蜜庵本膳 Mitsuan Honzen：「蜜」超所值

初時單睇見餐廳嘅名字，有啲好玄、好禪嘅感覺，但姑勿論個名有無咩玄機，一睇都知喺日系餐廳。趁着每月第一個周日都會出開嚟尖沙咀，就同老婆入嚟食餐晏，撐撐枱腳，以美味嚟治癒心靈。

未走入店內，晌門見到掛有「日本產米使用店」嘅小木牌，心裡就有種保證嘅感覺。如果你睇過一啲節目或紀錄片，介紹日本米農，就知佢哋對種米嘅認真、熱誠同堅持。

餐廳環境唔算好大，但一室淺色木系，裝潢簡潔樸實，一貫嘅明亮和風，加上樓底高，並以點回盆栽作點綴，予人有份小清新嘅感覺。如果一個人嚟，最好就坐晌靠窗嘅吧位，睇睇街景，自在啲。

此外，留意到靠牆一邊嘅吧位，枱下專登設有UBS插頭，甚至電制位，可以開着部手提電腦，晌度打吓躉，寫吓嘢、食吓嘢都得。

午市嚟到，主要喺供應午餐「自選午餐定食」，有三主菜、二主菜及一主菜定食，究竟點玩法？其實好簡單，看圖認字就得喇，主菜選擇亦多，有冷盤主菜、鍋物主菜、燒物主菜及炸物主菜，奉送埋餐湯及沙律，定價為$128或$98 + 10%。老婆唔大食，就揀二主茶，而我就想試多啲，就揀三主菜，因為仲送埋甜品添。

除咗午市餐牌，枱上仲有啲細餐牌，包括小食同自家製鮮果雪葩，都晌午市有供應。

而講到飲品，都頗多選擇，如多款特色茶品、梳打、咖啡、甘酒（並非酒類，無酒類成份，喺一種植物性乳酸菌）、夏日特飲、日本果酒、燒酌雞尾酒……等等，都喺甚具亮點嘅。故此，不妨試番杯，因為享用午市套餐，飲品有半價優惠。

二主菜自選午市定食 $98

整份定食一盤過送上，擺得非常精緻，基本定食已包有柚子醋田園沙律、味噌湯、蓮藕漬物、南瓜高野豆腐醬油煮、吉列沙椎魚咖喱鍋、十穀飯，非常豐富，份量又十足，且高營養值。

南瓜高野豆腐醬油煮

好一貫日本菜嘅精緻，而且，仲有啲家庭風，日本南瓜極為粉甜，但煮得仲帶少少爽口感，而高野豆腐唔喺滑滑溜溜嗰隻，反而有少少似我哋食冰豆腐咁，具咬口感，感覺比較清爽。

吉列沙椎魚咖喱鍋

咪睇「小」個小鐵鍋，都有成4件吉列沙椎魚，入口甘脆不膩，而咖喱濃香帶微甜，輕微嘅辛辣而已；此外，鍋內仲有唔少洋蔥同甘筍，保持食得夠平衡。

十穀飯

近年都好流行食呢類十穀飯，比白飯富更多唔同嘅營養，其實，我哋自己問屋企煮飯，都好喜歡加入糙米同紅米，故此，十穀飯就更得我老婆歡心。由於十穀嘅份量唔會佔好多，所以，唔使擔心難入口。

