抵食：8/10
平均每人消費：HK$97

餐廳資料：
Yo Roll
尖沙咀東部科學館道14號新文華中心地下62號舖
9327 6462