而踏進餐廳，一室木系裝修，左邊嘅吧枱位更可以睇住主廚做菜。初時嘅感覺未叫得好日本風，大抵因為唔喺有太多和式擺設，而坐耐咗，感覺又變得好唔同，店長，以及好多店員，甚至客人，好多都喺日本人，日文滿場飛，蠻有氣氛，唔講都以為自己晌日本呀。不過，放心，當晚有一位識聽廣東話嘅日藉女侍應，更有一位識講日文嘅香港女侍應，所以，唔怕溝通唔到。
此外，留意多少少，就發覺晌一啲小擺設度就散發出和風氣色。最深印象嘅，就喺啲筷子托，我嗰隻正正就喺帶有祝福意思嘅日本紙鶴；友人嗰隻就喺牛牛。
仲有好幾款調味料，已放晌枱上，自由取用，不過，小弟就成晚都無用過，因為部份菜式已伴有汁醬，就算無嘅，本身嘅調味已恰到好處，唔使再添加。
兩大張點菜紙就喺餐牌喇，中英日文對照，又列晒編號，所以，就算無識廣東話嘅侍應，點菜都唔成問題，好似我哋去日本，都唔識講日文架啦。而點菜紙將菜式類別大致分為小食、沙律、揚物、食事和甜品等多種，太多嘢唔知揀咩好，就不如從見印有「名物」標誌嘅菜式入手。
而另一張就喺店家嘅主打「炸串」，足足有40多款，細分為肉類、野菜類、海鮮類、G39特別類、魚蓉類及卷類，大部份都喺十零廿蚊，只有數款先喺三、四十。所有食物，都由日藉廚師主理，唔多唔少都增加多啲信心。
除此之外，咪錯過餐廳後方一塊大黑板，喺餐牌以外嘅特色菜或推介菜式。
既然走居酒屋路線，當然有很多酒類飲品供應啦，餐酒、清酒、燒酎、梅酒、水果味生啤、雞尾酒……等等，特色酒品任你揀，酒迷真喺唔好錯過。咁唔飲酒點算，無問題吖，有少量汽水、梳打供應。
熱情果特飲 $45
呢個無晌餐牌內，喺侍應嘅推介，除熱情果，仲有多款口味。入口冰涼酸爽，更有種清新味蕾嘅作用，配炸串夾到無朋友。
乳酸梳打 $35
友人就穩陣啲，揀杯乳酸梳打，同樣喺諗住清爽啲嚟配啲小食、炸串等等。
大陂傳統料理土手煮 $38
睇中文唔知佢喺乜，睇英文你就知喺啲味噌牛筋，仲加埋少少魔芋。咦，正喎，啲牛筋炆得好腍，卻不失咬口，沾滿特製嘅麵豉醬汁，濃香好味，相信撈飯一流。
安納芋蓉沙律 $45
雖然叫芋蓉，其實日本漢字嘅紅芋，就即喺蕃薯，侍應話呢種「安納芋」喺嚟自鹿兒島，煮熟後嘅甜度比普通嘅日本番薯高幾倍。果然勁清甜，極有蕃薯香味，質感又綿滑，最驚喜喺蕃薯蓉中混有煙肉及粟米粒，多添一份咬口感。
和牛卡爾帕喬 $118
「卡爾帕喬」喺乜？睇中文喺完全估佢唔到，但睇番英文就知喺意大利名菜「薄切生牛肉」（Carpaccio），不過，就用上鹿兒島A4和牛刺身，立時「升呢」咗幾級。睇見啲油花，就覺得喺好高質素，淋上油醋，配以紫洋蔥絲及火箭菜，捲起一啖放入口，嗰份油香、柔滑感，真喺無得頂，細緻鮮嫩。怕太油嘅朋友，就不妨唧少少檸汁中和一下。
大阪代表美食章魚仙 $38
章魚燒相信唔少人都食過，冠以「大阪代表」，晌當地確喺一種好平民、好大眾化嘅美食。一客有6粒，抵喎，而且 ，粒粒燒到金黃，並淋上沙律醬及日式燒汁，糝上大量木魚碎，賣相好睇。咬落香軟，食味不俗。底下仲墊有一大片蝦餅，都幾特色，不過被啲醬汁整腍咗，變得好韌身，搣起嚟有啲「論盡」啫。
炸串拼盤
上文都講過，啲炸串都喺十零蚊串，唔覺唔覺就會點咗好多。一口氣就嚟齊8款：特選牛（$18）、五花肉（$18）、雞腿肉（$18）、沙椎魚（$18）、子持昆布（$48）、蘆筍（$12）、冬菇（$12）及卡門貝爾芝士（$20），並伴以新鮮嘅椰菜，而啲椰菜爽脆到不得了，更可以添食架。好在早前啱啱睇過周奕瑋嘅「周遊東京」，知道啲炸串食過就唔可以再直接沾醬汁，而喺用啲椰菜當匙羹滔啲汁上嚟。講到啲炸串，層粉漿超薄，咬落酥脆不膩，完全唔覺會熱氣，沾一沾自家製帶微酸嘅醬汁，更有畫龍點睛之效，而且，每樣食材都高質，不愧 「串カツ専門店」。
燒牛腸 $55
喺呢期嘅推介特色菜，因為個「燒」字，初以為會喺較乾身嘅料理，但原喺應該喺「炒」牛腸。唔好理佢燒定炒，總之好食，牛腸味道香濃，口感柔韌，最緊要喺完全無腸臟種臊味，喺佐酒良朋。
銅鑼灣一向喺飲食潮流集中地，競爭幾大，可謂寸土必爭。既然喺由日藉師傅開嘅店，自然增加咗多啲信心，餐廳嘅一切營運、管理都喺日式水平，故此，招呼一環做到熨貼稱心，侍應態度親切有禮，再者，啲菜式確喺幾有特色，坊間少見。溫馨提示，餐廳由旁晚先開始營業，直到深夜，晚上11點後更提供深夜限定特色菜，甚有深宵食堂嘅影子，記得唔好晏晝摸上嚟呀！
個人評分
味道：9/10
環境：8/10
服務：8/10
抵食：8/10
平均每人消費：HK$300
味道：9/10
環境：8/10
服務：8/10
抵食：8/10
平均每人消費：HK$300
餐廳資料：
串カツ専門店 JunG39 Japan
銅鑼灣軒尼詩道499號永光商業大廈17樓
2143 6777
串カツ専門店 JunG39 Japan
銅鑼灣軒尼詩道499號永光商業大廈17樓
2143 6777
沒有留言:
發佈留言