餐廳名用上「花園」一詞，預期到環境喺走田園風。的確，由店名、餐枱墊、牆上嘅植物裝飾、餐枱上嘅小盆栽，都洋溢出一份田園氣息。加上一室潔白，灰白雲石餐枱，兩邊窗又採光十足（喺欠缺啲陽光），令人感覺舒適醒神。
另一邊喺吧枱，更放咗幾張高腳櫈，大抵因為午市應該無咩客嚟淺酌，所以，侍應都索性將餐具呀、調料呀、枱墊紙呀……等等暫放上去，方便取用。
外面仲有個露台小花園，可遠觀到「戲曲中心」，又擺放咗好多植物，感覺唔錯，不過，就未有設置露天位。其實，今日涼涼哋，又唔太曬，都幾適合坐出面，可是，樓下就喺繁忙嘅柯士甸道，日頭會覺得有少少嘈雜。
順帶一提，除免費wifi之外，仲有免費手機充電，當然，依家嘅手機電非常耐用，不少高用量嘅人亦會自備「尿袋」，但總有時候喺有突發嘅。
午市主要供應3道菜嘅套餐，包餐湯、沙律及主菜，視乎所揀嘅主菜嚟定價，由$88-$248，豐儉由人。而加$28可以配餐飲或是日甜品，若加$38就可以兩者兼得。
可能位女侍應見我乜都影一餐，所以，就俾埋個散點餐牌我睇睇，仲推介吓當中嘅特色菜。一大張過印晒所有菜式，包括前菜、湯品、小食及主菜，每個類別都唔多，屬貴精不貴多類型。餐牌設計簡約，加少少彩繪插圖，望落去有份小清新嘅感覺。
此外，原來佢哋都有賣凍海鮮，以不同海鮮種類組合出4款海鮮拼盤，定價為$228、$248、$278、$398，睇落幾抵食吓。就以最平嘅$228為例，已經有6隻生蠔、4安士青口、兩隻馬刀貝、兩隻黃金螺、兩隻鮑魚。
綠茶小圓包
講咗咁多，喺時間開飯喇！隨着餐湯，送嚟一小籃綠茶小圓包，無論外觀，抑或口感，都有啲似港式嘅細麥，包身軟熟而帶點點綠茶甘香，裡面仲混有小小提子乾，仲唔喺細麥嘅綠茶版！
甘筍湯
請留意，喺甘筍湯，唔喺甘筍忌廉湯，湯色鮮橙紅而自然，入口甘筍味突出，質感滑溜而仲帶有甘筍嘅微微粒，可以講喺柔滑中又有點粗糙感，難得喺無加薑汁元素，卻又唔會有甘筍嗰陣「青」味。事後再跟侍應確認過，喺完全無加入忌廉，所以，非常健康，老婆勁欣賞。
吉列魷魚沙律
是日嘅廚師推介沙律喺酥炸吉列魷魚配沙律菜，雖然只喺簡單嘅兩樣食材，但都無迤做。啲魷魚炸得酥脆金香，一啲都唔油膩，柔韌有咬口，細節位喺以芥末沙律醬晌碟邊抹成一扇，既有裝飾之用，亦可以佐以魷魚；而沙律菜已淋上油醋，酸香鮮爽，更平衡番魷魚嘅熱氣感，自我感覺更良好。
香草烤焗原條金目鱸魚 $128
原條金目鱸魚睇落唔喺好大條，但烤得表皮焦香，配以薯菜、檸檬角，賣相清爽而吸引。
先試試鱸魚，鱸魚下面仲墊有一齊焗嘅檸檬片，再唧多少少檸汁落去，所以，入口魚肉有陣陣香草及檸檬清香，而且，肉質細緻嫩滑，好有魚鮮味，之但喺魚皮已經被醬汁浸透，並未有預期嘅「脆卜卜」。伴菜就唔喺用薯蓉，取而代之喺原個新薯，口感截然不同，爽爽哋，帶少少鹹香。
燴紐西蘭羊後膝伴香草薯蓉 $128
件後膝堅大件，成個大鎚咁，墊底喺香草薯蓉，仲伴有唔少車厘茄、西蘭花、椰菜花，非常夠份量。
篤落啲羊膝，已感受到嗰份鬆化，真喺連刀都唔使用，輕易挑出羊肉，入口軟腍到不得了，羊羶味濃郁卻唔霸道，我老婆都話OK；啲時蔬固然清新好食，更喺處理過，唔會淡而無味，又無過腍，不過，薯蓉就做得更出色，好有薯香，質感好似食緊雪糕咁。整道羊後膝，我哋兩個都認為無咩挑剔位。
提拉米蘇
賣相精簡，只喺伴以一小粒士多啤梨，再畫點朱古力線。無論芝士部份，抑或手指餅部份，都做得有水準，前者好輕柔軟滑，淡淡芝士香，後者則濕潤有咖啡味，只喺個人覺得欠酒香。但我發覺依家唔少餐廳，都做無酒精版嘅提拉米蘇，以便小朋友都食到，不過，我就覺得唔夠傳神啫。
鮮奶咖啡
餐飲揀鮮奶咖啡、意大利泡沫咖啡之類，都唔使額外再補錢。雖然唔喺咖啡店，但杯鮮奶咖啡都算有心機做，至少唔喺咖啡機嘅出品，當然，撞奶泡嘅手勢明顯睇到未到家，不過，單講味道都唔算差，順滑而醇香，窩心喺伴多一小件果仁曲奇，亦為杯咖啡拉番少少分。
雖然只喺簡單嘅午餐，但已食得出廚師做菜嘅心機，用料不賴之餘，亦有好嘅食材配搭。環境清靜、舒服，侍應嘅服務亦好到位，尤其位女侍應，幾醒目，故此，好值得推介俾朋友嚟試。
個人評分
味道：9/10
環境：8/10
服務：8/10
抵食：8/10
平均每人消費：HK$165
味道：9/10
環境：8/10
服務：8/10
抵食：8/10
平均每人消費：HK$165
餐廳資料：
Chelsea Garden & Restaurant
佐敦柯士甸道7號UQ Place 4樓
3974 0822
Chelsea Garden & Restaurant
佐敦柯士甸道7號UQ Place 4樓
3974 0822
沒有留言:
發佈留言