AT Bistro：食廈小清新

月初先同舊同學一齊晌中環聚一聚過食晏，估唔到，約咗好耐卒之成事之下，今日又同另外幾個舊同學食晏。同學嘅指令，想搵啲100蚊左右，地方舒服好坐吓，方便傾吓偈嘅餐廳，卒之搵到間食廈餐廳「AT Bistro」，午市都有得訂位添。

餐廳位處中環威靈頓街The Loop 13樓，成幢商廈開有唔少餐廳，雖然門口細細，但裡面呈一字長形，個鋪位好深，一室以白色為主調，淺啡木地板，裝修簡約，加少少別緻嘅裝飾擺設，環境算唔錯，確喺有種小館格局，予人感覺清新，1:00pm高峰時段真喺全場爆滿。

午市就當然喺套餐主打，雖然餐廳以法文「Bistro」定位，但菜式就不拘一國。午餐一共有成15款之多，同時處理咁多款，有啲擔心出品嘅質素。而種類方面，有意粉、漢堡、扒類、薄餅……等等，更有一系列東南亞系列嘅選擇，並已包餐湯或沙律，以及餐飲，定價都喺$68-$128。

餐飲唔單止可以揀啡茶、檸水之類，有啲花果茶亦唔使補錢，當然，你都可以額外加錢轉特飲，如梳打、牛奶咖啡……等等。

此外，加$25可配是日精選甜品，如果覺得唔啱口味，佢哋都仲有其他甜品供選擇，如法式焦糖燉蛋、柚子芝士餅……等等。

椰菜花野菌忌廉湯

先嚟一小碗餐湯，以椰菜花打成，椰菜花本身個味唔強，野菌亦唔喺重點，所以，碗餐湯味道唔算好突出，幸而唔太稀，又唔太杰身，叫做不過不失。

煙鴨胸沙律

同學就揀沙律，由於既無試，亦無問佢覺得點，就唔評論碟嘢，不過，細細碟沙律，俾成4片鴨胸，算大手筆架。

鮮蝦菠菜鮮茄醬燴意粉 $78

睇落似模似樣喎，黐咗同學少少意粉嚟食，啲意粉確喺唔錯，有咬口，煮得恰到好處；除菠菜，仲混有唔少白菌，蕃薯醬亦做得酸香；至於啲大蝦，大大隻，入口爽彈且有鮮味，整體嚟講，喺有水準。

香煎豬扒配微辣黑椒汁 $88

小弟就揀咗香煎豬扒，配季節蔬菜，就跟白飯。豬扒睇落大塊，不過，其實就幾薄身，但令外觀有啲睇頭，呃到吓個印象分架。豬扒煎得帶點焦香，其實肉質唔算好鬆化，但因為薄身嘅關係，入口都唔會有韌嘅感覺，反而好鍾意佢個黑椒汁，香得嚟微微辣勁，唔會太嗆喉。

澳洲和牛竹炭漢堡跟脆香炸脆條 $128

漢堡以薄餅木板盤上枱，已配有炸薯條、茄醬及特色酸瓜沙律醬，賣相精緻。而漢堡就無話好似啲漢堡專門店咁，以巨型為賣點，採用竹炭做包，以為以澳洲和牛先喺亮點。包身好鬆軟，當然唔會食到有炭味，只喺更健康，但啲和牛就真喺確不同，鬆軟富肉汁，既有油香，又有濃濃肉香。

台式咖啡、珍珠奶茶 +$8

小弟就嘆吓咖啡，台式咖啡，感覺味道偏淡少少，味道還可以。而其中一位同學揀珍珠奶茶，如果餐飲轉台式奶茶喺唔使補錢，但加珍珠就要加多$8，佢話味道唔錯喎，珍珠有咬口。

熱檸茶

佢哋啲飲品普遍都屬於大杯啲，好似另一位同學，簡單嘅熱檸茶，都比一般茶記多，再者，同學話佢哋嘅茶底唔錯。

雖然食物嘅質素唔喺好高質，又唔叫得差，至少感覺都無迤做。你知啦，中環搵食真喺唔易，周圍都咁多人，舒服好坐，食物唔錯，價錢又唔太貴嘅，又唔會人多等位而被叫埋單，真喺好少中環餐廳可以咁架。睇資料，餐廳所處13樓呢個鋪位，前前後後轉過唔少手，新開無耐嘅「AT Bistro」唔知韌力如何！

個人評分
味道：7/10
環境：7/10
服務：7/10
抵食：8/10
平均每人消費：HK$97

餐廳資料：
AT Bistro
中環威靈頓街33號The Loop 13樓
2521 9191