不籽是咖啡 Not Just Coffee：「籽」日可待

呢一間「小巷」咖啡店一直有打算嚟試吓，因為，晌網上見到環境好，菜式有啲亮點，而咖啡更喺目標物，不過，油麻地區唔太喺小弟搵食嘅熱點，通常都喺有事過開呢頭，就順便搵搵食。呢日卒之出開嚟，有個波友又話出旺角買波鞋，所以，索性約埋食返餐，等小弟有個伴。

餐廳果然夠人氣，只喺平日啫，都未夠7:00pm晌門口已排滿人。由於餐廳位處小巷內，有種自成一角嘅寧靜應感，由門面，到室內，都裝修得一派文清風，加上樓底特高，簡約舒服。

餐廳採用櫃面落單，再由店員將食物送上，而餐具、清水就自助形式。

食物方面，明顯喺貴精不貴多，但都算一應俱全，有沙律、小食、主菜、漢堡、全日早餐、甜品……等等，而飲品則有花茶、咖啡、梳打……等等。

海鹽焦糖雞翼 $68

呢個屬餐廳嘅人氣小食，目測所見，超過一半人都有點，除咗口感較為特別之外，更做成單骨，較原隻方便食。雞翼本身炸得香口，卻唔油膩，表層有薄薄一層嘅焦糖，灑咗啲海鹽，所以，味道蜜香中滲點鹽味，幾得意。

龍蝦湯配牛油果大蝦稻庭烏冬 $128

呢個烏冬喺餐廳一熱賣菜式，因為又喺見到好多枱都有嗌呢一款菜式，事實上，又真喺幾有賣點，龍蝦湯以小銅壺登場，晌整體賣相上確喺加唔少分；而牛油果、大蝦都亳無手緊，落嘅份量都幾多，咁就已經加咗唔少印象分。個湯倒入碗內，已經聞到陣陣龍蝦味，老友小試一口，話確喺有料到，夠晒濃郁，而大蝦亦非常爽彈，牛油果熟透晒，腍得嚟好綿滑，稻庭烏冬唔喺浪得虛名，質感十分滑溜，整體而言，喺一道高水準嘅菜式，唯一挑剔，喺覺得「熱食」牛油果有啲唔夾。

味增蟹醬蟹籽蟹肉扁意粉 $128

喺餐牌中嘅推介菜式，亦喺小弟嘅目標菜式，因為本身都鍾意食蟹，但就甚唔鍾意拆蟹，麻煩嘛，所以，呢道菜就滿足到我嘅要求。仲有就喺加埋蟹膏、蟹籽，真喺點可以錯過，成品送到，真喺無欺場，意粉麵放有好多蟹肉、蟹籽，前者好鮮甜，後者卜卜脆，蟹膏以味噌處理過，個汁底又好掛汁，撈勻啲扁意粉一齊食，味道一流，最緊要啲扁意粉又煮得啱啱好，有咬口感。反而，我覺得木魚碎同紫菜絲唔加都仲好啲。

海鹽忌廉朱古力鮮奶 $48

老友揀咗款期間限定朱古力鮮奶，加咗一大抹忌廉，淋上少少朱古力漿，立體咗好多。入口朱古力味比預期濃，將啲忌廉攬勻，口感又幾滑，嗒落又真喺甜中帶鹹，多咗啲層次感，感覺都幾特別。

鮮奶咖啡 $38

嚟到咖啡店，飲品首選都喺咖啡，而跟食物一樣，都喺貴精不貴多。鮮奶咖啡喺小弟至愛，既欣賞咖啡師嘅拉花手藝，又細味佢哋沖泡出嚟嘅咖啡夠唔夠口感均勻。呢一杯鮮奶咖啡嘅拉花幾靚仔，線條幼細又對稱，入口好醇厚，滲出好香嘅咖啡香氣，仲帶點點果仁香味，口感又夠均勻順滑。

小弟做人好簡單，努力打工都喺想賺多個錢，賺到錢就只喺想食餐好，當然有餘有剩就再可以做多啲其他嘢。今日晌「不籽是咖啡」，無論食物，抑或飲品，老友同我都好滿意，只喺飲品方面漏咗單，等耐咗。

個人評分
味道：8/10
環境：7/10
服務：7/10
抵食：8/10
平均每人消費：HK$205

餐廳資料：
不籽是咖啡 Not Just Coffee
油麻地彌敦道450號文豪閣地下D號舖
2322 2849