正品小館：正確之選

除咗啲家族做節飯，感覺好似好一段時間無食過粵菜或中餐，早陣子有食友話佐敦有家小店，啲小炒幾得，重點喺平吖嘛，真喺做到平靚正，初時，都喺聽完就算，無記晌心，最近就約咗親友食飯，忽然想返起呢家小店「正品小館」，結果就成了呢晚嘅小店飯局。

雖然叫小店，但裝修簡潔，又幾骨子，最緊要喺咩呀？咪企理乾淨囉，見啲店員不時幫客人收碗收碟，又抹乾淨啲枱。此外，兩邊牆都掛上大電話，播緊足球比賽，啱我喎。

擺放晌枱面有一個主餐牌，內頁印咗好多菜式或招牌菜，然而，分類就較簡單，都喺主食、粉麵、推介幾大類。背頁就仲有啲香港仔風情嘅菜式及飲品。

店長同我哋講，叫留意吓牆上大黑板，因為有唔少時令、特價嘅小炒或海鮮菜式。此外，仲有每日特價飯餐，包湯、包飯，可加錢配嘢飲，都喺賣$38、$48，抵過去快餐店啦。

就好似貼晌門口玻璃門嘅「招牌海南雞飯」套餐，連湯、連雞油飯，都喺賣$38，震撼價實至名歸啦。

凍食龍蝦 $138

店長推介我哋試吓個龍蝦凍食，咁我哋本身都打算試少少海鮮嘢嘅，順利成章就試吓個龍蝦喺點。基本上凍龍蝦就好似有時食自助餐嗰啲咁，灼熟再冰凍番，最好就喺斬成一件件方便大家食。雖然蝦膏唔算好多，但質感豐腴，而啲肉質好得，非常爽口彈牙，沾少少豉油同日本芥末，令蝦鮮味更為突出。

杏汁花膠湯 $48

杏汁白肺湯同杏汁花膠湯都喺店家嘅招牌湯水，因為打算叫海南雞飯，會附送例湯，由我搞掂，而親友就想試試個杏汁花膠湯，因花膠具滋潤美顏之效，女士恩物嘛。個湯嘅份量都夠兩個人飲喎，而杏味非常之濃郁，花膠亦落得唔少，可謂真材實料。

豉椒炒蜆 $58

本來好想食吓蟶子，但已經無晒貨，極受歡迎，故退二求其次，試吓豉椒炒蜆。60蚊都唔使，就炒成一大碟，而且，唔會得個殼，蜆肉都肥大肉厚，亦無乜沙，配豉椒炒，帶點辣勁，十分惹味，真喺無得點輸。

海南雞飯 $38

呢個真心抵食，只賣$38，連埋湯、雞油飯，仲配三色醬，海南雞亦唔會得少少，絕無欺場。由於啲雞起晒骨，入口都喺啖啖肉，皮下脂肪少，而且層皮食落幾爽口，最鍾意喺沾薑蓉同甜醬油，伴埋少少酸爽嘅醃蘿蔔，非常貼心；而個飯都唔錯，雖然唔叫得好有雞油香，但飯粒幾爽，又軟熟。

腐乳通菜 $48

肉肉肉，唔可以無個菜到肚嘅，腐乳通菜喺典型嘅蔬菜小炒，跟個炒蜆一樣，抵食夾大件，碟菜份量好足，而腐乳嘅香氣亦好夠，啲菜又唔會好老，夠嫩口。

睇到啲價錢，定價真喺好抵，無茶芥之類收費，又唔收加一，真喺比起上酒樓抵得多，而相對大牌檔或熟食中心，環境又光猛企理喎，怪唔之得咁多街坊嚟幫襯啦！

個人評分
味道：8/10
環境：7/10
服務：8/10
抵食：9/10
平均每人消費：HK$110

餐廳資料：
正品小館
佐敦庇利金街42號金陵大廈地舖
2787 0868