McCafe：我的星期六美孚早餐 ~ 又有新「素」求

近排無乜心水話周六朝早想去邊度食早餐，嚟嚟去去都喺食番嗰幾間，所以，「我的星期六美孚早餐」系列都好耐無乜功課交。最近，又落MaCafe食早餐，見有款「新餐肉芝味捲」，老婆食嘢偏素，自然幾想試，就寫一寫，當個記錄。

餐廳環境唔多講喇，因為呢間店都寫過好幾次，總之周六朝都有幾多人幫襯。

今次嘅新品，晌凍櫃內擺晒樣品出嚟，睇落喺幾吸引，當然，成品出嚟個樣會差少少啦。散點個芝味捲要$30.5，而連飲品嘅套餐賣$35，真喺無乜理由唔叫套餐。

新餐肉芝味捲 + 鮮奶咖啡 $35

鮮奶咖啡就唔講，因為以前都講過，其實，佢哋啲咖啡都嚟差嘅，加上連鎖店，水準保持到。至於個捲，喺厚身嘅簿餅摺成，口感都軟熟，最緊要夠熱烘烘，而裡面夾有好多新餐肉粒，煎得甘香，又混了好多芝士，廣告牌喺話加倍，一口咬落去真喺爆晒餡，味道確喺唔錯，邪惡感十足。有食過植物肉都知，其實啲植物肉都幾貴吓，隨時比真肉還貴，仲加埋杯鮮奶咖啡，賣$35真喺好抵吓。如果去啲咖啡店，咖啡幾十，鬆餅、三文治要又廿幾、三十。

以上可以講喺代老婆寫嘅食評，而小弟呢次都喺食McCafe嘢，平平哋揀咗磨菇粟米芝味多士套餐，唔特別就唔多寫，總之，輕輕鬆鬆又一餐咁啦，食完又行上馬騮山走轉短嘅。

個人評分
味道：9/10
環境：7/10
服務：7/10
抵食：9/10
平均每人消費：HK$35

餐廳資料：
McCafe
美孚美孚新邨第七期萬事達廣場地下N60A號舖
2786 2178