日本牛奶公司：非全日嘅全日常餐

今日專登過嚟荃灣「千色店」買嘢，因為幾件家品都先後打柴，喺時候要換。完成任務，但行吓行吓都過埋食晏時間，所以，過咗嚟千色匯搵食，無嚟一排，都轉咗唔少餐廳。最後，見到間「日本牛奶公司」，日本九州雞蛋喺其亮點，老婆又喜歡食啲健康有質素嘢，就決定揀呢間。

開放式設計，所以，整個環境晌門口都可以一眼睇晒，一室以白色為主調，格局偏向時下新興嘅冰室，走簡約路線。

晌入門口位，樹立咗「招牌」菜式 - 「全日常餐」，賣點就喺採用九州雞蛋嚟做炒滑蛋。不過，題外話吖，個牌打少咗「滑蛋」兩個字，而變成厚牛油厚多士，此外，如果有留意到左下角有加一服務費嘅字仔，證明你睇嘢夠仔細，小弟當時就真喺無為意喇。

我哋喺星期六晏晝3:00pm幫襯嘅，所以，既有是日午餐（無講供應時間至幾點完），亦有下午茶餐（同樣無提及供應時間），餐飲可以加錢轉特飲。

再睇埋佢哋嘅「常餐」餐牌，標示咗供應時間喺10:30am - 6:00pm，咁……仲喺唔喺「全日」常餐呢？不過，唔知後尾會唔會番啲供應時間，總之，睇完晒啲餐牌後，唯一嘅感覺就喺啲資訊好亂！

火腿、滑蛋、多士（常餐）

睇樣就幾對辦，炒滑蛋亦都好多，入口啲蛋確喺好滑身吓，而且，蛋味亦濃郁，配上脆口嘅烘多士，已經好唔錯；其實，寫明喺金妹火腿，個人而言，就唔覺有咩賣點，覺得喺基本，因為坊間有啲來佬嘅火腿仲優質，正如我話俾你知喺嘉頓方包，你都唔覺得喺咩嘢，但如果喺某出名麵包店嘅方包，感覺先會喺唔同啲。

金牌沙嗲牛肉麵（常餐）

加上「金牌」兩個字聽起嚟勁啲，但實際上又真喺唔錯喎，因為，牛肉嘅份量足，又唔會碎濕濕咁，而且，好腍滑，個沙嗲汁亦調校得惹味香濃；公仔麵煮得火喉好，因為俾錢時問過喺咩麵，雖然都喺茶記常用嘅大光麵，但無話有過腍嘅情況。

日式雜菜炒烏冬 $40

另外，清清哋嗌咗個下午茶餐嘅炒烏冬，份量都大大碟，無欺場，而雜菜都喺啲菇菌呀、椰菜呀、甘筍呀之類。食起嚟有種好有鑊氣嘅感覺，味道亦唔錯，唯一較大嘅問題喺油多，感覺比較膩。

熱奶茶、熱杏霜

我當呢度喺茶記，所以，點咗杯奶茶，茶底醇厚芳香，不過，老實講，滑溜感就真喺欠奉。反而，老婆杯杏霜幾好，好香杏仁味。

溫馨提示，餐廳暫時只收現金，晌呢個盛行電子錢包嘅年代，最起碼嘅八達通都無，真喺對普遍人嚟講好唔方便。仲有，埋單時，先見到收銀旁楝個牌仔，寫住星期一至五6:00pm後，及星期六、日、假期全日，收加一，感覺絕對唔好。因為，一來多多少少茶記格局，無咩服務可言，但侍應都好有禮貌嘅，二來至少晌啲餐牌明確列明，唔好等啲客俾錢先知（註：門口嘅常餐大招牌喺有，但啲字鬼鼠又細粒，星期六、日、公眾假期梗喺後加添）。

個人評分
味道：7/10
環境：7/10
服務：7/10
抵食：7/10
平均每人消費：HK$57

餐廳資料：
日本牛奶公司
荃灣眾安街68號荃灣千色匯I期3樓3013號舖
5724 4708