布萊恩．L食堂 Bryan L Kitchen：獨丼一面

早過多星期，同朋友晌長沙灣嘅「港口味冰室」食晚飯，臨走上返青山道，路過見到有家叫「布萊恩·L食堂」，除咗覺得個名好得意之外，晌招牌旁，特別註明「手打牛肉專門店」，就因為呢樣嘢，今晚就專登約咗住晌近蘇屋村附近嘅一位表姨甥女過嚟食餐便飯。

「食堂」俾人嘅感覺喺好街坊，踏進餐廳，確喺唔大，大概廿鬆啲個位，裝修精簡，左右貼上白磁磚，襯以木枱、木櫈，坐滿人，環境其實有少少逼。都無辦法啦，知道香港地租金貴，理解餐廳嘅難處。

事前上網睇過餐廳嘅資料，喺以招牌石頭丼（即喺韓式嘅石頭鍋飯），以及手打牛肉漢堡為主打。但翻一轉餐牌，又估佢唔到有咁出選擇，例如前茶、石板燒、壽司、小卷、撈丁、拉麵、烏冬、小菜、飯卷、鐵板漢堡扒、蛋蛋香石鍋飯……等等，飲品仲有汽水、生啤及特飲。

此外，仲有一系列晚餐，共14款選擇，種類繁多，每款茶式都包基本熱飲，當然可以加錢轉其他。不過，右下角寫明只限星期至四供應，另外，仲需加一服務費，仲諗住呢類細細哋「食堂」通常唔收加一添。

晌餐牌裡面，更有標註住手打新鮮牛肉漢堡扒都喺每日由師傅準備，咁就當然要試手打漢堡啦。

車打芝士流心蛋手打牛肉石鍋丼 $60

既然石鍋丼及手打牛肉喺亮點，呢一道「車打芝士流心蛋手打牛肉石窩丼」可謂喺不二之選。由於喺以韓式石頭鍋飯為基礎，所以，飯嘅四周伴有韓式泡菜、紫菜、青瓜絲、粟米粒，再搵埋塊車打芝士跟啲飯撈勻食，非常好食；所謂流心蛋就只喺好似我哋港式嘅窩蛋牛飯咁打隻生蛋而已，無咩驚喜，不過，件手打牛肉漢堡果然有料到，好鬆化，有肉香，又極富肉汁，掂喎！食到尾，仲有少少飯焦架。

鮮打香蕉奶 +$22

正價＄32，但點石鍋丼就可以有特飲減$10優惠，初時都諗，食住石鍋飯，好唔好叫杯梳打呢？不過，大多數啲梳打都喺糖漿溝梳打水，諗諗吓都喺香蕉奶實在啲，反相，只喺相差幾蚊。杯香蕉奶跟飲奶昔差唔多，口感綿密，蕉味濃郁，不過，就唔太喜歡唧太多忌廉上面，雖然令賣相好睇，但一則肥膩咗，二則令香蕉奶整體口感沖薄咗。

火炙什錦半熟海鮮丼 $88

表姨甥女最初都想過跟我食石鍋飯，不過，見有海鮮丼，就更想試試，反正晌晚餐餐牌中就有一款啱佢心水，因為喺半熟形式，唔喺全生，可以食得更放縱。睇賣相，有鮮蝦、左口魚、三文魚腩、鰻魚、玉子及飛魚籽，十分豐富，所謂半熟，喺將魚生火炙過，而左口魚燒一燒過之後，魚油滲進飯內，極之油香，飯粒更跟石鍋丼唔喺同一種米，喺用番珍珠米，其餘嘅餸料亦唔錯，表姨甥女甚滿意。

奶茶紅豆冰 +$13

佢簡單兩個字總結杯紅豆冰：好飲，佢話奶茶估唔到唔差得過茶記，茶底香滑，最正喺無冰吖嘛，唔會越飲越淡，底下嘅紅豆又夠晒清甜、仲有少少起沙。不過，一樣唔太鍾意抹忌廉，話打勻之後令奶茶喺就喺滑咗，但同時沖淡咗啲茶味。

兩道主食都有驚喜，定價亦親民，唔知會唔會成為附近街坊嘅食堂小店，但當晚所見，就確喺唔少人幫襯。

個人評分
味道：8/10
環境：6/10
服務：7/10
抵食：8/10
平均每人消費：HK$101

餐廳資料：
布萊恩．L食堂 Bryan L Kitchen
長沙灣元州街498號青華閣地下I號舖
5225 4332