三主菜自選午市定食 $128

我嘅三主菜，就揀咗日本南瓜薯仔沙律、季節野菜鍋及柚子風味燒雞，配白米飯，當然，同樣包埋柚子醋田園沙律、味噌湯、蓮藕漬物。一大盤定食，有咁多嘢，睇見都開心架。

柚子醋田園沙律

沙律最緊要嘅喺一樣嘢，就喺夠新鮮，啲沙律菜入口新鮮爽脆，糝上少少芝麻，伴以幾片蘋果片，撈上柚子醋，酸爽清新，真喺越食越開胃。

日本南瓜薯仔沙律

雖然已奉送簡單嘅沙律，但冷盤主菜類都想揀多客沙律，加上小弟都幾鍾意食南瓜。個沙律用上大量嘅蛋黃醬去混和南瓜及薯仔，口感較為豐厚，不論南瓜，抑或薯仔，味道自然。

味噌湯

喺簡單版本嘅味噌湯，只喺放上少少蔥花，但以小木碗盛載，嚟得輕鬆悠然。雖然簡單，但麵豉嘅香味一啲都唔失禮，味道清雅不濁，喺食完啲沙律後，暖暖胃嘅佳品。

蓮藕漬物

其實，呢道漬物正名我都唔知喺乜，暫且叫佢漬物，因為「黑掹掹」有啲似我哋食開嘅欖菜，鹹鹹香香咁，而啲蓮藕口感仲喺爽爽脆脆，伴飯都幾唔錯。

季節野菜鍋

本來想揀羅宋風牛腩鍋架，我都喺食肉獸嘛，不過，近來食得太多肉，又就一就老婆偏素嘅飲食，所以，選咗野菜鍋。一鍋都有好多野菜，鮮冬菇、本菇、芽菇、南瓜、蘿蔔、大蔥……等等，樸素得嚟唔會「淡茂茂」。

柚子風味燒雞

就算呢道燒雞，都算白肉吧，亦喺專登揀嚟就老婆口味。雞扒煎得外皮焦香，皮下脂肪少，肉質就保持到嫩滑，咬落堅有一陣陣柚子香，唔會話得個樣，加上件雞扒都幾大件呀！

白米飯

既然用上日本米，自不然要嗒真啲味道啦。其實，我哋都曾經買過日本米返屋企煮（一次咁大把），真喺好貴，近百蚊一包都喺二公斤裝。雖然，無話好味到曉飛，但米香十足，口感黏糯，此外，懷着感恩之情去細味，就喺對辛勞嘅米農一份敬意。

赤紫蘇柚子梳打 +$24

喺炎夏限定，睇見個餐牌嘅介紹，有咁多功效，打動老婆都心郁郁，雖然無熱飲，但可要求少冰，微微涼，一陣陣酸香味，有啲似洛神花，又滲出點點柚子香，確喺炎夏醒神之選。

日本青梅黑糖蘇打 +$21

小弟就情有獨鍾啲黑糖，加埋日本青梅，味道真喺好特別，青梅嘅酸甜味好突出，飲落酸爽清新，再慢慢嗒落有種黑糖嘅純自然蔗糖香，估唔到咁樣配搭能擦出火花。

京茶咖啡軟雪糕、甘酒美人軟雪糕

我嘅三定食餐會附送迷你版「京茶咖啡軟雪糕」，但店長好好人，送多客「甘酒美人軟雪糕」俾我哋試。前者京都焙茶混入咖啡，變成具和風獨特嘅「鴛鴦」口味，濃郁好味，雪糕嘅質感亦柔滑非常。而後者食落如北海道嘅牛乳雪糕，富奶香，由於用北海道直送嘅生麴嚟發酵製作，故特別富多種天然營養素。

呢度嘅另一招牌喺其「米粉班戟」，以上盛嘅日本米磨成粉嚟做，有別一般用上麥磨成嘅麵粉，可惜，只晌午市過後，大概3:00pm先開始有供應，只嘆緣慳一面。故臨走前都睇睇佢哋嘅主餐牌，除米粉班戟，仲有啲咩好選擇，相信有緣自會再見。

今次，雖然兩公婆只喺食個晏，但由於個定食配搭多，所以，就算兩份定食，都試咗好多款食物，食得出用心製作、配搭有心思、用料無欺場，而且，服務都好好，店員有禮貌，又有笑容，晌咩時候，做人要有正能量至得嘅。

個人評分
味道：8/10
環境：7/10
服務：9/10
抵食：8/10
平均每人消費：HK$150

餐廳資料：
蜜庵本膳 Mitsuan Honzen
尖沙咀赫德道8號地下A號舖
2461 0888