魚籽煙燻蛋 $88
冷盤嚟講，呢款煙燻蛋喺小弟推介俾朋友嘅必然之選，魚籽煙燻蛋賣$22 / 隻，次次嚟食都無失望，今次再試，亦喺保持水準。凝香嘅蛋黃入口綿綿滑滑，蛋香濃郁，又有淡淡煙燻味；加入脆卜卜嘅黑魚籽，增加層次感，更因色差嘅對比令賣相更好睇。
無錫脆鱔 $102
因為今次人多，就唔點拼盤，揀幾款特色冷盤俾大家試，脆鱔喺其一。咪睇佢外觀黑掹掹，又似為好似平常啲鱔肉咁軟腍腍，一咬就知幾咁脆卜卜，加上掛滿糖醋汁，酸香沉實，喺上佳嘅開胃冷菜。
醉乳鴿 $102
大家話醉雞食得多，醉鴿就未試過，所以，特登叫一客俾大家過吓口癮。一客嘅份量唔少，總次就夠大家都試到，入口感覺好爽，肉質細嫩，滲出微微酒香，好食。
336上海小籠包 $38 x 2
啲冷盤叫嚟喺邊等邊食，齊人就再上啲熱辣辣點心。小籠包嘅好壞，就睇得出店子嘅水準，呢度嘅小籠包搓得外皮夠薄，肉饀鬆化富肉汁，水準依然。
蔥花家常薄餅 $58
有人提議點呢個，當然好啦，即叫即做，送上枱時熱辣辣。家常薄餅比起常見嘅蔥油餅薄身，咬落好酥香，口感帶點柔韌，餅內混入唔少蔥花，陣陣蔥香。
松子黃魚 $182
河鮮、海鮮類就揀咗松子黃魚，一來賣相靚，做法考到師傅，二來抵食嘛。橙紅嘅甜酸茨汁做得啱啱好，唔會太厚身杰撻撻，甜酸味又恰到好處，而魚肉外皮先喺酥脆，裡面則仍然 好柔嫩。
松仁糯香牛肉粒 $88
呢道菜嘅食材無咩話好特別，但勝在湊埋一齊卻喺有啲驚喜。牛肉粒一貫滬式濃酒赤醬嘅炒法，特別在於加入松子仁及上海年糕粒同炒，惹味之上，多咗唔同嘅口感。
樟茶鴨 $128
無食北京填鴨咁多花臣，簡單只喺配荷葉餅減減膩。啲荷葉餅非常軟熟，夾住片片鴨肉，肉質軟腍，酥香而有咬口，味道有層次。
黃金四季豆 $76
照常態，喺要點啲蔬菜嚟平衡吓，但估唔到大家都喺寧揀味道，而犧牲健康，皆因相中近排大熱嘅「黃金」菜式，將膽固醇拋諸腦後。四季豆炒嚟唔會太過腍，但又唔好好生，而包住一層鹹蛋黃蓉，自然惹味度飛升。
醬燒茄子 $68
另一道蔬菜菜式，亦揀咗較具滬菜風味嘅醬燒茄子，濃香嘅醬汁，每茄子更惹味，淨食都喺覺得有啲濃，配白飯就恰到好處，所以，就加一道炒年糕。
雪菜炒年糕 $78
炒年糕有好幾款，最後揀款較為清啲嘅雪菜炒，年糕柔韌有咬口，帶鹹鹹哋嘅雪菜味，其實，配合番啲四季豆、茄子，味道都好夾。
香蕉高力豆沙 $52 / 4件
最後以甜點作結喺附合公眾期望，本嚟高力豆沙喺一客4件，但可以額外加點嘅，多一個就額外俾多$15。個個做得漲卜卜又大個，外層灑滿糖霜，食落麵糰極之軟綿，內裡夾雜香蕉與豆沙，綿滑滋味。
餐廳位晌尖沙咀站之上，打風落雨都唔怕，又方便到所有人，而且，環境唔錯，服務又熨貼。雖然每道菜嘅份量有少少偏細，但計番價錢以呢區計都好合理，最緊要選擇多，做得有水準嘛，所以，好幾次大局飯聚都揀呢度。
個人評分
味道：8/10
環境：8/10
服務：8/10
抵食：8/10
平均每人消費：HK$150
味道：8/10
環境：8/10
服務：8/10
抵食：8/10
平均每人消費：HK$150
餐廳資料：
上海婆婆336 Shanghai Po Po 336
尖沙咀彌敦道63號iSQUARE國際廣場6樓605-606號舖
2806 1833
上海婆婆336 Shanghai Po Po 336
尖沙咀彌敦道63號iSQUARE國際廣場6樓605-606號舖
2806 1833
沒有留言:
發佈留言