Chicken & Co：脆味烤雞

長沙灣區都算小弟半個主場，因為，多親戚住呢頭，加上呢區買嘢平，不時都會順道過嚟逛吓。今日，就打算過嚟食晏，之後再去剪髮。晌元州商場就開咗家法式烤雞店「Chicken & Co」，主打全榖飼成長、非基因改造、不含激素嘅法國春雞，佢就喺同老婆嚟食晏嘅地點。

餐廳開晌商場一邊地下入口位，採開放形式，一眼就望晒成個鋪面，佢哋樓底高，加上鋪面對住就喺商場嘅落地大玻璃，空間感開揚，而鋪前有數組枱櫈供堂食之用，不過，目測唔少客都喺以外賣為主。

晌廚櫃擺放多款美食，用上法國銅鍋盛載，打晒燈，份外吸引。

雖然話喺法式烤雞店，但都未算喺獨沽一味，就介紹吓有乜嘢美食先啦。一大張美味單點餐牌，就印整店家所有出品，包括小食、沙律、意粉、飲品，另一張就印住主打嘅傳統法式春雞原隻、半隻、一件），揀烤雞又得，炸雞都得，同時備有4人分享餐同6人分享餐。

人少又想食得划算啲，兩組套餐就啱晒嘞，分別喺「烤雞套餐」（Set A1、A2、A3），烤雞或炸雞，配小食及飲品，定價$48-$64；「意粉套餐」（Set B1、B2、B3），意粉，配小食及飲品，定價$43-$60。

如果一個人嚟到，又想同時食到烤雞及意粉嘅話，無問題，我仲見佢哋有款「烤雞意粉餐」，都只哋賣$58啫。晌收銀櫃落好單，等叫飛就可以喇。

餐飲只包普通嘅百事、七喜……，不過，想轉飲伊藤園綠茶、玄米茶或Meko椰青水，都可以加錢轉配嘅。

研究咗一大輪，最後我哋揀咗兩個Set A3，因為今次目的喺想食烤雞，而A3就可以揀兩客小食或沙律，咁就可以同一時間試到多啲嘢。咁多嘢食，一個大紙盒裝起晒，當然，要打開晒佢，晒吓冷啦！

正所謂工欲事其善，必先利其器，膠叉、膠手套、紙巾、濕紙巾……一一俱備。

煙三文魚凱撒沙律

雖然跟正宗嘅凱撒沙律有啲距離，但味道方面又算唔錯，啲羅馬生菜夠爽脆，咬落「索索聲」，個醬汁明顯喺「亨氏」嘅現成貨，難得唔差喎，而塊煙三文好大塊，唔會碎濕濕，亦無過鹹嘅問題，用料不賴，唯啲麵包粒再烘乾啲就更加脆。

脆薯餅

香口嘅炸嘢人人都鍾意食，不過，多食無益，但擺晌眼前又實在難忍口。幾款炸嘢，薯餅老婆就最鍾意，炸得香脆唔油，又幾有薯味。依家少落麥記，所以，既然小食有得揀薯餅，佢就一定會揀啦。

洋蔥圈

同樣都做得唔錯，外層嘅粉漿薄，唔會咬落一口粉，而洋蔥爽口清甜，無乜生辣味。襯啤酒、汽水固然絕配，但夾凍檸茶都唔錯吖，有種去膩感添。

脆蘑菇

搵蘑菇嚟炸比較少食，無刻意數，印象大概6、7粒左右，炸得酥香，但估唔到口感卻喺爽爽哋，又好多汁，有啲驚喜喎，喺好值得一試嘅小食嚟。

原味烤雞

原味唔喺代表無味，而喺基本嘅香草味，隻烤雞燒得金香，雖然喺翼位加雞胸，但一樣食起嚟皮脆肉嫩，兼且皮下脂肪少，唔會一口油，啲香草好入味，真喺交足貨。

蜜糖牛油烤雞

另一款就試試蜜糖牛油口味，但對比之下，感覺就無原味咁好食，大概因為香草較為惹味啲，醃得又較入味，而呢一款嘅味道則比較溫和，但仍嗒得出蜜糖嘅清甜味，但就欠牛油香。而部位俾咗脾位，肉質就更嫩滑。

凍檸茶、Meko椰青水 +$10

小弟慳番啲就唔改其他嘢飲，飲杯凍檸茶清爽吓就OK；老婆就要咗椰青水，一來感覺健康清新啲，二來佢都有飲開，都幾鍾意椰青水，不過，佢話Meko嘅就稍稍偏甜，但椰青味就幾清香。

離開時，見啲店員都好進取，將啲炸嘢剪成細細件晌商場門口俾人試食，希望吸客收宣傳之效，而最多人走埋嚟就喺啲細路仔。

晌香草主打烤雞嘅店子唔算好多，以法國春雞作招徠就更加唔多，難得晌平民商場賣法式烤雞，可能你覺得50、60蚊個餐唔平，但以貨論價，其實算相宜，走上電梯晌一樓嘅大家樂食個餐都差唔多啦。

個人評分
味道：8/10
環境：7/10
服務：8/10
抵食：7/10
平均每人消費：HK$69

餐廳資料：
Chicken & Co
長沙灣元州街303號元州商場地下G01舖
3468 6990