晌美孚區，亦有Starbucks及其他咖啡店，但論到好坐，首推呢家Pacific Coffee。因為地方大，樓底高，木椅、梳化位任擇，空間感強，予人感到舒適悠閒。故此，過往日子，我哋間中都有落嚟食吓嘢。尤其星期六嘅大清早，客人少，環境就更清靜，食吓嘢，睇吓書嘅話，不知幾輕省。
講明為個紅菜頭特飲，當然目標清晰，與此同時，見佢哋有推出咗一款與么鳳聯乘嘅「口立濕」系列，貪新鮮嘅我，今次就棄咖啡，試吓啲「騎呢」嘢。
紅菜頭蜜糖檸檬水 $40
紅茶頭系列共有3款，其中兩款喺其冰樂，太冰嘅嘢絕對唔多啱佢，所以，就揀另一款「紅菜頭蜜糖檸檬水」（少冰）。雖然少冰，入口仍然都好清涼，但就唔會凍到人口骹軟；你見得兩片檸檬，因為檸檬唔喺主打，只喺帶出少少檸檬嘅酸香味，飲落紅菜頭味十分突出，加咗蜜糖，繼而令感覺到一份清甜味，整杯飲品嘅配搭都好有心思。
凍柚子話梅綠茶 $38
話梅搭綠茶真喺好鬼馬，亦無諗過可以咁搞，但失望少少喺成品無介紹牌張相咁有層次，溝出嚟已經喺全綠茶嘅顏色，杯面放有一杯話梅。味道又如何先？基本上，喺以綠茶為主嘅味道，而綠茶嘅茶味幾幽香，帶微微甘味，個茶底真喺唔錯喎；再慢慢飲落，會有種話梅散發出嘅酸香味，整體感覺確喺幾得意，飲完之後，都唔好錯過粒話梅，酸酸甜甜；不過，講咁耐都無提及柚子味，的確飲到尾，都唔喺好覺。
由於我哋一早嚟食早餐，所以，食物選項非常之齊，有各式沙律、麵包、三文治、酥皮卷、蛋批、蛋糕、乳酪……等等，凍櫃旁仲放有鬆餅、牛角酥之類包點。
烤蘑菇蛋批 $28
我哋晌Pacific Coffee試過唔少佢哋嘅烤批或蛋批，印象中都甚有水準，而老婆偏素，就揀呢一款烤蘑菇蛋批。批殼唔會太厚，而且非常香脆，批內填滿烤蘑菇、蛋漿，面面又有啲芝士，香濃惹味富蛋香，又足秤喎，好食。
公司三文治 $23
但喺講到佢哋嘅三文治，小弟記憶中反而喺第一次食，半份都賣到廿幾蚊，都唔算平，幸好就算得半件都好足料，有芝士、煙肉、燒牛肉、生菜、蕃茄，如果喺即食，更可要求烘返熱。烘熱之後，包面脆脆哋，餡料嘅味道豐富，又有層次。
食完個美味早餐，出發行山去，雖然正值炎夏，但無損一班老友行山嘅興致，不過，安全起見，揀咗條無乜難度，不時有樹蔭嘅衛奕信徑第5段，由沙田坳行到去九龍水塘，等大家出身汗。
個人評分
味道：8/10
環境：8/10
服務：8/10
抵食：7/10
平均每人消費：HK$65
味道：8/10
環境：8/10
服務：8/10
抵食：7/10
平均每人消費：HK$65
餐廳資料：
太平洋咖啡 Pacific Coffee Company
荔枝角寶輪街1號曼克頓山地下04-05號舖
2907 1234
太平洋咖啡 Pacific Coffee Company
荔枝角寶輪街1號曼克頓山地下04-05號舖
2907 1234
沒有留言:
發佈留言