嚟得食晏，就自然覺瞄吓個午餐餐牌啦，「夏日精選午市套餐」，圖文並茂，且印刷精美。一共有13款選擇，定價都哋$58-$82，包普通熱飲1杯，更可以加錢轉其他特飲。
迎合一啲想更實惠嘅食客，備有「午市2人套餐」，優惠價都只喺賣$218，已包咗餐湯、頭盤、主食、蔬菜、甜品及飲品，喺非常划算嘅選擇，只可惜有啲嘢表哥話唔喺咁啱，所以，無揀個2人套餐啫。
2人餐唔啱唔緊要，仲有一項優惠，就喺凡惠顧任何套餐，即可以用優惠價享用芝士蛋糕或指定美食。所以，就算點精選午市套餐，一樣可以享用呢個個優惠。
咁都順便介紹埋佢哋嘅散點餐牌，因為，始終可能套餐有啲人唔啱，又或者有啲菜式想試，表哥算喺後者，有啲沙律及小食想試吓。而散點餐牌中，美食嘅分類如下：沙律、頭盤小食、燒物、米紙卷、湯品、主食、西貢咖喱、蔬菜、濱海、越式撈檬、招牌湯河、炒粉飯……等等，選擇幾多吓。
餐具、紙巾及調味料已放晒晌餐枱上，自由取用，除魚露，仲有是拉差隻辣椒醬，可惜，小弟唔多喜歡辣醬，無福消受，哈哈！
海虎蝦仁牛油果沙律 $88
近期真喺牛油果狂熱，咖啡店又好，西餐廳又好，經常都遇到牛油果菜式，就連小弟近幾次自家製早餐都加入牛油果做三文治：牛油果蛋治、蛋沙律牛油果三文治。而呢道「海虎蝦仁牛油果沙律」雖然簡單，但食落鮮味，啲海虎蝦大大隻，去晒殼，啖啖肉，爽彈有鮮味；牛油果夠熟而軟滑，配上爽脆嘅沙律菜，自家調嘅越南風醬汁，酸酸辣辣，為一餐食出個好開始。
黃金椒鹽軟殼蟹 $88
除咗牛油果狂熱，「黃金」亦持續狂熱，無獨有偶，近排又真喺食咗唔少加入鹹蛋黃元素嘅菜式，有韓國菜、酒吧西餐、東南亞菜、意大利菜。呢道「黃金椒鹽軟殼蟹」喺以椒鹽軟殼蟹基礎上，再加入鹹蛋黃，將鹹香惹味度再推高一層，再者，軟殼蟹嘅質感確喺幾好食，整件事就喺一個美麗嘅配搭。
正當晌精選午市套餐中左度右度，晌餐枱上睇到店家推介緊兩款菜式：「鮮茄石斑魚片湯檬」、「越式黑白芝麻雞」，再翻睇餐牌，午市亦有呢兩知選擇，比夜晚嚟散點平好多，所以，唔再有懸念，一於費事煩就揀佢哋。
鮮茄斑球湯檬 $78
湯檬嘅份量都真喺幾大碗，啲檬粉有眼你睇，載得滿滿，而且，檬粉滑溜；而個鮮茄湯底唔似一啲主打賣蕃茄濃湯嘅麵店咁做到超濃郁，但個蕃茄味一樣做到鮮香酸活；至於啲斑球堅正，一食就知唔喺啲乜乜魚柳，口感挺身，有濃郁魚味，用料不賴。
芝麻雞飯 $82
呢個越式黑香芝麻雞由賣相、食法，都有海南雞嘅影子，配上黑醬油、辣醬、蔥油，唯一明顯分別就唔喺雞油飯，而雞面灑滿黑白芝麻。啲雞件去晒骨，故此，啖啖肉，食得夠爽，皮下脂肪少，雞皮爽口，雞肉極之嫩滑，最鍾意喺沾黑醬油搭蔥油，更能吊去肉鮮。
菠蘿熱情果梳打 +$12
今次無揀越南滴漏咖啡喇，因為，晏少少過深水埗探麵包班同學仔，搬咗新居，上去嘆咖啡，食下午茶，所以，今回選上咗杯梳打。杯梳打幾有熱情果香，入口又清爽喎，只喺菠蘿喺罐頭貨而已，但補$12都算抵飲。
蜂蜜玫瑰柚子茶 +$8
表哥就想熱飲，故此揀咗杯滋潤嘅柚子茶，柚子茶當然喺現成貨開沖啦，不過，加入食用玫瑰元素，感覺唔止芳香咗，味道亦有另一個層次，佢話幾鍾意呢杯熱飲。
「品越」有唔少甜品，越式、西式都有，不過，兩道前菜、兩客主食，都已經好飽，無再試甜品。今次再訪，食物水準都無點跌，而且，食得出用料具質素。服務貼心，上菜速度恰當好處，先上個沙律，食到一半再上個軟殼蟹，而兩客主食同步送上，咪睇少出菜嘅次序及速度，都好影響食客架，加上環境又舒服，故此，值得客人再回頭。都喺嗰句，能做好啲菜、搞好啲服務，日積月累嘅話，生意先長做長有。
個人評分
味道：8/10
環境：7/10
服務：8/10
抵食：8/10
平均每人消費：HK$196
味道：8/10
環境：7/10
服務：8/10
抵食：8/10
平均每人消費：HK$196
餐廳資料：
品越越式料理 La'taste Vietnamese Cuisine
旺角彌敦道625及639號雅蘭中心1樓116號舖
2997 1038
品越越式料理 La'taste Vietnamese Cuisine
旺角彌敦道625及639號雅蘭中心1樓116號舖
2997 1038
沒有留言:
發佈留言