茶屋町居食屋 Chayamachi：溫室的浪漫？

曾經有人話豆腐火腩飯喺男人嘅浪漫，亦有人話大牌檔都喺男人（特別喺麻甩佬）嘅浪漫，最近睇緊韓劇「陽光先生」，女主角金泰梨曾講過作為逆賊，開槍嗰瞬間就喺佢嘅浪漫。浪漫對好多人嚟講，定義不一，喺一份感覺，不過，今晚嚟到旺角「茶屋町」食串燒，絕對跟浪漫扯唔上開係。

7:00pm嚟到餐廳，未有太多客，全場只有兩枱而已，但喺唔知點解被安排坐晌外邊嘅「空中花園」。室外位喺無冷氣，只有一部吹到頭甩嘅大風機及一部唔覺有風又擺得遠遠嘅細風扇，真喺好似去咗大牌檔，又或者好似入咗溫室裡面，邊食邊滴汗。但友人話，既來之，則安之，果然喺佛系食友。

我曾經問過可唔可以坐晌裡面，但回應喺按訂枱時序已留咗枱。不過，當時嘅目測加埋事後嘅相片，除大部分卡位喺擺咗留枱嘅牌仔外，少部份卡位及6人組合大枱根本喺無人坐。因為到小弟8:00pm左右離開，好幾張枱（尤其6人枱）都喺從未有人坐過。如果事先知喺需要坐晌無冷氣嘅室外（秋天就另作別論），可能一早已改食飯地方囉。

雖然晌門口已見再佢喺以居食居為定位，但主要都喺供應日式涮涮鍋及串燒，定價普遍都唔貴，實屬相宜。原打算亦點客涮涮鍋，再加啲串燒，不過，食串燒都滴汗啦，仲點會叫涮涮鍋呀！

唔使多講，先睇睇有咩凍飲解吓渴先。飲品方面就確喺有好多選擇，不少都頗有特色，但相對啲食物，定價就有點偏高。不過，如果有打算飲多幾杯，就不如揀「任飲兩小時」優惠，只喺$98位，多款指定飲品任飲。

Sweet $56

友人所點嘅Mocktail名為「Sweet」，以水蜜桃、紅石榴糖水、檸檬汁及西柚汁溝成，一身橙紅，賣相普通。小試一口，以西柚味為主導，清爽而酸酸哋，不過，水蜜桃嘅香味似乎欠奉。

菠蘿椰子果昔 $48

小弟就對啲果昔有點興趣，因為講明採用日本直送有機豆乳再加入新鮮水果。揀咗菠蘿椰子口味，而外觀有少少似奶昔，入口比較濃厚，椰子味突出，飲落有啲纖維感，相信真喺搵新鮮椰子肉打成，不過，菠蘿就喺罐頭貨。

煙肉荔枝串 $22

秋葵串 $13

煙肉荔枝串喺小弟最心水嘅串燒之一，因為煙肉嘅鹹香，配荔枝嘅清甜，真喺好夾；秋葵串就純粹點啲烤菜平衡吓，咬落秋葵爽爽哋。

蜜糖台灣腸 $22

極上牛舌 $38
台灣腸好有蜜糖香，腸衣又脆；而極上牛舌確喺幾好食，口感彈牙得嚟又有少少煙韌感，又有獨特嘅羶香 但灑鹽似乎多得滯，有啲偏鹹。

日式芝士炸年糕 $28

炸紫薯甘栗餅 $28
呢兩款炸物都好好食，年糕入口外脆而內裡軟綿綿，而中心嘅芝士半溶半黏，好軟熟；紫薯餅一樣炸得香脆唔油膩，裡面堅有栗子粒，粉香清甜。

燒煙三文魚飯團 $24

明太子飯團 $28
點兩客燒飯糰嚟墊墊肚，燒得焦香，咬落香脆而咬口，前者混有唔少煙三文，而後者加入明太子，故此，食起嚟味道唔寡，甚有鹹香味。

啲串燒做得算有一定水準，就連兩款炸物亦出色，只喺晌熱辣辣嘅「溫室」環境下食真喺熱辣辣嘅串燒，一啲都唔多自在。所以，無坐得太耐，搵下場，食碗糖水填埋少少位。

個人評分
味道：6/10
環境：7/10
服務：6/10
抵食：7/10
平均每人消費：HK$170

餐廳資料：
茶屋町居食屋 Chayamachi
旺角砵蘭街215號朗晴坊4樓
2321 5131