Studio Caffeine：咖啡誘．因

老友知我一向都喜歡嘆吓咖啡，就極力推介一家咖啡店，更話餐廳攞唔少咖啡嘅獎項架，質素甚有保証，而且，佢哋嘅全日早餐都頗有名氣。講到咁好，唔試唔得啦，咁究竟喺邊間咖啡店？原來喺佐敦嘅「Studio Caffeine」，老實講，真喺未幫襯過喎。

店鋪呈長形格局，鋪位極之深，真喺晌門口睇唔出餐廳地方都幾大。一室木地板配以深啡木餐枱，水泥牆又夾雜黑底白色手繪圖畫，勝在樓底高，空間感足，整體裝修有個性。

一邊喺座位，一邊就喺開放式廚房、餅櫃，櫃內放有唔少菜式嘅樣辦，有輕食，有甜品。晌收銀處落單，轉頭就由店員把食物送上，但卻無加一服務費，用HSBC簽帳仲打個九折添。

既然無加一服務費，有啲嘢就自動自覺啦，餐具放晌枱上自取，清水、調味料、糖包……等等，就喺晒出面專櫃上。

晌門口，已擺放咗一張巨型餐牌，可謂對餐廳供應嘅食物一目了然。不過全英文，種類繁多，當然坐低拎個餐牌慢慢睇。

講過佢嘅全日早餐喺人氣，所以，你見個餐牌都做得精美別緻。一共4款，更有一款喺全素添，定價都喺$78-$108，價錢OK喎。

此外，其他食物方面，就仲有三文治、沙律、百吉圈三文治、扁意粉、小食，以及凍櫃內嘅甜點。

既然店名叫得「Caffeine」，咖啡就喺另一亮點。如果想深度欣賞啲咖啡，當然建議試試啲單品咖啡啦，更可揀手沖或虹吸。不過，小奶就喜歡加奶嘅出品，所以，一系列鮮奶咖啡啱我多啲，仲有啲特色酒咖啡，單喺咖啡已選擇多多。

咁唔飲咖啡點算，放心，其他種類嘅飲品亦唔少，好似朱古力、特色西茶、中國茶、果蓉冰搖茶、果汁都有供應，甚至手工啤都有。

上文話過佢哋攞唔少獎，唔喺大隻講，牆上擺滿一堆獎狀、獎盃架。

A.C.E Salmon Bagel Sandwich $98

名為「A.C.E」可能你唔知喺乜，睇埋餐牌所列嘅成份，就知代表緊牛油果、忌廉芝士、雞蛋幾款食材，再加埋挪威煙三文魚、火箭菜，成份百吉圈極之墜手，份量十足，事後證明，食完又確喺幾飽肚。百吉圈喺種好個性嘅麵包，比較韌身，有嚼勁，整體味道上好就好食，尤其牛油果、忌廉芝士、炒雞都喺心水食物，不過，個包就有點偏乾同硬，原先想切開影影直切面已經唔成功，食嘅時間一咬啲餡晌包邊唧晒出嚟，食到小弟一手都喺牛油果、炒蛋。

超級全日早餐 $108

朋友就要咗一份全日早餐，非常之大份，朋友話睇見都好開心，梗喺啦，一碟有齊煙肉、紐倫堡腸、煙燻牛肉、煙三文魚、茄汁豆、炒蛋、沙律菜、車厘茄、新鮮水果、大蘑菇、黑松露薯蓉、法式多士，實在陣容鼎盛囉。由於小弟無試，所以，只喺問番朋友覺得點，佢就話比預期好食，尤其倫堡腸、煙燻牛肉、炒蛋、大蘑菇、黑松露薯蓉呢幾樣，食材本身唔錯，煎炒手勢不俗。

烤榛子鮮奶咖啡（大） $45

細杯（7安士）、大杯（10安士）兩者只喺相差$5，當然要大杯划算啲啦。咖啡以小木盤送上，甚有文青感，配隻木匙就更正。而平常嘅拉花，唔喺心心，就喺樹葉，但今次就有啲花巧嘢，竟然喺隻馬騮仔，線紋未算好細緻，但都算神似，否則都估佢唔到啦。呷一啖先，口感均勻細膩，絕對喺因為沖調嘅手勢恰到好處，奶泡撞落濃縮咖啡度沖出嚟嘅口感平衡，更帶出咖啡嘅醇香。

朱古力鮮奶咖啡（大） $45

友人都甚好咖啡架，不過，一到夜晚就唔敢飲太多，所以，就揀咗朱古力鮮奶咖啡。而佢杯公仔喺隻兔仔，又OK喎，友人分享話杯朱古力鮮奶咖啡幾好，朱古力味、咖啡味兩者都做到頗為平均，唔會太側重某一邊。

用餐期間，都見原來有唔少熟客嚟幫襯，更加喺專登嚟試佢哋嘅精品咖啡，客人更同咖啡師有很多交流同互動，「Studio Caffeine」唔單止喺一間賣精品咖啡嘅咖啡店，更喺將精品咖啡嘅文化推廣至大眾。可惜，小弟限於見識，始終鍾意鮮奶咖啡系，暫時都仲未懂得欣賞單品咖啡。

個人評分
味道：8/10
環境：7/10
服務：8/10
抵食：8/10
平均每人消費：HK$133（信用卡9折）

餐廳資料：
Studio Caffeine
佐敦廟街284號地下
2793 3480