NINETYs：九仰大名

托賴，算搵到個錢，有機會前後去過澳洲旅行兩次，到訪過悉尼、墨爾本、朗塞斯頓及荷伯特（塔斯曼尼亞）等幾個地方，加上小弟本身都幾鍾意嘆咖啡，好欣賞及享受當地嘅咖啡店餐廳文化，故最近從朋友口中得知晌灣仔有家帶澳洲風嘅咖啡店餐廳，風評不俗，正所謂久仰大名，專程走過嚟重溫澳洲嘅咖啡滋味。

餐廳就晌「胡忠」對面，非常易搵。推門內進，格局長方四正，左邊喺一排排座位嘅用餐區，右邊則喺水吧、開放式廚房，唯枱櫈拍得有點密，而且，用餐嘅枱都喺比較細張，建議分段點菜，避免啲菜堆到一枱都喺無位擺。

一室工業風嘅型格裝修，天花嘅密集烏絲燈，幻想吓當喺天上繁星都仲可以，令小弟回想番晌塔斯曼尼亞睇星河嘅時間。

餐牌嘅啡皮面印有「九Ｏ」字樣，貫徹番店名「Ninetys」，其實，意指九十後，因為店主喺九十後囉。我點知？睇過人哋啲食評，再向店員八吓、求証吓囉！

翻開餐牌，基本上食物會分白天及黑夜，指嘅喺供應時間，前者供應到5:30pm，大多數喺啲輕食少少嘅菜式，如賓尼迪蛋、吐司、漢堡；後者則6:00pm開始，有小食、沙律、主菜、漢堡、飯品、麵品。吊詭嘅喺5:30-6:00pm呢段空隙時間喺點呢？只可以嗌嘢飲，唔可以嗌嘢食？哈哈！無問，好想知店員會點答。

另外，飲品嘅選擇就印晌另外兩版紙，有多項酒精類飲品，如清酒、紅白餐酒、雞尾酒、啤酒，當然咖啡就唔少得，仲有茶品、特飲……等等。

Avocado Tempura $78

牛油果食得算唔少，但絕大多數一喺就整沙律，一喺就整三文治，但用嚟天婦羅就第一次。睇份量，應該喺用上兩個牛油果，咬落確喺幾好喎，因為脆漿薄，脆口又唔油，牛油果仲夠晒熟添。由於牛油果本身唔重味，灑咗啲七味粉，再沾點沙律醬提味，唧啲檸汁去膩，入口更清爽。

The Best Salmon Tartare Ever $148

呢道菜旁邊打咗粒星星，屬推介菜式，故之然想試試喺點。賣相非常之吸引，色彩繽紛，更加上一小朶食用花做裝飾。雖然佢被列為主菜類，但睇樣就似前菜多啲。4片杏甫核桃麵包配上挪威三文魚、柚子肉、牛油果蓉及西柚肉，唔使多講都知喺自由配搭咁食。小弟貪心，就一次過放晒4樣食材上片麵包度，麵包屬少少硬身嘅歐陸包，較有咬口，加入各種食材，味道紛陳，清爽怡人，當然，更可隨喜好嚟配搭。4片麵包食完都仲有剩材料，大可撈埋一齊當個開胃沙律食。

Kumato Prawm Linguine $148

簡單嚟講，就喺一道蕃茄意粉，但賣點就喺用上瘀啡色嘅歐洲蕃茄（Kumato），唔知有無中文譯名，但屬少見嘅品種。咪睇佢好似瘀瘀黑黑，食落幾有蕃茄味，又唔酸。至於啲寬條麵，的確有咬口，沾滿濃郁嘅蕃茄醬汁，實在好食，啲大蝦亦鮮甜爽彈，喺一道有水準嘅意大利麵。

Fruit Romance $48

貫徹工業風，水杯用上銅色嘅有耳水杯，而呢杯以橙汁、桃汁、培茶沖泡嘅Fruit Romance，先喺果香味，再慢慢滲出茶香，比預期有趣嘅出品。

Flat White $42

嚟呢度食晚飯，一心一意喺要嘆一口佢哋嘅咖啡，所以，最後，點咗一杯Flat White。佢哋嘅咖啡都幾得意，啲豆可以揀Fruity Blend或Choco Blend，小弟揀前者，咖啡送嚟時以小托盤盛載住，仲有一小碟果仁。拉花花紋細緻，一入口已知質素高，口感均勻順滑，味道醇香細膩，飲過後讓人有份喜悅感。

今晚，無論食嘅，飲嘅，都嚐得到高水準嘅出品，加上環境唔錯，招呼又到位，做飲食嘅，永遠都喺要靠食物做得出色先喺長「九」之計。

個人評分
味道：9/10
環境：7/10
服務：8/10
抵食：7/10
平均每人消費：HK$255

餐廳資料：
NINETYs
灣仔皇后大道東222號地下2號舖
2369 0118