餐廳就位處4樓花園側，唔知喺新開，定因為喺精米關係，都只喺閒日晚啫，都已經好多人晌門口等位。不過，由於餐廳原來都好大吓，所以，排得唔算耐就好快有位。裡面分幾個區域，而且，有唔少卡位，卡位嘅間板亦專登做高少少，唔會受前後側邊嘅客人騷擾，有少量卡位對正平台花園，更喺心水靚位，不過，今次就無我份。
此外，分開幾個專區：串燒、鐵板燒、壽司吧，特設一列吧位，可以直接睇到師傅做菜，亦喺小弟覺得次選嘅心水位。
而整家餐廳，一派木系和風裝修，亦掛有唔少相關裝飾，不過，呢晚人太多，所以，就無周圍影。
上文提過「當店精米」，相信都唔喺流，因為晌等位期間，就喺門口接待位旁嘅玻璃房，就放置咗一部循環型精米機。
咁！其實咩叫「精米」呢？打開餐牌就揭開謎底：「精米」就喺將米糠從粗硬嘅玄米表面輾走，再打磨成口感軟熟白米嘅工序，日本人相信剛完成「精米」過程嘅白米喺最好食。又研究發現，去除米糠之後，白米嘅水份、香氣、味道都會隨著接觸空氣而慢慢流失，故此，就有「當店精米」嘅出現。
所謂「工欲善其事，必先利其器」，精米機就有喇，都要有靚米配合。「丸十」就講到佢哋會晌日本唔同地方，如北海道、新潟縣、宮城縣、山形縣等地搜羅靚米，務求做到「精」益求精。
咁就順便講講食物有啲咩選擇，睇上面你都大概知道少少，其實，晌度真喺有好多嘢食，包括：沙律、煙燻系列、前菜、壽司漢堡、刺身盛、創意卷物、串燒、燒物、鐵板燒、揚物、天婦羅、食事、丼……等等，真喺數吓數吓過百款。
仲有另一個餐牌，喺甜品及飲品，前者主打喺芭菲，並有少少雪糕類，而後者有多款特飲，睇嚟都頗有特色。
然而，坐低無耐，侍應會先拎壺熱水俾你，因為，枱上已備有綠茶粉，泡濃泡淡，都可以由自己揸主意。更備有醬油及七味粉，自由取用。
一切都準備就緒，開飯喇。由於呢度賣點喺「當店精米」，所以，我哋所點嘅菜式，都刻意揀多啲以米飯做嘅菜式。
丸十彩虹卷 $98
個名好似好勁，睇相亦都吸引，雖然唔喺做到7色，但以牛油果、三文魚、油甘魚、吞拿魚做成，外觀嘅色彩都算夠繽紛，點下少少黑魚籽及金鉑，賣相已經加分。
而啲魚生無論喺三文魚、油甘魚，抑或吞拿魚，都鮮味十足，用料不賴，卷內仲捲有青瓜絲及蟹柳，令口感更富層次，食落增加幾分清爽，飯粒黏糯有米香，確喺幾得。
海の櫻花卷 $88
喺餐廳嘅新品，其實我有個疑問，「丸十」都喺啱啱開無耐，以餐廳以言，其實樣樣都喺「新」品，明顯喺一種宣傳技巧。
反卷捲住新鮮嘅帆立貝，厚肉鮮甜，而面面灑滿櫻花蝦，咬落脆卜卜，不過，就唔喺太喜歡嗰啲粉紅色好似糖嘅粒嘅嘢，甜甜鹹鹹咁，有少少口夾，落少少無妨，太多就唔喺幾好。
松葉蟹肉壽漢堡 $98
我見唔少人點牛油果三文魚壽司漢堡，但呢一款松葉蟹肉壽漢堡就更我心水，因為唔喺自己郁手拆蟹，就啖啖蟹肉入口。賣相確喺有種先聲奪人嘅感覺，米漢堡煎得焦香，中間夾有少少生菜、芝士，就塞滿松葉蟹肉，絕無欺場，如果伴碟加幾條炸蕃薯條就更好。
以煎香嘅米飯代替麵包，其實唔喺咩新鮮事，好多年前已經有快餐店搞過。米漢堡做等焦脆，不過，咬落就韌身咗少少，有種煎耐咗嘅感覺；相反，啲蟹肉就好正，啖啖都充滿鹹鮮味。
鐵板燒地雞 $88
肉類方面就試咗個地雞，因為，用上日本南部地雞入饌，喺其賣點。啲雞以熱板同上，唔會好快變凍晒，燒得外皮焦香，帶少少燶位，入口啲肉質比預期嫩，且富肉味。鐵板邊有啲柚子鹽，沾少少試試，喺可以令雞肉嘅味道更突出。
田園盒子 $98
蔬菜類我哋就索性揀串燒，因為剛巧佢哋有種野菜嘅串燒拼盤，包括茄子、冬菇、青椒仔、一口日本蕃薯及車厘茄，假設份量一樣，比散點慳20個巴仙。啲串燒燒得都幾靚仔架，而且，手勢唔錯喎，唔會燒到「乾爭爭」。小弟覺得最好食喺青椒仔同蕃薯，前者爽脆，後者粉甜。
抹茶丸十芭菲 $78
雖然食咗唔少「飯類」菜式，但大家都話仲有啲虛位，故此，一於以一道芭菲作結，首推都喺抹茶口味。大大杯芭菲好吸引，當中賣滿幽香嘅抹茶味軟雪糕，非常軟滑，抹茶味香濃突出；馬卡龍估計喺來貨，但質素都高，入口煙韌，抹茶香；而雪糕內仲有紅豆、粟米脆片，跟軟雪糕都好夾，整體大家都認為好好食。
食「精米」，可能都喺食海鮮丼易啲食出真味，今晚幾道菜，都滲入其他醬料，多少都會影響咗，不過，飯粒嘅軟熟黏糯，仍然食得出喺好嘢。加上環境唔錯，招呼又幾好，菜式選擇多，成為大眾嘅食堂真喺不足為奇。
個人評分
味道：8/10
環境：8/10
服務：8/10
抵食：7/10
平均每人消費：HK$302
味道：8/10
環境：8/10
服務：8/10
抵食：7/10
平均每人消費：HK$302
餐廳資料：
丸十日本食堂
葵芳興芳路223號新都會廣場4樓484-487號舖
3702 0021
丸十日本食堂
葵芳興芳路223號新都會廣場4樓484-487號舖
3702 0021
沒有留言:
發佈留言