Momoz：「餃」嘢創作

晌同區工作嘅舊同學，話有無興趣試吓尼泊爾餃子，我話好冷門喎，佢就話都唔喺架，香港有唔少尼泊爾餐廳，大多數都有賣餃子，專登上網查一查，又真喺原來香港有唔少尼泊爾餐廳。今次一齊去試嘅喺晌蘭桂芳嘅「Momoz」，新開無耐，網上嘅食評都唔多。

餐廳唔喺好大，左邊幾個吧位，右邊兩張小枱，裝修簡約，一室黃加白，非常醒目，加上地方整潔企理。作為小店，一睇就知喺主攻午市嘅外賣，而嚟幫襯嘅人亦似乎以外藉嘅居多。

因為店鋪細細，遇正人多而想堂食，就要等一等位，反正舊同學未到。門口嘅電子屏幕，除咗一幅又一幅嘅美食照之外，仲有好多唔同媒體、唔同語言嘅介紹。原來喺兩位尼泊爾兄弟檔搞起，將家鄉菜再注入創意。

其實，尼泊爾菜對小弟嚟講，喺一個非常陌生嘅菜系，基本上可以講喺完全唔認識。睇睇菜單，主打喺一啲稱為「momos」嘅東西，我見求先睇過嘅媒體介紹稱之為尼泊爾餃子，此外，仲有啲類似墨西哥卷嘅食物，唔知可唔可以叫尼泊爾卷呢？其次，就有唔同嘅樽裝飲品、特飲、啤酒……等等。

午市時段，更推出午市套餐，賣$78，包括4粒是日尼泊爾餃子、一件是日餡卷及指定特飲或汽水。而是日指定款式嘅餃子及餡卷晌門口嘅電子屏幕已有顯示，今日嘅款式喺Kimchi Momo及Lemongrass Prawn Roll。黠睇都喺午市套餐最划算，店員話食物都喺新鮮製，所以，都要等上10min左右。

Orange Blossom、House Lemonade

識揀一定喺揀自家製無酒精特飲啦，因為標價散點都要$42呀！小弟揀咗Orange Blossom，舊同學就要House Lemonade，最有型喺做成「罐裝」，唔好以為喺預製，晌旺角見過一家茶飲店都喺咁做法，有機器「啤」個蓋落去，而啲特飲都喺叫到先做。

我嘅Orange Blossom一身橙紅，入口好冰涼，味道似喺橙汁再溝咗啲西柚汁，酸香清爽，唔會好甜，外邊熱辣辣就啱晒啦；而舊同學嘅House Lemonade主要喺梳打水加入檸檬汁、薄荷葉，所以，佢話口感好清新，有種跳咗落大泳池嘅感覺，配一陣間嘅韓式泡菜餃子就最好不過。

Kimchi Momo

其實睇番啲圖，尼泊爾餃子跟我哋平常食開嘅餃子外貌差唔多，而呢一款指定嘅餃子就似小籠包多啲，店員話佢哋啲餃皮五顏六色，都喺用天然食材做，非色素，如紅菜頭汁、菠菜汁。睇睇摺紋，手功唔失禮，仲加咗啲食用花做點綴，咬開就睇見皮薄，有韌勁，裡面有韓國泡菜、韓國粉絲、哈羅米芝士等做餡，微微辣，不過，就唔會好覺有咩芝士味，事後查番，隻哈羅米芝士本身味淡，似牛奶味多啲。伴有一青、一橙嘅醬汁佐食，前者有啲帶薄荷味嘅乳酪醬，後者就帶辣勁嘅蕃茄味辣醬，小弟就喜歡前者多啲。

Lemongrass Prawn Roll

散點嘅餡卷賣到一百蚊一客，所以，我估散點嘅應大隻好多，不過，4隻餃子加埋呢一件餡卷都已好夠一餐午餐份量。而呢一款「香茅鮮蝦」口味晌餐牌喺搵唔到，只有叫今日嘅午餐先遇到佢。餡卷皮入口煙煙韌韌，裡面塞滿唔少鮮蝦同洋蔥，蝦肉既大隻，又爽彈，帶有香茅及微微香料味嘅醬汁稀杰度啱啱好，太稀會瀉晒出嚟，食到一手都喺，太杰就好餬而變得無咁好食。

尼泊爾餃子初體驗，感覺唔錯，個餡卷都好好食，店員嘅態度幾親和，午餐嘅價錢晌中環區而言都幾OK，不過，散點嘅價位有少少高，未知晚市會唔會有套餐呢？

個人評分
味道：8/10
環境：7/10
服務：8/10
抵食：8/10
平均每人消費：HK$78

餐廳資料：
Momoz
中環蘭桂坊6號地舖
2898 3129