阿四車仔麵 A4 Noodle：「麵」面俱圓

小弟嘅職銜叫主管，實際工作範圍喺阿四，即喺乜都做，乜都話關你事，其實，呢個都喺好多香港打工仔嘅寫照。今日出到旺角睇睇波難，格吓價，見到呢間「阿四車仔麵」特別有感，幫襯吓，支持吓，反正都好似好耐無食過車仔麵。

依家啲車仔麵店已經唔哋以前嗰啲地方淺窄，坐得唔舒服嘅鋪頭仔，其實，晌門面都睇得出「阿四」都花咗啲心思晌裝修上，入到去，環境比預期大，一室暗灰，水泥牆，少少粗獷，又有啲格調。

不過，由於近門一邊都哋落地大玻璃窗，採光十足，所以，唔會幽幽暗暗。而最緊要，都喺夠乾淨企理啫！

入得嚟，都喺食車仔麵架啦，不過，原來，點菜紙顯示仲有特色小食、大大大碗飯、特餐……等等，飲品就有跟餐優惠。剔好點菜紙，交俾店員就可以喇。

枱上放有自家製菜脯同美極，喜歡嘅就加番啲，不過，麵餐已跟一款自選醬汁，夠晒味。

河粉、咖喱汁、雞腎、芝士腸、溏心蛋 $42

友人嘅口味都算傳統，佢就話對食要求唔大，最緊要飽肚，咁個河粉底佢實滿意啦，望落去啲河粉多到呢，而且，佢話幾滑溜；雞腎幾入味，帶點爽口感，芝士腸就都喺咁上下啦，溏心蛋亦唔錯，蛋黃真喺做到有點流心嘅質感，當然，香濃嘅咖喱汁亦記一功。

紅豆冰 +$16

大大杯嘅紅豆冰中，紅豆嘅份量算唔少，而佢話最正喺啲紅豆夠綿，又清甜，配以椰奶，冰冰涼涼嘅口感，是夏天的「涼心」之選。

油麵、沙嗲醬、炸豆腐、豬大豬、滷水腩肉 $43

油麵喺小弟嘅首選，的確，店家嘅麵底真喺特別多，一家食的飽，配沙嗲醬，香得嚟夠風味，其實，唔溝埋啲沙嗲醬，佢哋嘅湯底本身都唔失禮，一樣幾清香。

炸豆腐

今日無同老婆一齊，揀餸料就絕對喺放肆，三樣都高脂、邪惡，先喺件炸豆腐，入口一啲都唔油，幾香口，又頗有豆香。

豬大豬

嚟張大特寫，就知有幾肥，不過，入口又唔覺得話好肥膩，軟腍好食，而且，亮點喺洗得夠乾淨，無一陣陣燥羶味，兼滷得入味。

滷水腩肉

啲腩肉滷到入晒色，肥瘦雙間清晰可見，但做得有水準，肥膏部份咬落完全唔會一口油，而瘦肉部份肉質極之鬆化，堅好食。

凍咖啡 +$12

本想揀特飲，但諗諗吓都哋飲番凍啡，凍啡以外帶膠杯盛載，比茶記、咖啡店嚟得大杯，飲落啲咖啡又幾香，幾醇和。

炸墨魚卷 $22

食到中途，友人想追加多一客小食共享，揀咗炸墨魚卷，因為覺得幾特別。一客有4件，炸得金黃，不過，個人覺得油咗少少，但又真喺幾好食喎，裡面都填滿墨魚膠，彈牙而富墨魚味，如果有啲泰式甜酸醬襯吓就一流喇。

呢個「阿四」又真喺幾有質素喎，至少我哋兩碗粉麵嘅餸料做得好食，環境又企理，地方又唔算逼，晌旺角區嚟講，性價比都算高，期望「阿四」繼續努力，有朝一日變成「四哥」！

個人評分
味道：8/10
環境：7/10
服務：7/10
抵食：9/10
平均每人消費：HK$68

餐廳資料：
阿四車仔麵 A4 Noodle
旺角豉油街108號地下
6995 1171