La Casa Burger & Pasta：「堡」持水準

位處上環嘅「La Casa」多年前造訪過一次，當時定位為喺「Bistro」，食友知我返中環工，最近就推介一間晌上環主打漢堡及意大利麵嘅小店俾小弟，原來就喺「La Casa」，原來轉型為「Burger & Pasta」。趁收工，過嚟試一試佢哋嘅出品。

時隔多年再訪，對照番以前嘅食評，環境唔算有好大改變，始終小店格局，變化有限，都喺保持簡潔，木系枱櫈配襯白磚牆，兩邊牆上嘅玻璃鏡增強空間感，唯一較明顯唔同就喺所有枱櫈都換成高腳枱櫈。又以霓虹燈勾畫出一啲圖案，增加活潑感，用餐氣氛輕鬆。

散點餐牌上，主要就喺漢堡同意大利麵，前者有7款選擇（$68-$155），不同包款配不同芝士，芝士嘅口味亦好特別，而後者亦有4款（$78-$95），並標明喺手工意粉。此外，仲有啲小食供應。飲品方面，有汽水、熱啡、熱茶，特別少少嘅，就有手工啤同奶昔。

另外，仲有一張套餐餐牌，分為2人、4人、10人，所包嘅食物好多，10人餐適合搞派對用。

而惠顧漢堡或意大利麵，可以加$30成為套餐，多了一份小食（雞翼、海凱沙律、薯角或薯條）及一客基本飲品，額外再加錢，將基本飲品再升級到奶昔或手工啤。呢類高檔漢堡包店，除用靚料之外，賣點就喺即叫即做，所以，就算唔多客，都要等上10min左右。

杜洛克黑毛豬腩片漢堡 $90

碌吓手機時間都好快過，漢堡包、薯角、可樂轉頭送到，呢一款包用上西班牙杜洛克黑毛豬，名氣自然響少少。打開包裝盒，真喺唔講得少，啲豬腩片埋到爆晒餡，師傅一啲都無手緊，所以，拎上手，個包非常之墜手。豬腩片切成薄片，煎到好香口，裡面仲加埋蘋果醬、蜜糖芥末醬、細嫩嘅菠菜葉，以及一大片甚少食嘅芳天娜芝士，所以，大口一咬整體口感豐富，香味紛陳，更喺油香豐盈，再者，芳天娜芝士軟綿香濃，包身又烘得極之軟熟，絕對喺邪惡之物，又要行多兩轉山抵銷番啲卡路里。

烤大啡菇漢堡 $78

老婆一向偏素，所以，漢堡就一定喺揀烤大啡菇漢堡，大啡菇烤得有少少焦香，內裡仲夾有合核碎、菠菜葉、蕃茄，配以較濃味嘅菲達芝士，味道同樣都喺咁豐富，而啡菇烤得既香口，又多汁，唔會「乾噌噌」，加咗少少合核碎，就有啲堅果嘅香味，整個配搭都好唔錯。

薯角、可樂 +$30

相信大多數嘅人都會轉為套餐，而小食我就揀薯角，因為食落特別有口感。除提供茄醬外，更可免費附送車打或藍芝士醬，小弟選後者。因為薯角同樣喺新鮮炸，所以，甘香鬆脆就不用置疑，再點上藍芝士醬，嗰份芝士味嘅濃郁感真喺妙不可言，正呀喂！

雖然店鋪細細，但用餐期間眼見有唔少人嚟買外賣，近百蚊一個漢堡仍然大有市場，皆因多咗識食之士，或者，多咗好多人想試試高質素嘅漢堡喺點！雖然，「La Casa」轉型主打漢堡及意大利麵，但食物嘅質素依然保持高水準！

個人評分
味道：9/10
環境：7/10
服務：8/10
抵食：8/10
平均每人消費：HK$120

餐廳資料：
La Casa Burger & Pasta
上環文咸東街2號地舖
2505 0555