小店位處灣仔道（集成中心後面），食完行幾步就到IVE (MH)，所以，我都知位置喺邊。講得小店，佢就真喺地方唔大，踏進店內，開放式廚房佔咗大部份空間，而鋪面就有數張吧枱位，故此，據店主講，嚟得幫襯嘅主要都喺晌附近做嘢嘅客人或返學嘅後生仔。
雖然鋪仔細細咋，裝修都算幾骨子架，周圍都放咗好多小飾物作點綴，但又唔會變得感覺累贅。枱上有好多USB插頭，唔單止個人食嘢叉吓電，就順手連手機亦可以叉叉電。由於小弟嚟得早，客人唔多，對住清靜嘅街景，感覺難得咁悠閒自在。
佢哋餐牌只有一套，全日通用，無刻意設立早餐之類，故此，予人感覺可能會稍貴，不過，跟任何時段嚟食，都喺等值相同，質素不變。細看餐牌，主打喺特色吐司，一共有6款，散點定價由$28-$58，要留意喺部份款式要11:30am後先供應。此外，仲有咖啡、果汁、茶品、小食。
而另一個餐牌，可以講喺套餐形式，定價比散點多付$5，就配一杯自家製百香果檸檬茶（冷熱都得），亦可以額外加錢轉其他飲品，如果汁系列、即磨咖啡、特濃黑朱古力，更可以加配薯波或薯格等小食。而佢哋嘅吐司都幾特別，裡面已夾有煎蛋、椰菜絲、粟米粒及特製士多啤梨醬。
近日天氣非常之熱，仲加推冰菠蘿（$10件），新鮮菠蘿雪到凍一凍，諗落都覺得爽呀！而且，自家製嘅黑糖黑朱古力軟曲奇（$18兩件），抵食過Mrs. Field啦，加杯紅茶當下午茶就最好不過。
由於所有吐司都喺即點即做，全個製作過程晌開放式廚房度睇住佢整，由牛油煎多士，煎厚蛋，炒熱啲椰菜絲，烤熟啲肉，以至唧上醬汁，製作都公開、透明，所以，店主話一般都要等15-20分鐘。更建議如果唔想等太耐，不妨先whatsapp嚟落單，校啱時間落去攞就更省時。既然即製，當然揀堂食喺最好效果啦，由於小弟一早嚟，避開晒啲尖峰時段，等候時間亦唔長。
煙背肉芝士吐司 $38
由於手打安格斯牛芝士漢堡要11:30am後先有，所以，揀咗一款廚師推介嘅「煙背肉芝士吐司」，成品以麵包形嘅瓦碟盛載，非常別緻。咪諗住只喺吐司一份，都唔知食唔食得飽，查實疊高起嚟有成3-4吋厚。最欣賞佢張包裝紙，喺比較厚身嘅牛油紙，唔易爛，亦唔會穿，仲喺「兜」底包實晒唔會漏晒啲汁落手。
咁味道喺點呢？正，底面兩層吐司十分脆口，且富牛油香，一口咬落份吐司度，再配合埋啲椰菜絲，口感可以話喺清新爽脆；而鹹香嘅煙背肉，食得出喺靚料，唔喺嗰啲肥膏多多嘅平價煙肉，加埋溶溶哋嘅芝士、嫩滑嘅方形煎蛋，喺無得點輸嘅組合。唧埋特製士多啤梨醬，令整份吐司多添一份酸香甜味，十分得意，卻又唔會有種古怪核突感。
焦糖鮮奶咖啡 +$16
早晨飲一杯心水嘅鮮奶咖啡，感覺寧舍有活力，今次就揀咗焦糖味嘅鮮奶咖啡，焦糖味都幾突出，不過，都喺唧多少少糖漿嘅效果；而杯鮮奶咖啡質素就不過不失，濃縮咖啡個底喺幾香醇嘅，但撞奶泡嘅手勢就普通，口感未夠一致，然而，整體仍不失香氣。
基於小店都喺走少少咖啡店模式，無論凍飲，還是熱飲，都有提供膠管，但留意到收銀旁，有售賣不銹鋼飲管套裝（連清潔刷，以及送不銹鋼匙羹），可見小店都想為環保出一分力。故此，小弟飲咖啡時，都有「走塑」唔需要任何膠管。
晌杯身，印住「Life is short…..Deserve Better」，表示無論生活喺點，你都應該值得活得更好。認同，正所謂辛苦搵嚟志在食，偶爾都要食餐好嚟獎勵吓，為自己打打氣嘛！
個人評分
味道：9/10
環境：7/10
服務：8/10
抵食：7/10
平均每人消費：HK$54
味道：9/10
環境：7/10
服務：8/10
抵食：7/10
平均每人消費：HK$54
餐廳資料：
Deserve Better Toast & Coffee灣仔灣仔道181號長春大廈C舖
5282 9041
沒有留言:
發佈留言