室內嘅裝修，下半身牆以深啡色木板作配置，而上半身牆則鬆上淡紫色，仲掛上唔少晌荷里道常見而帶有諷刺意味嘅油畫，雖然跟環境唔算好夾，但相信喺店主嘅偏好，藝術嘅嘢小弟自認識條鐵。不過，襯以柔和嘅燈光，加上枱上嘅蠟燭燈，整體氣氛都幾有情調架。
然而，個人覺得最有特色喺啲地磚，草綠配襯橙啡，圖案有種復古味道，又有點似啲外國大教堂嘅地磚。
餐牌裡顯示出店家只賣套餐，無散點嘅菜式，而套餐簡單嚟講分3道菜及5道菜套餐，仲有一款5道菜嘅套餐喺全素添。而定價範圍比較闊，部份更做緊8折優惠，但要溫提一下，暫時餐廳仲只喺收現金，記得帶足錢埋單。
而晌餐牌內頁，強調佢哋供應細緻嘅扒類、慢煮菜式及自家製手工意大利麵，故此，揀餐時大可以呢幾方面作為考量點。
餐廳設有wifi，密碼大方楝個牌晌餐枱上，唔使嘥大家時間問職員。其實，我都唔喺好明，時下好多餐廳都已經有提供免費wifi，但大多數都唔會主動披露個密碼，有啲我試個寧願麻煩啲由店員幫你输入，都唔會講俾你聽。
前菜小點
落好單之後，會額外醒一客餐前小點俾客人過過口癮，名為「意大利芝士卷」，每上一道菜，店員都會略作介紹，呢道小點喺搵咗意大利青瓜、意大利黃瓜捲住一小嚿忌廉芝士而成，兩片瓜都刨得好薄，入口好爽脆，而忌廉芝士則軟滑香濃，配搭不俗。
香煎鴨肝配慢煮菠蘿
前菜有兩款，如果兩個人嚟就唔使心煩，就試晒兩款。現場燈光確喺有啲昏暗，希望大家唔好介紹小弟今次啲相有點暗。件鴨肝都幾厚身吓，煎得好香，做到外脆內綿，口感豐腴，確喺有種入口即化嘅感覺，而且，完全無筋，喺質素高嘅貨色，沾點點蘋果醬，去膩而更清爽；更特別嘅喺件碟嘅菠蘿採用慢煮，第一次試慢煮蔬果，入口鮮甜，口感軟腍而無渣。
波士頓龍蝦配檸檬橄欖油和俄羅斯魚子醬
呢道絕對喺矜貴嘅前菜，又波士頓龍蝦，又俄羅斯魚子醬，而且，賣相非常之靚。龍蝦拆咗肉，配檸檬橄欖油，蝦肉爽口彈口之餘，有鹹鮮嘅海水味，再有啲檸檬清香，頗特別。加上魚子醬，就令個鹹味更具層次。呢道菜道以青瓜做慢煮，爽脆之餘，味道極之清甜。
自家製麵包
食完道前菜，就送上麵包，用作配襯隨之上枱嘅餐湯。兩款麵包：意大利麵包條及意大利香草包，店員特別強調麵包都喺師傅自家製，真喺誠意十足。而後者，更喺個人好喜歡嘅包款，小弟曾在外學整呢款包，所以，食得出其做法正宗，就喺發酵完第三次後，晌包面淋上一朕橄欖油及灑上海鹽粒再焗，依家出面好多時食到嘅都喺來貨，絕大部份均缺少呢兩個元素，只喺簡單把香草混入高筋麵粉搓包而已。個香草包唔止軟綿，又富香草味，油潤兼帶有海鹽嘅鹹味，一知字總結：正！
野菌忌廉湯
餐湯次一本來喺一道蟹湯，但貨源關係，改為野菌忌廉湯，友人反而話仲啱佢。個湯嘅菌香味好強，上到枱未飲都已經聞到，小試一口，果然菌味濃郁，質感細膩，好有水準嘅出品。
焗法式洋蔥湯
而我就揀法式洋蔥湯，亦喺小弟喜愛嘅湯品之一，以小玻璃茶杯盛載，而非常見嘅瓦碗，多一份別緻。面層薄薄烘軟嘅芝士，配以法包，吸滿湯汁，軟軟綿，至於個湯，帶有好勁強嘅洋蔥香甜味，更喺丁點澀味都無，好飲。
自家制墨魚汁麵配香煎帶子和羅勒香草蕃茄汁
