點一龍 Dim Sum Bar：「龍」重登場

攞到消費券，我哋兩公婆未急住用，不過，心裡都有啲物品想買。此外，有啲家品、家電都打算到期更換，所以，出咗嚟荃灣走一轉。除咗過嚟荃灣方便之外（我哋搭屯馬線一個站就到），依家晌荃灣西站連住幾個大型商場，一次過可以行晒，睇吓有咩合適商品，又格吓價。老婆話之前幾次出街食飯都食西式，今晚想食啲中菜，網上搜尋吓，晌如心廣場一期嘅「點一龍」就最好不過，一來喺中菜，二來又有點心供應，啱晒佢。

外面突然落大雨，落到澎澎聲，但無有怕，呢幾個商場天橋駁天橋，唔使擔心滴濕身，而「點一龍」就晌商場內。踏入餐廳，裝修摩登得嚟，帶有中國風，如以紅色為主調、卡位上嘅通花屏風、如燈籠般嘅天花吊燈，當然，最搶眼莫過於入門口位嘅艷紅色「大燈籠」。

轉入去，裡面仲有好大地方，我哋被安排坐晌卡位，卡位非常闊落，而其他散位，櫈都喺用上有扶手位嘅皮椅，相信都舒服好坐。最欣賞餐廳嘅防疫，除咗明顯無用盡每吋地方，枱與枱之間擺位顯得格外開之外，更加置唔少易拉架嘅膠膜，卡位嘅屏風同樣貼上膠膜，增加防疫功效。

枱上已擺放好餐具，餐具外觀都幾別緻，外形典雅。茗茶每位收$12，如享用菊花或菊普，就會收貴多少少，另收加一服務費。

餐牌就喺枱旁嘅點菜紙，一路睇，順便一路剔。數一數，點心有成30多款，此外，仲有蒸飯、湯麵、粥品、甜點……等等。

另一面就喺一啲特色風味小菜、健康有營菜式，以及大碟頭啲嘅炒粉飯麵，定價跟一般嘅中菜館差唔多，但菜式嘅配搭就幾有心思。

晶瑩海蝦餃 $39

單喺睇到蝦餃嘅外型、摺紋，已知道師傅嘅手工好紮實，外皮薄透晶瑩，微微透出蝦肉色，咬一小口，餃皮果然做得煙韌而不黏牙，而裡面填滿新鮮海蝦，蝦味濃，口感爽彈，絕對喺用料不賴，食出質素。

洛神仙子素肉餃 $39

另一款素肉餃色澤艷麗如仙子，如蝦餃般同樣咁晶瑩，淡淡嘅粉紅色外皮應該喺加入咗洛神花茶嚟做，不過，就唔覺有洛神花嗰種酸味，而裡面有素肉、粟米粒、木耳……等等，口感豐富，食味清雅。

金橘蒸南瓜排骨 $88

小菜方面，我哋見到呢一款蒸排骨用上金橘醬，感覺幾特別。賣相比較平實，但入口真喺有料到，排骨面面就喺自家調成嘅金橘醬，嗰份金橘香味好突出，又好清爽，配以排骨，令本身肉質好腍滑嘅排骨入口更香；此外，南瓜亦蒸得剛好，粉甜軟熟，唔會過腍，仍帶有少少爽口感。

金不換海鮮炒河 $98

乾牛河相信大定食唔少，而呢一道海鮮炒河，加入金不換去炒，真喺別具風格。炒河本身炒得甘香，粉條分明，無話黏埋一炷，亦唔算好油，至少唔會食到尾一碟底都喺油；而且，河粉滲出陣陣金不換嘅香氣，味道更惹味，更具層次感，鮮蝦及魷魚亦好新鮮，整體真喺唔錯。

原汁原味西瓜糕 $44
晌多款甜點中，就以呢一款西瓜糕最想一試，其實，點菜紙都有佢張相作參照。實物嚟到，又真喺堅似件西瓜咁，而綠色嘅底皮原來真喺西瓜皮嚟，紅色部份嘅西瓜糕入口西瓜味勁突出，口感喺有啲似大菜糕咁，但卻有少少沙沙嘅感覺。此外，店家仲提供梅粉，試完一小口原味，再灑少少梅粉，微微嘅酸香更吊出西瓜糕嘅清甜味。

小弟都喺第一次到訪「點一龍」，有啲點止點心咁簡單嘅感覺，加上環境寬敞，招呼都好到位，侍應望落似好年輕，但都幾有禮。而最緊要喺啲食物稱心，既有特色，又有水準！

個人評分
味道：9/10
環境：8/10
服務：8/10
抵食：8/10
平均每人消費：HK$180

餐廳資料：
點一龍 Dim Sum Bar
荃灣楊屋道8號如心廣場一期地下G01A號舖
2633 5099