山區裡的走走趯趯: Mamaday：晌呢度迤迤哋食咗餐一啲都唔麻麻哋嘅晚飯咁囉

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2018年11月22日星期四

Mamaday：晌呢度迤迤哋食咗餐一啲都唔麻麻哋嘅晚飯咁囉

之前睇飲食雜誌，知道粉嶺開咗間賣港式嘢嘅「好難食」，當然，個名改成咁都喺卓頭嚟，反而吸引到啲人去試吓有幾難食。最近，又喺晌雜誌見到一間店名勁搞嘢嘅餐廳「Mamaday」（麻麻哋），位處「鵝頸橋」附近，近近哋就睇吓佢哋啲嘢有幾麻麻哋先！

我哋喺行樓梯上，因為只喺一層樓嘛。由後樓梯已見到玩味十足、大玩食字嘅畫報創作。不過，佢哋嘅鋪面就真喺令人唔易肯定有無搵錯，因為，店名無明顯擺出嚟。

都未講到食，呢度嘅環境確喺打卡亮點，色彩繽紛嘅名人壁畫，加上甚有喻意、又似有哲理嘅標語，絕對喺借題發揮、卻又言之有物嘅設計。此外，環境佈置得似外國啲小型俱樂部，五顏六色嘅木椅令環境充滿活力。

再入啲，有另一個用餐區，可能喺靠窗嘅關係，雖然唔喺露天，但格局就有少少似文青花園，野餐木格配藤背椅，如果日頭嚟，相信感覺更強烈。

我哋被安排晌窗邊位，雖然唔喺咩靚景，只喺鵝頸橋橋底一處嘅街景，但勝在感覺開揚。

除咗啲環境佈置，仲有唔少趣緻嘅裝飾、擺設，如得意嘅公仔、IQ博士裡面嘅宇宙大魔王，成日掗掗拃拃咁，我仲記得喺「炳門」（譚炳文）做配音添。

此外，枱上仲擺咗個蝙蝠俠公仔，雖然我喺佢「粉絲」，但都鍾意睇蝙蝠俠嘅電影。

既然處處都咁搞嘢，當餐餐碟、餐牌都唔放過啦，「事頭婆」都一樣照攞嚟玩。

枝豆

真喺好少食西餐會送啲餐前小食，一小兜枝豆雖然唔喺咩錢，但表達咗一份心意，啲枝豆仲有落少少橄油及鹽調味添。

餐牌製作都好得意，加插好多BB相，分類大致為碳水化合物、小食、比薩、沙拉、咖啡、酒類。

不過，講到玩嘢，菜式名嘅設計就超鬼衇，口語化之餘，更加入不少流行用語，如「炒你魷魚墨汁蝦籽麵」、「真心無驚喜黑松露意大利扁麵」、「平凡到無得再平凡嘅炸洋蔥圈」、「吓咁架喳心太軟」…… 等等，霎眼望落去真喺唔知咩嚟，睇落好似自貶，查實叫人會心微笑。結果，我哋都喺「求求其其」隨意亂嗌啲嘢咁啦，哈哈！

隨便乜都炸啲啦 $89

雖然喺咁講，但絕對唔喺隨便乜都炸啲嘢嚟，包括有魷魚圈、薯條、炸蝦及洋蔥圈，佐以茄醬及沙律醬，而且，份小食拼盤頗大份呀，夠晒4個人享用。炸嘢一向都受人歡迎，夠香口嘛，幾樣嘢都炸得好脆口，亦唔覺油膩，外層嘅炸漿都唔算厚，魷魚口感有柔勁，卻唔會好韌，洋蔥圈亦好爽，算交足貨，絕對無俹簁。反而，只喺普通嘅沙律醬就顯得有點失色，大可加點酸青瓜或銀魚柳嚟調校個醬。

可能會失望溫泉蛋明太子意大利扁麵 $94

帶有濃厚和風嘅意大利扁麵，睇外觀都睇到落咗勁多嘅明太子，而且，糝咗好多木魚碎，直頭好似唔使錢起勢咁落，令賣相更吸引。溫泉蛋晌啲木魚碎之下，但四周就有好多蟹柳，最緊要啲蟹柳唔喺得嚿粉嗰隻質素嘛，篤開隻溫泉蛋再跟扁麵撈勻，啲扁麵煮得啱啱好，有咬口，帶微辣嘅明太子滲出鹹香感，配襯埋啲蛋漿、木魚碎，味道確喺富層次。

唔好抱咁大期望蒲燒鰻魚蛋包飯 $112（+$28）

呢個價錢喺半條鰻魚嘅份量，可以加多$28要全條，咁先夠睇頭吖嘛。雖然依家啲蛋包飯都好少喺「全包」，但只喺冚上面，但啲蛋睇落炒得好滑身，入口果然好滑溜，炒飯底亦飯粒分明，同樣喺四周糝滿木魚碎，有提味之用。咁啲鰻魚得唔得先？啲鰻魚頗嫩滑，且肥美富油香，而啲蒲燒汁亦香濃惹味，叫你「唔好抱咁大期望」，正正等你有份小驚喜。