炑八韓烤 MeokBang Korean BBQ & BAR：「炑」標清晰

曾經光顧過好幾次「炑八韓烤」，但每次都喺夜晚嚟，兼喺食韓燒，會再翻兜嘅，當然因為有質素，定價又相宜啦！最近，老婆話約個朋友食晏，佢話對方想食韓國嘢，睇過好幾家，先發覺原來「炑八」都有午市套餐供應，而且仲好抵食，加上之前嘅經驗，幫襯嘅信心度大增，可謂目標清晰。

如好多韓燒餐廳嘅格局，都喺一個個嘅卡位，設置好固定嘅烤爐，燈光調得昏暗，校得大大嘅冷氣。我都喺第一次嚟呢間分店，見個門面窄窄，落到去見一直排卡位外，原來，走到尾屈個彎，都仲有好多大枱位。

先介紹吓「午市韓式定食」先，其實選擇非常多，有新推嘅蛋包飯系列，亦有慣常見嘅石頭鍋飯、蓋飯、韓式炒粉絲、牛骨清湯……等等，每個套餐已包韓式清湯及前菜，雖然唔包飲品，但加配都只喺$8，就已經有好多款梳打或冷泡茶供選擇。

此外，仲加推一個午市優惠，就喺「原隻人參雞湯配紫菜飯」，包埋飲品，都只喺賣$88，堅喺跳樓價啦，你晌超市買隻冰鮮雞都四十幾蚊隻啦！仲有，招呼晒你，午市都唔會收加一服務費，超讚。

如果你真喺好想食韓燒，無問題，一樣喺有得揀，當然比起午市套餐會貴多一截啦。韓烤套餐有一人份，亦有多人份，已包韓式清湯、前菜、白飯、生菜籃及無限量添加爐邊蛋，最正喺可以額外追加迷你飯及其他烤肉，變相唔使一人叫一個韓燒餐都得。

晌午餐餐牌尾，仲有啲韓式輕食、甜品及極富韓國特色嘅飲品，尤其喺韓式酒品，不過，我哋都唔喺好酒之人，所以，貼出嚟都喺俾大家參考吓而已。

韓式清湯

雖然話叫午餐會包埋清湯及前菜，不過，未落單，只喺一坐低無耐，就按人頭數送上清湯及前菜。話就話叫清湯咋，都好足料，幾香甜，仲落咗唔少昆布。

韓式前菜

前菜都喺見慣見熟嘅韓式泡菜、大豆芽及青瓜，不過，一啲都唔馬虎，有水準架，而已，仲可以添加嘅，我老婆好鍾意啲泡菜，都添咗一次。個店員見佢鍾意食，之後，仲主動問佢再使唔使添。

甜辣炸雞蛋包飯 $68

睇個樣，個蛋包飯好似好得，因為，單喺睇外觀啲蛋炒得已經好嫩滑，入口堅濃蛋味，配以茄汁飯底，已經好食；而甜辣炸雞做得外層甘脆，又唔油膩喎，仲甜甜辣辣頗惹味，伴埋少少胡麻醬沙律菜，夠平衡，真心推介。

雞扒蛋包飯 $48

另一道蛋包飯同樣又喺雞，不過，道烤雞扒而已，但同樣做得唔錯，啲雞扒處理得保持嫩滑，搽上啲烤醬，又有確喺OK。

炑八烤牛肉流心蛋韓式粉絲 $57

嗰時睇韓國綜藝節目「尹食堂II」，成日見到尹老師同有美課長整炒韓式粉絲，已幾想試，今日就有機會喇。個汁底幾濃香，啲粉絲有別我哋平時打邊爐嗰啲，口感有啲似紅薯粉咁，煙煙韌韌，索滿汁，好好味，而啲牛肉又腍又滑，好值得一試。

白桃醋梳打 +$8

睇個樣，真喺唔多似我叫嘅梳打，不過，飲落真喺陣陣白桃味，感覺酸香清爽，而底下仲有啲五顏六色嘅啫喱可以啜啜吓。

無論晚餐韓燒又好，午餐定食又好，兩者都做得唔錯，又幾好招呼，不過，就算喺尖沙咀區，兼喺午市嘅高峰時段，目測入座都喺得3乘左右，埋單時同店長傾開，佢就話因近排嘅社會事件生意跌咗一半，亦曾試過提早閂鋪，真喺「炑」中無人，所以，叫我得閒都幫襯吓喎，哈哈！

個人評分
味道：8/10
環境：8/10
服務：8/10
抵食：8/10
平均每人消費：HK$65

餐廳資料：
炑八韓烤 MeokBang Korean BBQ & BAR
尖沙咀金巴利道35號金巴利中心B/F1號鋪
2493 3233