城大中菜廳 City Chinese Restaurant：一城不變

好耐無嚟過「城軒」，唔喺，喺「城大中菜廳」，因為十年八年前間唔時會晌星期日嚟飲茶。原來，呢年啱啱轉咗手，仲改名為「城大中菜廳」，以示佢喺城大所屬。是日，因嚟到城大參觀一啲義工服務，午餐就嚟到呢度飲茶、食點心。

星期六嘅午市都幾多客，算喺坐滿，晌用餐期間亦見到有翻枱，相信「城大」個價位點都平過對面又一城任何一家中菜館啦。至於整體嘅環境，裝修屬於平實型，完全見唔到有咩浮誇嘅裝飾。因為一切已安排好晒，所以，都喺坐低食食食。

原隻鮮蝦腸

啲腸粉皮都拉得幾薄，薄透睇到啲大蝦，但入口就唔算好滑溜，不過，啲蝦就又大又爽又鮮甜。

雪山叉燒包

無論傳統嘅叉燒包，還是叉燒餐包，甚至雪山叉燒包，我都鍾意食。眼前嘅雪山叉燒包焗得都幾香，入口鬆軟，叉燒餡都約香濃。

鮮蝦菜苗餃

菜苗餃摺得幾靚仔，造型工整，而啲餃皮夠薄透，軟熟唔黏牙；鮮蝦與菜苗嘅比例恰好，入口既有鮮蝦嘅爽甜，但又有菜苗嘅清香。

流沙奶皇包

自從有「流沙」呢樣嘢，經常成為我嘅心水，流沙奶黃真喺又香又好食，熱辣辣時嗰陣鹹香味，真喺一流。可惜，包身我就覺得有啲厚身。

蟹籽燒賣皇

通常話蝦餃皇就用啲又大又鮮嘅靚蝦做賣點，但叫燒賣皇就一直理解唔到會有咩亮籽，加蟹籽更非新鮮事物。不過，啲燒賣內嘅豬肉打得鬆化，有少少彈牙感。

蒜香蝦春卷

蒜香就唔算好強，但炸得脆而不膩，配鮮蝦，咁就梗喺好食啦。

千層馬拉糕

馬拉糕色澤就淡身啲，欠缺一啲蔗糖或黑糖嘅清甜香味，但質感則蒸得軟綿，口感綿密，唔會一陣風咁。

濃湯灼菜心

灼菜心只要啲菜心靚，唔好老，基本上都無乜點衰。你見啲菜心都好嫩綠，咬落亦唔會一口渣。

海鮮福建炒飯

個飯睇樣都覺得抵食，因為勁多料，鮮蝦好爽彈，茨汁調得啱啱好，唔會太「漿糊」，加上飯底炒得爽身，整體確喺不俗。

由於今日都喺作客，當然唔方便影得太張揚，只喺快攝一下，所以，整體嚟講點心都無影晒，費事影響人哋用餐。故輕鬆寫今篇食評，都無點影啲點心紙，都標唔到價錢俾大家參考，只喺當喺留個記錄而已。對比起以前「城軒」，呢度感覺好似無乜點變過，有啲一成不變嘅感覺，點心都喺較傳統、大路，唔會有咩驚喜，質素屬中規中矩嗰種，服務就，基本咁啦。

個人評分
味道：7/10
環境：7/10
服務：7/10
抵食：7/10
平均每人消費：HK$100

餐廳資料：
城大中菜廳 City Chinese Restaurant
九龍塘達之路香港城市大學康樂樓8樓
3442 8163