1仔冰室 One's Cafe：孖「煲」兄弟

以往嚟呢頭食飯，都喺因為有事要到「大酒店」，之後，亦大多數都喺晌必嘉街搵食，漸漸發覺呢條小街已發展成為一街食街，食群3林立，啲食店多到近乎一家接一家。是晚，同友人嚟到「1仔冰室」，貪佢門面新淨，睇落好醒神，而且，望入去夠人氣，算喺值搏嘅指標嘛！

走進餐廳，無話大玩懷舊，反而有點清新型格，一室淺木系配湖水藍，非常醒目，又不失雅致。當然，座位嘅緊密度，就貫徹番茶記本色，哈哈！

翻一轉餐牌，一如茶記精神，乜鬼都有。由中西式飯類、炒粉飯麵、家常小炒、懷舊籠仔荷葉蒸飯、茶記小食……等等，都一應俱全。而當中嘅家常小炒及肉餅系列，已包埋白飯，奉送例湯或熱飲。

此外，仲有啲套餐，一系列廚師推介（$72-$118），另一系列就精選晚餐（$72-$92），跟白飯，奉送例湯或熱飲。然而，+$20可以選擇例湯轉燉湯，餐飲亦可以轉凍飲（＋$3）、特飲（＋$7）。

花旗參清燉鷄湯 ＋$20

友人鍾意飲湯，難得只喺加$20就可以轉為燉湯，咁就梗喺轉一客嚟試試啦。啲湯果然好足料，而且，味道香濃，帶淡淡花旗參嘅甘味，實屬抵飲，唯美中不足喺稍稍有點油。

奶茶紅豆冰 +$7

散點要$25，依家跟餐補$7就飲到，就梗喺轉啦。之前晌好幾家茶記都飲過奶茶紅豆冰，而若果有留意，近門口嘅收銀處頭頂上面擺有幾個獎盃，細問之下喺之前一屆嘅奶茶王獎盃嚟，所以，就更要上其奶茶紅豆冰啦。茶底確喺好香濃，紅豆煮得夠綿又起沙，如果再俾多啲紅豆就爽喇。

沙嗲粉絲大蝦煲 $118 

今晚豪少少，揀個大蝦煲，嘩！堅喺用上大蝦嚟，隻隻蝦都好大件頭，非常有睇頭，而且，唔喺得幾隻咁大把，食吓食吓應該有成6、7隻。肉質唔止爽彈，且有蝦嘅鮮甜味；而個沙嗲汁底亦香濃惹味，唔使多講，撈飯一流。

泰式馬拉盞啫啫芥蘭煲 $72 

煲仔菜最能引起啲香氣，個啫啫芥蘭煲送到上枱，真喺香氣四溢，以馬拉盞嚟煮，就更加香噴噴。味道方面，鹹鹹香香，芥蘭仲喺帶爽口感，啲蝦乾，有咬口，伴飯認真唔錯。

兩道煲仔菜都做得有水準，招呼方面，算喺咁啦，怪唔之得有咁多街坊撐場，而且，聽啲侍應嗌單，廚師推介一版嘅蒸魚菜式，5款魚已經無咗4款，真喺好搶手。

個人評分
味道：8/10
環境：7/10
服務：8/10
抵食：8/10
平均每人消費：HK$110

餐廳資料：
1仔冰室 One's Cafe
紅磡必嘉街92-112號紅磡灣中心地下9C號舖
3118 8111