柏景餅店 Park Deli：「榴」．有一手

上個月初到訪「柏景餐廳 」食自助餐，時值做緊主題「泰•尋味之旅」，多款泰菜菜式固然有特色，去到甜點環節，當中有一款迷你榴槤撻，小巧的骰，真喺做得唔錯，老婆都好欣賞。路過佢哋嘅「柏景餅店」，與此同時見到推出咗一款「3D榴槤飄香蛋糕」，賣相好「榴槤」，都幾吸引，加上試咗佢哋嘅榴槤甜點，有信心會做得唔錯，所以，一於試試堅定「榴」。

我見官網介紹喺一磅裝，但拎上手好似幾重吓。而蛋糕只喺以基本包裝盒袋住，初頭都好擔心，會唔會「飄香」而惹嚟厭惡目光呢？出奇地無乜味喎！

打開包裝盒，個「榴槤」又真喺幾像真喎，由榴槤釘、果椗，到色澤，都做到似模似樣，一絲不苟。淨喺睇啲榴槤釘，就知幾花心機，真喺逐釘逐釘咁唧出嚟，釘釘皆辛苦。

就算打開個盒，都未有強烈嘅氣味，但一切開，唔喺講笑，啲榴槤味一湧而出，真喺飄香四溢。外層綠色嘅忌廉就好似保護罩罩實個蛋糕，所以，未切開就真喺無乜點聞到啲味。不過話喺忌廉，但感覺黏性較重，有少少似麻糬嘅質感，味道似喺斑蘭味。

睇到個橫切面，就見到蛋糕一層又一層，海綿蛋糕之間喺榴槤吉士及榴槤果肉，而且，果肉都幾多，故此，榴槤味勁突出；海綿蛋糕非常鬆軟，吉士打得柔滑細緻，啲果肉熟到啱啱好，口感軟滑香甜，雖然無標明用邊款榴槤，但都食得出喺靚貨，鍾意食榴槤嘅人應該絕對收貨。

咁有個性、咁足料嘅榴槤蛋糕，加上都幾多功夫，真喺做得有一手。正價標$328，當然上官網訂啦，因為有8折嘛，折後為$262，真喺食得過。

個人評分
味道：9/10
環境：7/10
服務：8/10
抵食：8/10
平均每人消費：HK$35

餐廳資料：
柏景餅店 Park Deli
尖沙咀廣東道33號中港城皇家太平洋酒店園景翼2樓
2738 2382