既然意大利麵喺店家嘅撚手嘢，套餐當然會有啦，呢一道小主菜份量恰好，正正俾大家試到，卻唔會太飽肚。墨魚汁麵本身就唔會真喺有太大味道，所以，個羅勒香草蕃茄汁好突出，羅勒好幽香，蕃茄好鮮活，而帶子極之爽彈。
自家制意大利粉配巴馬火腿、牛肝菌蕃茄忌廉汁
一家橙色嘅牛肝菌蕃茄忌廉汁頗特別，香香甜甜嘅感覺，好濃郁，好幼滑，掛滿落每炷意大利麵之上，而麵條口感一流，煙韌而有咬口，加上巴馬火腿帶出嘅鹹香，比煙肉嘅質感更細膩，整個配搭都好出色。
慢煮紐西蘭牛柳配紅酒汁 $448
呢款5道菜晚餐嘅定價就視乎所揀嘅主菜，友人喺肉痴，牛柳就最合佢心水。由於友人喺第一次慢煮嘅肉，所以，極為驚喜，牛柳嘅色澤呈嫩粉紅，卻完全無血水滲出，質感嫩滑到不得了，且肉味濃，蘸上紅酒汁，點點紅酒香，非常合襯。
香煎印度洋老虎海蝦配蒜蓉香草蕃茄汁 $468
小弟嘅主菜喺印度洋虎蝦，果然喺唔同啲，每隻海蝦都非常大隻，甚有睇頭，一客有3大隻，而且，每隻都去晒殼，食用方便。啲蝦肉好彈牙，極有蝦味，底下墊咗大量蒜蓉香草蕃茄蓉，酸香鮮活，配蝦都好襯。
佢哋嘅主菜唔止主食材用料不賴，就連配菜，亦花咗唔少心思。先喺伴有一串燒翠玉瓜、鮮蘑菇及車厘茄串，再有啲田園時蔬及薯蓉，時蔬中嘅蘿蔔更喺以慢煮方式處理，咬落清甜、水潤、無渣，薯蓉亦打得滑溜。
甜品拼盤
套餐本來只包一款甜品，但店主好人，索性俾齊4款我哋試，成道拼盤形式登場，分別喺原味嘅梳乎厘、慢煮蘋果卷、青檸撻及朱古力撻，呢個亦喺建議食嘅先後次序。事後再跟店員傾開，原來就連甜品都喺師傅自己整，絕不用來貨，真喺誠意可嘉。
梳乎厘成本唔高，但就喺手工嘢，兼且無得事前整定，因為蛋白打起攤耐咗唔用會化，又要即焗，睇見個梳乎厘焗得咁高咁挺身，就知蛋白打得夠起，入口綿密，輕盈細緻；慢煮蘋果卷以酥皮做卷皮，咬落酥脆香口，而裡面唔止有蘋果，比一般只加提子仲多咗唔少乾果及果仁粒，增強咬口感，但個人就覺得啲蘋果用唔用慢煮都應該分別不大；兩款撻都做得出色，先講青檸撻，撻底夠薄而平均，喺手勢，餡心嘅青檸果蓉醬柔軟而清爽，面層更刨咗唔少青檸菁，散發出青檸嘅獨有酸香味；最後品嚐喺朱古力撻，朱古力味濃郁得緊要，帶微微甘苦，比睇起嚟更軟滑，總結而言，4款甜品都確有一手。
咖啡、檸茶
友人就喜歡凍檸茶，小弟就選擇醇香嘅熱咖啡，喺配甜品嘅最佳拍檔。雖然餐飲只包基本啡茶，但亦可以加$15轉其他特色咖啡。
整晚嘅菜式可以講都無乜太大挑剔，每道菜嘅用料、烹調技巧都甚有水準，亦見大廚花咗唔少心思晌啲細節位。服務方面亦都好到位，換碟、添水呢啲基本嘢就唔在講，因為今晚未算好滿，所以，安排客人分散啲坐，讓大家都更感寧靜，上菜速度恰好，食到中段，更不時詢問客人上菜使唔使慢啲作調整，都喺企晌客人角度睇問題。
個人評分
味道：9/10
環境：8/10
服務：8/10
抵食：8/10
平均每人消費：HK$415
味道：9/10
環境：8/10
服務：8/10
抵食：8/10
平均每人消費：HK$415
餐廳資料：
C.O.W Dining
觀塘觀塘道396號毅力工業中心2樓F室
3565 6814
C.O.W Dining
觀塘觀塘道396號毅力工業中心2樓F室
3565 6814
沒有留言:
發佈留言