美心 MX：偶有佳作

雖然小弟返中環工，但喺好少寫中環嘅午餐，亦好少寫「美心MX」。我同老婆間唔時都會幫襯「美心MX」，但就限於星期六去食早餐，所以，好少寫。今日，買外賣晌公司食，其實，可以講唔喺咩特別事，不過，「美心MX」出咗隻新嘢，又幾好食喎，比預期中好，故此，hea hea哋就寫番篇快餐晏仔。

其實，啲快餐為咗吸客，以及不停俾到新鮮感大家，真喺個個月或幾星期就有新產品推出。今次分享嘅喺名為「戀戀台食」嘅便當午餐，當日所見有兩款：烏醋豬軟骨及豆腐鹽酥雞，配肉燥飯、台式三小碟及餐飲。

便當豬軟骨 $49

堂食唔知會唔會好似啲介紹咁做到成份台式便當，台灣人搭火車時都好興食便當架，然而，外賣嘅就唔會啦，都喺一個又一個嘅膠盒及紙兜，肯定就唔多環保架喇。

台式三小碟，有啲類似鹹酸菜嘅涼菜，以及台式豆卜及滷花生，味道唔錯喎，但又算話好特色，可能感覺唔喺好台式啩。

肉燥做得不俗，香濃惹味，由於用咗免治豬肉嚟做，而非腩肉粒，所以，無咁油膩，啱我多啲；不過，飯嘅份量確喺有啲少，跟熱飲個杯比，見個飯兜唔喺大好多，再睇睇，飯量只喺得飯兜嘅一半左近，所以，有啲大食少少嘅朋友一定唔夠食。

輪到介紹主角，黑漆漆嘅烏醋豬軟骨，聞都聞到陣陣酸醋香，未食都有種醒胃感，食落啲豬軟骨又真喺幾得，好軟腍，極鬆化，酸醋令人完全無油膩嘅感覺，而且，酸得嚟恰到好處，唔會好嗆喉，頗醇香。

雖然，快餐店嘅出品都喺以快為主，工廠式倒模製作，質素有限。不過，今次所試嘅台式便當餐，實屬偶有佳作。

個人評分
味道：8/10
環境：7/10
服務：7/10
抵食：8/10
平均每人消費：HK$49

餐廳資料：
美心 MX
中環干諾道中24號中華總商會大廈地下
2140 6689