全店一室黑與白，梳化、餐枱、餐椅都喺純白嘅，而牆上、櫃面都以簡單嘅黑線勾畫出唔同嘅場景，有花園、有糖果店、衣帽間，有廚房，有書房，有梳妝枱……等等，非常多打卡位。而且，餐廳地方大（雖然有好多彎彎角角），但感覺唔逼狹。
就連枱上嘅餐墊紙，都一黑一白，並以簡單嘅線條去表達出視覺差嘅效果，亦貫徹番餐廳環境嘅色調。
店員遞上餐牌，細看原來都仲有假日午餐、全日早餐、班尼迪蛋供應，此外，仲有啲小食、甜品、多種飲品供選擇。
但講明嚟到喺嘆下午茶，所以，就重點介紹吓個餐。名為「彩花之里．溫室下午茶」嘅下午茶套餐，包2款鹹點及8款甜點，當然包埋餐飲，而單人價為$188 + 10%，兩個人就為$338 + 10%。不過，店長就話今日有部份甜點缺貨，以其他款式代替，只好既來之，則安之。
飲品方面，餐牌原寫住Uluru Rose Tea或Tiramisu Coffee，不過，店長話有多一款Lavender Dream可揀，問我哋試唔試吓，有薰衣草，又有荔枝，我OK喎。
Uluru Rose Tea
以茶底加入士多啤梨蓉、玫瑰糖漿組成，再加點玫瑰花及一株露絲瑪莉做裝飾，艷紅嘅外觀確喺幾誘人。少試一口，味道帶點酸，幾有陣陣玫瑰花香味，友人就覺得幾好。
Lavender Dream
而我呢杯就以茶底混合薰衣草糖漿、荔枝蓉，再放上薰衣草及一串荔枝肉做裝飾，外觀幾清涼透心。味道方面，個人就覺得薰衣草唔算好突出，反而荔枝味好強勁，口感偏清爽，但就略嫌份量偏少，啲甜點都未食到一半，杯嘢都已經飲晒。
大部份甜點都以玻璃架盛載，而鹹點就另外放晌小小木盆之上，整體賣相幾吸晴。雖然，無特定嘅次序，但小弟都喺鍾意先鹹後甜，甜點就盡量淡至濃。
雜菌松露芝士忌廉汁酥皮盒
雜菌、松露、芝士幾樣濃味嘅材料走埋一齊，味道方面真喺差唔得去邊，濕濕潤潤，香濃惹味，加上個酥皮幾脆口，又富牛油香。
香脆芝心火腿雞丸子
另一道鹹點都唔錯喎，香口得嚟唔油膩，以雞肉打成丸子，比預期好，唔叫得彈牙，但口感鬆化；裡面混有芝士及火腿，添加一份鹹鹹香香嘅味道。
紅桑子千層蛋糕
試完啲鹹點，嚐試藉啲紅桑子清清味蕾。原本餐牌喺叫做「紅桑子千層蛋糕」，但依家就肯定唔喺千層蛋糕，而變成紅桑子拼黑珍珠，後者喺啲平常做港式甜品嗰啲珍珠粒粒，韌韌哋，無乜味咁。
貝殼餅
餐牌中有一款榛子曲奇，依家應該喺以法式嘅貝殼餅代替，一款喺原味，一款喺班蘭，口感幾鬆化，但細細件，食落就一陣風咁無咗，哈哈！
蝴蝶酥
小弟都幾鍾意食蝴蝶酥，仲曾經學整過，知道唔易，但論賣相，雖加咗啲金箔，顯得高貴咗，隻蝴蝶酥外觀卻肯定唔合格，因為酥皮層唔明顯，又欠缺清晰嘅蝴蝶外形，味道方面，只叫做唔錯而已。
Uluru朱古力
喺自家製嘅手工朱古力，朱古力味幾濃郁，質感幼滑細緻，有啲似食松露朱古力嘅一類。而裝起粒朱古力嘅透明器皿喺搵糖嚟做，因為摸上手喺黏黏哋，可惜，太硬，只可齋睇，咬唔到。
蛋白餅
除咗有兩粒喺完整嘅蛋白餅之外，成個玻璃架都見到有啲散粒粒嘅蛋白餅。口感鬆化，有啲入口即溶嘅感覺，但食落就真喺好一陣風咁，最好嘅喺無一般咁死甜。
馬卡龍
近年食到嘅馬卡龍都稍稍因應本地人口味或者健康啲，比較喺做得無咁勁甜，而呢一個朱古力口味嘅馬卡龍入口外層做到有份煙韌感，餅心好軟綿，更屬減甜嘅版本。
熱情果奶凍
雖然，甜品嘅名稱喺「熱情果奶凍」，但送到嚟就無咗熱情果蓉，而只喺淋上雲呢嗱漿而已，放上一片用食花而已，多多少少有點失望。幸而，個意式奶凍嘅質感做得有水準，柔滑卻挺身，極富奶香。
迷你朱古力糖果溫室
最後要試嘅喺另以盆景玻璃杯載起嘅「迷你朱古力糖果溫室」，更放上一束花朵，甚具觀賞性。其實佢喺咩嚟呢？底下喺柔滑嘅朱古力軟漿，再灑上大量有麥香嘅餅碎，口感有層次。
整體嚟講，個下午茶嘅賣相，確喺好吸晴，環境又舒服，服務亦好唔錯，只可惜咁唔好彩，遇着食材缺貨，甜點款式有啲變動，無咗好想試嘅焦糖朱古力撻及珍寶珠冬甩，又欠缺一啲蛋糕類嘅甜點，然而，替代嘅款式又覺得未喺做到同級數，令到個下午茶套餐嘅性價比打咗折扣！事後都再睇睇其他食評，原來，啲甜點款式喺經常變動，依一點認真需要改善吓個穩定性，就算轉款，都要提供啲具質素嘅甜點作代替。
個人評分
味道：7/10
環境：8/10
服務：8/10
抵食：7/10
平均每人消費：HK$186
味道：7/10
環境：8/10
服務：8/10
抵食：7/10
平均每人消費：HK$186
餐廳資料：
Uluru
灣仔春園街1-11號春暉大廈1樓
2366 6448
Uluru
灣仔春園街1-11號春暉大廈1樓
2366 6448
沒有留言:
發佈留言