敏華冰廳 Men Wah Bing Teng：熱焫焫晚餐

老婆今日狀態幾好，話挑戰一吓中距離、中級難度嘅山徑，咁就索性入屯門行一轉啦，目的地喺藍地水塘加洪水坑水塘。由於入到屯門，我哋家住美孚，梗喺買張屯馬線嘅全日通$28全日任搭，一來一回已經抵返晒。咁當然作為香港人，梗喺會用到盡，所以，行完山專登搭到去南昌，上V Walk搵食，結果，揀咗「敏華」貪佢有啲煲仔菜。

雖然小弟好鍾意去食茶記，每次行完山梗係晌茶記食下午茶，就算唔喺嘅，都好鍾意去茶記食午餐，不過話時話，「敏華」真喺第一次幫襯。裏面嘅環境格局都喺好似一般茶記咁，二人枱、四人枱、卡位，不過呢間舖樓底幾高，再加少少復古裝飾。呢晚都見幾多人幫襯，不過，好彩入嚟嘅時候啱啱有張卡位，仲要挨埋一角。

我哋喺門口睇勻啲餐牌，有無啱食先入去，所以，一坐低就已經可以點菜。基本餐牌就喺茶記常見嘅嘢食，早餐呀、常餐呀、茶餐呀、特餐、三文治、少少碟頭嘢、飲品呀……等等。另外，就有一個晚餐推介嘅餐牌，可單點，亦可選套餐多杯飲品，其實對比單點喺貴$10。

依家已經有好多餐廳採用二維碼落單 心，「敏華」都唔例外，不過有樣嘢真喺讚一讚啲阿姐，佢哋好擔心啲客唔識搞，見你好似好耐都未落到單，就好主動走埋嚟問使唔使幫手。順帶一提，雖然呢度喺茶記，但就收番加一服務費。

餐具、紙巾晌晒枱側暗櫃，相信大家都知清楚晒呢啲「機關」。

古法支竹炆鴨煲 $68

出嚟食飯梗喺揀啲我同老婆都唔會喺屋企煮嘅菜式啦，加上天氣都仲有少少凍，都想食返啲熱焫焫嘅嘢，所以，呢個炆鴨煲啱晒我哋，唔喺講笑，睇相你都見個炆鴨煲份量幾多，真喺滿晒鴨肉，又有唔少枝竹。講到啲鴨真喺炆得好香，鴨肉又鬆化，個汁底撈飯真喺無得輸，而啲支竹都好好食，柔韌得嚟有豆香，成個炆鴨煲絕對無欺場。

明爐胡椒豬肚滑雞鍋 $80
另一個滑雞煲亦都唔失禮，講明明爐，鍋底下面真喺有擺火酒膏熱住，食到尾都仲喺咁熱熨。撈一撈，豬肚同滑雞都份量十足，仲有少少鹹酸菜之類，豬肚洗得夠晒乾淨，唔會有啲豬臊味，咬落好軟腍，啲滑雞就堅滑，肉質好嫩，此外由於呢個喺湯喎，所以，當然唔可以錯過啲胡椒豬肚湯啦，飲完真喺成身暖晒。

手搖沖繩黑糖珍珠原味奶茶 $24
+$10轉為套餐就多杯飲品，不過，見佢有個推介就喺呢個黑糖珍珠奶茶，今日行咗成日，當然要飲好啲。本身個奶茶底都唔錯，好有茶香，而加咗黑糖嗰陣陣甜味好醇和，同埋啲珍珠好有咬口，又俾足份量，呢個真喺抵飲，唯可惜無咩當為加配優惠。

晌南昌站呢邊食完飯，返我哋美孚都唔使5分鐘車程，超級方便，不過，有啲奇怪我哋真喺好少 揀過嚟南昌搵食，純粹喺無一個習慣性而已，其實V Walk裏面確喺有好多餐廳值得一試。

個人評分
味道：9/10
環境：6/10
服務：7/10
抵食：8/10
平均每人消費：HK$95

餐廳資料：
敏華冰廳 Men Wah Bing Teng
地址：深水埗深旺道28號V Walk 2樓L2-40號舖
電話：2682 0711