冚棒唥 ham6baang6laang6：藝．文青之選

有睇過小弟嘅食文都知，我一向好撐廣東話，雖然用書面語難我唔到，但廣東話真喺好傳神。初次從網上見到呢間小店嘅店名「冚棒唥」，尤其個英文名「ham6baang6laang6」，廣東話拼音，加埋聲韻，雖然外國人未必睇得明，但夠本土，我撐！未食已經覺得好正、好有貼地感，加上佢喺一家咖啡店，咁就啱晒我啦！

門口擺咗張枱，枱上寫咗張紙卡，叫人埋嚟拎番張，原來喺店家嘅菜式介紹單張，每張都加入一啲插畫，好有本土味。

其實，晌門口已經睇得出間餐廳好有個性，踏進裡面，真喺非一般咖啡店。雖然地方所限，枱與枱確喺有點逼，但晌高樓底之下，空間感都仍然充足。

與其叫文青，我就覺得喺藝術感多啲，因為，餐廳處處都放咗一啲跟繪畫相連嘅物品，如畫筆、顏料、手工小擺設，又有唔少廣東話趣味標語。當然，最搶眼嘅喺牆上幾幅大油畫，畫得甚有水準，仲跟餐廳嘅食物有關添，事後先知，就喺出自啱啱招呼我哋嘅店員手筆，真喺卧虎藏龍。

唔知喺咪店主都幾鍾意車，除門口有張「Mini Cooper」梳化之外，一邊嘅窗口位，玻璃枱面之下就放咗好多各式各樣嘅迷你車仔，又喺店中嘅打卡位。

冚棒唥嘅食物就印晒晌小型餐牌之上，圖文並茂，色彩亮麗，並加點趣緻嘅插畫，令餐牌更得意。有幾樣主打嘢，如飯堡、意大利麵、沙律，此外，仲有啲特色小食、兒童餐、甜品。主食會奉送一杯美式咖啡或熱茶，亦可以轉揀其他飲品，有半價優惠架，正就正在仲無加一服務費添。

飲品方面，意式咖啡就唔少得啦，仲有就喺一啲茶品、朱古力、果汁、梳打、乳酪、多種特飲、啤酒……等等，選擇十分多。

原來，佢哋仲做埋早餐，餐牌最底一頁就喺印有多款早餐。更可以額外加錢配其他食材，自製DIY嘅全日早餐。查實餐廳喺有供應一款指定嘅全日早餐，但就要12:00pm後先有，不妨考慮吓11:00am就有得食，因為家吓啲人興星期六、日瞓晏啲，再出嚟食個早午餐嘅。

素素飯堡配粗薯條、雜菜沙律 $128

據店員介紹，有唔少客會揀其黯然銷魂飯堡，不過，我哋反而想試試呢個素素飯堡。幾個飯堡中，就以素素飯堡賣得最貴，所以，家吓出去食素比起食肉嘅付出仲多呀！整份飯堡都好有睇頭，配上薯條、沙律菜，伴有茄醬及黑松露蛋黃醬。

睇個飯堡外觀就知，唔喺白飯一堆壓個模就算，睇得出用上唔同嘅米粒去煮，煎得外層焦脆香口，咬落煙韌綿糯；裡面更夾有生菜、蕃茄、紫洋蔥、露筍、大啡菇，口感非常豐富，店員更教我哋不妨添加啲黑松露蛋黃醬落去一齊食，風味更佳。薯條炸得香脆不膩，點茄醬或黑松露蛋黃醬都好食，而沙律菜以黑醋撈過，其酸香味正正以平衡番晒一切煎炸嘢。

泰式風味牛油果蕃茄辣沙律配烤酸麵包 $82

店中有唔少混合咗泰國食材嘅出品，呢一道沙律就喺其一喇。其實個沙律好簡單，就喺以羅馬生菜墊底，搭有牛油果、車厘茄、腰果，賣點就喺個加入咗蝦米所做成嘅泰式風味醬，伴有兩片酸種麵包，賣相鮮艷吸晴。

個泰式辣醬汁，鹹鹹、酸酸、香香，幾有層次，唔喺講笑，叫得辣沙律就真喺幾刺激吓，如果唔食得辣嘅客人，就落單前不妨向店員要求減辣，但食得辣嘅客人，相信會喜歡呢份刺激感；將所有食材夾埋麵包食，又或以生菜包住嚟食，都喺過癮非常。

貢菊蜂蜜檸檬茶 +$21

餐廳所用嘅餐具都好有藝術感，貫徹番餐廳嘅整體氣氛。呢杯貢菊友人就好欣賞，因為菊花香異常突出，而菊花本有會有少少澀味，但加入咗蜂蜜及檸檬，成件事就唔同晒。

牛奶咖啡 +$20

伴甜點，點都喺搵杯咖啡最好嘅，而咖啡中，小弟算喺牛奶咖啡嘅死粉。杯牛奶咖啡果然沖泡得具質素，首先，心情嘅拉花花紋細緻而對稱，入口順滑而平均，我喺完全無攪過杯嘢，但每口飲落都會感受到奶泡撞入濃縮咖啡時嘅均勻感。

蕉蕉雪糕杯 $48

喺型格版嘅香蕉船，以啱啱熟透嘅香蕉肉，配搭雲呢嗱雪糕、雜莓，再唧上朱古力漿及灑上唂咕粉而成，賣相都好靚仔，雖然簡單，但用料不賴。

啲雪糕柔滑而極富奶香，應該喺用上唔差嘅品牌，無講配雜莓，抑或蕉肉，都好消暑。心諗，如果肉桂粉代替唂咕粉，而底下倒少少意式濃郁咖啡，效果唔知會唔會更富層次呢？！

雖然餐廳嘅名、環境都玩味十足，但絕對唔喺得個樣，做菜都好有水準，亦富特色，招呼又唔錯。不好，兩個人嚟用餐，如食正餐嘅話，個人建議主食可考慮逐道逐道叫，唔使一次過成張枱堆滿晒所有嘢。順便都溫馨提示一下，人哋小店生意而已，餐牌寫明堂食最低消費每人一杯飲品，繁忙時段限時90分鐘，都好合理嘅要求，有心幫襯就大家配合吓啦。

個人評分
味道：8/10
環境：8/10
服務：9/10
抵食：8/10
平均每人消費：HK$150

餐廳資料：
冚棒唥 ham6baang6laang6
佐敦西貢街3-5號昌華商業大廈地下2號舖
2468 0806