山區裡的走走趯趯: 品越越式料理 La'taste Vietnamese Cuisine：喜越午飯

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2018年11月5日星期一

品越越式料理 La'taste Vietnamese Cuisine：喜越午飯

又喺一次舊同學午聚，約埋簡單食餐晏，由小弟發辦。其實，我都幾怕晌中環搵地方食晏，因為周圍都喺人，小弟公司有包伙食，所以，平日喺無呢啲煩惱。但既然同學開到聲，就由小弟早少少蛇出去攞位，今日就一齊食吓越南菜，之前到訪過「品越」（旺角店），知道質素去到邊，故此，嚟到中環店，都有信心令同學食得滿意。

唔喺講笑，平日午市真喺好多人，一枱起身，又有一枱客入座，基本喺座無虛席。所以，就算嚟食晏，等位都唔使得好耐，除非你一棚人啫。雖然餐廳喺賣越南菜，但裝修簡約摩登，靠窗一邊嘅梳化卡位，喺最心水嘅好位。

食午餐都喺講求快，所以，主打就喺午餐餐牌啦，午市一共有13款選擇，定價都喺$68-$94，包普通熱飲1杯，亦可以加錢轉其他特飲。整份餐牌印刷精美，更喺圖文並茂有個參考。

此外，仲有一個小食餐牌，主食以外，睇睇有無嘢啱。其實，亦可以嗌散點餐牌嘅嘢，不過，由於要額外嚟做，所以，講到明要等多陣。

餐具、紙巾及調味料已放晒晌餐枱上，自由取用，除魚露，仲有是拉差隻辣椒醬，可惜，小弟唔多喜歡辣醬，無福消受，哈哈！

魷魚藕苗沙律 $88

曾經年幾前晌旺角店試過，覺得頗特別，所以，專登介紹俾同學試。藕苗即喺未長到大嘅蓮藕，配以甘筍絲、青瓜絲，淋上酸酸辣辣嘅醬汁，所以，食起嚟好醒神，而啲藕苗口感爽脆，喺種幾特色嘅食材；啲魷魚就柔韌鮮甜，唔會好似擦紙膠咁咬極都咬唔開。

燒大虎蝦米紙卷 $72

米紙卷喺越南嘅特色小食，食親越南嘢，好多時都會試吓。一份米紙卷裁成6大件，米紙薄透，口感煙韌清爽，內裡塞滿虎蝦肉、米粉、青瓜、生菜，包得夠紮實，唔會散開嚟，沾少少魚露提一提味，口感清爽，食味不俗，燒大虎亦夠彈牙。

品越皇牌湯河 $78

因為餸料包括有生牛肉、牛展、牛腩、雞絲，又夠晒大堆頭，放上唔少金不換，所以，頗有「火車頭」嘅影子，仲伴有青檸及辣椒碎，不妨拌入湯中，味道會起出變化。不過，講到個湯底，濃而不濁，非常有牛骨香，而且，河粉嘅份量十分足，前前後後都分都4碗仔，最正喺滑溜有米香嘛；至於啲餸料，老友就話好得，尤其啲生牛肉及牛腩，極有肉香，食得出喺靚貨，牛腩更喺牛坑腩嗰位，帶少少油脂香，我亦覺得啲牛展炆得軟腍，而雞絲頗嫩滑。

馬拉盞海鮮炒金邊粉 $88

咁多款午餐中，最想試喺佢，一來用上馬拉盞，夠惹味，二來炒金邊粉，湯嘅食得多，炒嘅比較少，況且，炒粉一向易做難精。金邊粉比河粉更幼身，帶點韌性，炒出嚟嘅效果唔錯，唔會黐埋一嚿嚿，食到尾又唔喺好油，加上馬拉盞嘅鹹香，再唧少少青檸汁，令味道唔單一；海鮮就只有鮮蝦、魷魚及迷你帶子粒，款式唔多，但勝在仍具質素，好似啲鮮蝦咁，去晒殼，一咬就喺爽彈嘅蝦肉。