金牌源記大排檔：歡樂「金」宵，啤啤佢！

冬菇亭、大牌檔呢一類民間食肆，絕對喺好多經歷過70、80年代嘅人集體回憶，更喺本土飲食傳奇，雖然，依家都仲有，但可謂賣少見少，加上一啲冬菇亭已經「現代化」，有裝修，有冷氣，都已經唔喺嗰啲要去捱吓熱嘅地方，而大牌檔亦有不少喺入鋪，比以往舒適好多。小弟晌石硤尾大，耀東街更喺求學時期嘅早餐飯堂，今晚搵嚟兩個街坊老友，聚聚舊，兼懷緬吓大牌檔風味。

耀東街附近有好多舊唐樓，所以，無嚟一段日子，已經變晒，而昔日街道兩旁嘅大牌檔，依家都剩番得好少。呢晚光顧嘅「金牌源記」，位置正正晌近南昌街嘅街口。

大牌炒嘢寧舍有鑊氣，亦喺好多人喜歡去大牌檔嘅原因之一，啱啱落咗幾場雨，店家亦架起帳蓬，不過，變相令到啲油煙散得無咁好，真喺不妨考慮吓加裝把抽氣扇嚟散散啲油煙。

大牌檔嘅對象都喺街坊或熟客，賣嘅大部分都喺耳熟能詳嘅菜式，而佢哋亦有做埋海鮮嘅來料加工。

此外，牆上亦印出一系列店家嘅推介菜式，兼且圖文並茂。覺得餐牌太多菜式唔知食乜好，就不妨晌埋推介中考慮吓。

啤酒 $24

雖然小弟唔好酒，但都陪老友啤一啤吓，配椒鹽類炸嘢就一流喇 。當然，除生力，仲有藍妹、青島之類，亦有汽水供應。

椒鹽鮮魷 $98

事不疑遲，第一道登場嘅就喺椒鹽鮮魷，絕對喺餸啤酒嘅好朋友。啲鮮魷外觀金黃，裁得大大件有睇頭，入口肉質彈牙且有魷魚味，頗鮮甜，最對辦喺唔油膩，粉漿做得薄薄而香口，既有鹹香，又有點辣勁，咁先喺椒鹽嘛，沾少少喼汁，真喺好易食唔停口。

豉油皇海蝦 $148（半斤）

呢道菜真喺色香味全呀，一上枱，首先就喺啲海蝦夠晒大隻，而且，煎得色澤帶點焦黃，而散發出一陣陣豉油嘅香氣。咬落連殼都帶少少脆口，差啲想食埋落肚，而蝦肉口感好爽彈，既有蝦鮮味，又有豉油嘅鹹香味，正呀喂！

源記小炒皇 $98

老友嘅大牌檔心水菜式，話唔食唔知個廚得唔得，皆因檔檔大牌檔嘅切備菜式，最好用嚟互相作比較嘅。基本上都喺大同小異，土魷、蝦乾、豬腩肉爆炒啲韭菜花，土魷及蝦乾就有嚼頭，韭菜花就好爽口，食起嚟有多種口感，而且，份量好足。

大澳蝦醬通菜 $68

通菜一喺蝦醬炒，一喺就椒絲腐乳炒，揀前者就純粹貪其鹹惹味啦。落蝦醬嘅份量啱啱好，食得到濃郁嘅蝦醬香，但又唔會過鹹，只喺覺得啲菜炒過咗少少火位。

嚟到大牌檔，雖然無服務可言，但勝在無拘無束，而且，份量十足，無茶芥，更加無加一，消費親民，所以，越夜越多客人。

個人評分
味道：8/10
環境：5/10
服務：6/10
抵食：9/10
平均每人消費：HK$125（8折）

餐廳資料：
金牌源記大排檔
深水埗耀東街15號地舖
5449 6000