明星金閣：行完山，攤抖吓！

晌另一篇美孚Pacific Coffee嘅食評度，講過朝早嘆完個早餐，跟住出發同朋友行衛奕信徑第5段，由沙田坳（唔喺晌沙田，而喺晌黃大仙上面）行到去九龍水塘（即馬騮山一帶），整段路唔太難，對我哋行開山嘅人嚟講，算喺輕鬆，亦因為天氣有啲熱，先至揀呢段嚟行。完成3小時嘅路程，剛好中午時份，最好就一行6人落深水埗飲茶啦。

嚟到呢間「明星」，純因方便，一程巴士就到門口。以前間酒樓佔地兩層，依家只得番三樓，二樓變咗惠康。門口阿姐見我哋行完山，一身行裝，專登俾個房裡面嘅12人大枱，方便擺嘢，真喺唔話得。

環境就唔多講，以前亦同屋企人嚟食過好幾次晚飯，都曾經寫過吓食評。貼出咗張點心紙俾大家當個參考，因為唔單止睇到有咩食，仲有晒價錢，佢哋啲價都唔算平，而且，星期六午市都無乜優惠。茶位$11個，收加一，飲茶嘅基本入場費。

此外，仲有張「特色推介」嘅茶式點心紙，有晒圖片作參考。由於是次飲茶嘅朋友中都只得小弟喺「相機先食」嘅人，所以，點心一嚟，就快快手影張相就算，無特別搞太耐阻大家食嘢。

蟹籽燒賣皇 $24

叫得燒賣皇，就梗喺包得夠大粒啦，不過，佢哋將蟹籽跟燒賣一齊蒸，蒸黃咗就無咁靚仔，我見過有啲酒樓就後加蟹籽，等啲蟹籽保持晶瑩。然而，啲燒賣都唔錯，豐滿大粒，咬落唔會一口都喺肥豬肉，鬆化而帶點爽口。

金瓜叉燒腸粉 $24

金瓜即喺蕃薯，腸粉內除叉燒，加咗薄薄一小片一小片嘅蕃薯片，整體味道都唔錯嘅，但腸粉皮就拉得比較厚，欠缺一份滑溜感。

蠔皇叉燒包 $22

一客3大個，塞滿成個蒸籠，包身鬆軟唔黏牙，裡面嘅蠔汁底、叉燒餡，做得惹味，最緊要喺攞上手時枱時熱辣辣。

潮州蒸粉果 $17

小弟就覺得粉果做得有水準，外皮薄透晶瑩，包得緊致，但咬落唔黐牙，裡面好多沙葛粒、花生……等等，夠咬口。

一口鮮蝦餃 $27

呢度無咩蝦餃皇，反其道而行，唔鬥大，反而講細，一口鮮蝦餃擺明道做到纖巧啲，一口一粒。雖然無食啲蝦餃皇咁豪，但啲蝦肉都彈爽鮮甜，餃皮未至於晶瑩剔透，但壓紋工整，餃皮亦唔黏牙。

白灼菜芯 $24

我哋一班中佬，食嘢都講多咗健康，雖然點咗個孖寶有浸時蔬，但點多客灼菜又何妨。灼菜芯真喺唔多嘢分享，但求翠綠嫩口已經收貨。不過，小弟個人就極少點灼菜，因為覺得喺最唔抵食嘅點心。

香煎蘿蔔糕 $22

健康還健康，飲茶食點心，喺要點啲香口嘢嘅，先嚟一客蘿蔔糕。煎得香口，食落都有蘿蔔味，但就唔算話好濃嗰種，糕內混有唔少臘味，添多少少咬口。

椒鹽九肚魚 $48

再嚟多樣唔健康嘅香口炸嘢，啲九肚魚就唔喺原條咁整，裁番細一件件，而炸得色澤金黃平均，入口外脆內嫩，魚肉好滑，又極富椒鹽香，難得又唔油膩喎。

仲有另外一張「午市精選推介」，當中有兩款午市孖寶，一款粉麵飯搭一款浸時蔬，賣$128，諗得過，就揀咗B款。

菠蘿海鮮粒炒飯

碟炒飯份量足，夠晒大碟，餸料亦唔少，不過，就菠蘿粒佔多啲，海鮮料就有蝦仁粒、珍珠帶子、魷魚……等等。味道OK嘅，飯粒炒得爽身，最鬼怕啲飯爛。

蕃茄珍菌浸時蔬

兜浸時蔬亦都好大碟，喺一般點小菜嘅份量，內裡有一大堆蔬菜浸住個蕃茄湯底，味道酸香清爽，啲蔬菜亦新鮮鮮甜，最後，食晒啲茶，千祈唔好嘥個湯，可以當湯咁飲。

借少少版位嚟分享吓衛奕信徑第5段，頭段喺少少山徑，樹蔭多，幾舒服，中段落山，但唔喺好陡斜，最尾一大段沿引水道行，更喺無難度可言，而且，成個路段沿途都設有好多涼亭作歇息之用。

總結，「明星」嘅路線都喺做啲街坊生意，定價唔算平，亦唔算貴，質素就中中等等咁啦，平均$75飲餐茶，叫OK啦，最重要喺俾我哋坐到夠皮，攤抖番晒嘛。

個人評分
味道：7/10
環境：8/10
服務：8/10
抵食：7/10
平均每人消費：HK$75

餐廳資料：
明星金閣
深水埗大埔道168-178A號3樓
2778 8138