深井陳記燒鵝海鮮酒家：深中有數

好話唔好聽，雖然由我所住嘅美孚區入深井頗方便，一程巴士52X上公路，下一個站就已經喺深井，不過，就總喺覺得遠，非常之少入嚟。但呢期小弟搵食蹤影好旺佢，一連兩個星期入咗嚟食嘢，第一轉教會活動入咗嚟「深井陳記」食午餐，隔個星期再入嚟行山，臨尾晌「榮記」食個下午茶先走。

今篇就先講「陳記」(青山公路深井村63號)，其實多年前都幫襯過「陳記」，但就喺前啲嗰間大鋪（陳記商業中心地下），今回就後少少間村屋「老店」，我見個招牌多咗「琦哥號」，無深究喺唔喺又喺啲同門拆咗出嚟。呢間鋪開晌村屋，大部分喺村屋外嘅半露天位。

因為我哋人多，足足十多圍，所以，有幾圍上咗樓，上到二樓，一個房都擺到3圍，但感覺就侷促啲。而是日食團餐，乜都安排好晒，有嘢食就得喇。亦因為咁，唔太方便慢慢影，所以，張張食物相都喺一上枱就快攝，免影響其他人。

馳明深井陳記燒鵝（跟瀨粉一窩）

嚟「陳記」，我都標準嘅指定菜式就喺燒鵝，雖然，小弟唔喺成日食燒鵝，所以，難以跟其他店比較，就單單講眼前呢碟。講真，都幾高質素，外皮深紅富光澤，一咬酥脆有油香，肉味濃而嫩滑，夠晒肉汁，又無話醃得太鹹，再搭啲瀨粉襯吓，好耐無食過燒鵝瀨喇。

竹笙海皇羹

個海皇羹算唔上有咩特別，但就好多料，交足功課，啖啖都有竹笙同海鮮料，而且，湯羹嘅質感調校得幾好，估唔到都幾滑身。

菠蘿咕嚕肉

燒鵝合格有餘，湯羹亦唔錯，其他嘅小炒又點呢？個咕嚕肉賣相唔錯，醬汁校得酸甜開胃，又唔嗆喉，餸飯一流，啲肉排鬆化，粉漿唔過厚。

蠔皇掌翼

啲掌翼炆得夠腍，而且好入味，蠔汁茨亦調得好，薄薄一層掛晌掌翼，最怕嗰啲杰到好似膠水咁，再者，蠔味濃郁，墊底嘅生菜亦保持脆身。

栗米魚塊

自從有餐廳寫「斑塊」被人告得入之後，見間間餐廳都改為魚塊，用雪藏魚柳就一定架喇，還好喺脆漿做得香脆不膩，薄薄哋勾個蛋花粟米茨汁，整體唔差。

北菇紅燒豆腐

我幾欣賞佢哋啲小炒，唔會太鹹，又無話漿糊咁嘅茨汁，而呢道紅燒豆腐都喺，冬菇夠厚肉，豆腐嫩滑有豆香，外皮帶點柔韌，手勢平穩紮實。

豉油皇中蝦

個團餐海鮮菜式無乜，唯一就喺呢道中蝦，外觀睇落好惹味，亦聞到陣陣豉油香，中蝦亦都夠晒大隻有睇頭，而味道確喺不俗，唯蝦肉無預期咁爽彈，還好喺不失蝦鮮味。

蒜蓉炒菜心

最後上嘅一道菜喺炒菜心，基本嘢，喺平衡番餐飯食咁多肉，啲菜夠清甜，唔老，已經收貨啦。

除有一大窩瀨粉，仲有喺白飯任食，我哋呢枱細路多，所以，食到我哋啲大人捧住個肚走，哈哈！質素方面，心中有數，大致附合預期，而服務方面，OK啦，喺一上菜時砰砰嘭嘭咁機關槍式上菜啫。

個人評分
味道：8/10
環境：7/10
服務：8/10
抵食：8/10
平均每人消費：HK$100（估計之數，未必反映實際消費）

餐廳資料：
深井陳記燒鵝海鮮酒家
深井青山公路深井村63號地下
2491 0722