菓甜品 Good Desserts：菓真如此

因為早前睇過啲飲食雜誌介紹過呢間創意甜品店「菓甜品」，當中一款甜點「芝士粟一燒」勁搞嘢，像真度高之餘，再睇番啲人嘅食評，大部分人都有讚無彈，值搏率高。故此，同朋友喺附近食完飯，就順路過嚟探個虛實。

鋪面窄窄，加上鋪前嘅凍櫃乜都無，霎眼望落去欠缺吸引度，好易過門而不入。呢方面我就覺得要執執佢，因為，鋪面放啲吸引嘅甜點，肯定有招徠嘅作用。雖然，有擺放個易拉架，但呢啲喺應該放晌街口嘅。

咪睇鋪面細細，走入內，都幾深吓，一室以白色為主調，潔淨明亮，牆上配以不同立體掛飾，簡約別緻。一邊喺用餐區，另一邊就喺開放式廚房，概略都可以睇到年輕嘅師傅製作各式甜點。

每枱枱上都放有一瓶乾花作點綴，都喺走一種小清新嘅路線。題外話，佢哋唔會主動提供清水，但有需要嘅話，亦都可以向店員要求。其實，我覺得索性放晌櫃枱，等客人自由取用仲方便。

餐牌印刷得幾靚仔，圖文並茂有晒「樣辦」做參考，而逐頁睇睇，頭幾版喺多款創意甜點，實屬打卡之選，之後幾版分咗類別為即焗窩夫系列、Mövenpick 雪糕新地系列、自家製傳統糖水系列。除咗甜點，仲有啲特飲及花茶供應，所以，唔好甜品嘅，嚟飲吓嘢都OK。

芝士粟一燒 $58

為佢而嚟，喺目標嘅必點甜品，不過，遇上佢唔喺必然，因為製作較繁複，所以每日限量供應，加上又喺店內人氣招牌，一早賣晒真喺常事。我哋算嚟得早啩，有幸試到呢條「粟米」。

招牌即喺招牌，樣真度極高，如果唔喺有啲裝飾，單單揸住佢，肯定都以為喺條真粟米，因為啲粟米粒做得好細緻，切開佢，粟米芯都有埋架。最抵死喺面面嘅忌廉芝士扮牛油，每個細節位都好認真。

既然做成粟米樣，就唔可以得個樣，入口黃色部份喺粟米味慕絲，堅濃郁粟米味，又帶少少蜜糖香，形神俱似，真喺好得；而白色部份（連埋消化餅底）喺傳統嘅維約芝士餅，做得夠挺且芝士味濃；配上香脆嘅爆谷或粟米片，都好有風味。

意式黑松露咖啡奶凍 $54

黑松露、咖啡都喺小弟嘅「飛弗」，喺估唔到同一時間出現晌一道甜點之上，呢款奶凍俾人有種好嶄新嘅組合。雖然只喺一道簡單意式奶凍，但賣相絕對唔迤，伴碟有蛋白做嘅草菇，咖啡味嘅馬卡龍，仲有奧利奧朱古力餅碎及脫水紅莓乾。

放一小口奶凍入口，先喺一陣陣黑松露香味，之後再滲出醇香嘅咖啡味，而口感柔滑唔削身，出奇地無違和感，真喺做得唔錯呀！馬卡龍估計都喺來貨多，但所選嘅質素都唔差，面面脆口，咬落去煙煙韌韌，且喺少甜版本。

香蕉太妃 $55

香蕉、拖肥類甜點又喺好啱我，呢道由經典嘅香蕉拖肥批一個華麗轉身化成為「太妃」新形象，賣相頗吸引吓，批殼換上拿破崙酥皮條，混入香蕉肉、拖肥醬、忌廉，既有創意，又有賣點。

先處決掉面層嘅酥皮條及香蕉肉，前者烘得酥脆香口，後者加咗少少沙糖並以火槍燒過，做成焦糖，令件香蕉肉更香甜。一羹插到底中，試試同時幾樣食材入口嘅滋味，集香濃、軟滑、酥脆於一身。話時話，點解叫「太妃」？同個外觀靚唔靚無關，做開甜品嘅人都可能知，焦糖醬呀、焦糖牛奶醬呀、拖肥醬呀，有個別名叫：太妃醬，其實源於「拖肥」一詞所取嘅諧音喔！

睇過嗰篇雜誌專訪，原來店主開店初期都遇過大難題，幸好得愛做甜品嘅舊同學相助。依家做飲食本身已經唔容易，而甜品生意更有時間性，每日唔會任可時段都咁多人幫襯，況者，尖沙咀區本身亦有唔少甜品鋪，競爭非常劇烈，但願小店能保持出品之餘，繼續發揮創意，有水準就自然開花結「菓」！

個人評分
味道：8/10
環境：8/10
服務：7/10
抵食：8/10
平均每人消費：HK$55

餐廳資料：
菓甜品 Good Desserts
尖沙咀寶勒巷3號萬事昌廣場地下2-3及5號舖
3590 2088