天花及牆身嘅波浪形曲板亦好搶眼，餐廳尾裝咗部大電視，不停播放音樂短片，而餐廳內嘅音響幾唔錯。不過我哋是夜主要嚟食飯，早段嘅時間音樂唔太嘈，氣氛亦好輕鬆，唔會嘈到傾唔到偈。留意到盡頭有個小舞台，據講每晚九點後有Live Band Show，好此道嘅朋友就啱晒。
此外，每枱都有盞小枱燈，加上整體環境燈光柔和，富情調，嚟食晚飯喺好唔錯嘅選擇。其實，氣氛咁好，就算同朋友嚟飲嘢、傾吓偈都正吖。
嚟到酒吧，感覺就會自自然然點杯嘢飲先，既然喺賣酒嘅地方，當然啤酒、雞尾酒、紅白餐酒、烈酒……等等一應俱全。而唔多嗜酒嘅我哋目標就放晌啲非酒精類飲品。
Pop Punch $70
友人呢一杯非酒類雞尾酒喺以奇異果、青瓜蓉、青檸汁及梳打水打成，一身青綠，插上青瓜做裝飾，睇到一杯都喺奇異果嘅籽，真材實料。而味道清新，奇異果跟青瓜嘅味道都頗平衡，帶微微青檸酸，晌夏天飲就更寧舍清爽。
Music Tower $70
小弟呢杯嘅賣相就搶晒眼球，以鮮菠蘿條砌成井形，有型有格，而整杯嘢喺以芒果糖漿、菠蘿汁、檸檬汁及雪碧溝成，以菠蘿味為主線，芒果味為副，清甜冰涼。
邊飲邊細閱餐牌，果然，唔喺一般嘅酒吧餐廳，食物嘅種類唔少之餘，睇得出有啲誠意，唔喺啲普普通通嘅菜式。以種類以言，有沙律、湯品、小食、意大利麵、意大利飯、漢堡、薄餅、特色主菜及甜品，而且，所有菜式都不拘一國。
凱撒沙津配黑毛豬火腿 $118
單單凱撒沙津嘅話，賣$88，無理由唔加多少少配黑毛豬火腿架，的確，配上火腿喺唔同晒，而啲火腿刨得薄透，入口油潤甘香，雖然唔知幾多個月嘅熟成，但絕對喺高質素貨色。至於啲凱撒沙津，同樣好食，羅馬生菜脆到嗦嗦聲，醬汁撈得夠均勻。
墨西哥辣牛肉栗米片薄脆配酸忌廉、牛油梨醬及蕃茄莎莎 $108
上一道沙律用嚟作為前菜開開胃，呢一道墨西哥粟米脆片就明顯喺用嚟送吓飲品，邊食邊傾。烤熱嘅脆片，灑上牛肉碎及芝士，滿滿嘅一大碟，並伴有牛油果醬、酸忌廉、蕃茄蓉。面面嘅墨西哥青辣椒堅喺幾辣，不過，幾得意，辣勁點到即止，過一陣就散晒；
而金黃嘅脆片好香脆，黐住黐住啲牛肉碎同芝士，再一次過塗上牛油果醬、酸忌廉、蕃茄蓉，令味道紛陳富層次，牛油果醬搓得幼滑，酸忌廉吊出少少鹹味，蕃茄粒增加鮮活感，真喺好易一塊接一塊食唔停。
魷魚燒南瓜法邊豆粟米黃金意大利飯伴香煎北海遁帶子 $178
主食我哋揀嚟意大利飯，近排非刻意咁遇到好幾款加入鹹蛋黃元素嘅菜式，例如「Sodam Chicken」嘅「黃金鹹蛋炸雞」、「沙嗲軒」嘅「黃金脆魚皮」、「Villa Villa」嘅「黃金炒薯條」，幾道都喺惹味好食嘅菜式，而今次呢一道加入鹹蛋黃做嘅意大利飯又會唔會帶嚟驚喜呢？由於燈光比較昏暗，未能完全反映到佢喺一片金黃，不過，3大粒北海道帶子十分有睇頭。
意大利飯一向好蝦人煮，因為火喉唔準，啲米一喺太生，一喺太腍，今次個意大利飯就做得有水準，咬口而有煙韌感，但就唔會有種生嘅感覺；而且，飯底濕潤，沾滿鹹香嘅醬汁，而且，內裡混有魷魚粒、燒南瓜粒、法邊豆、粟米粒，口感豐富。
用上北海道帶子，基本上都無乜會點輸，簡單香煎，已經食出質素，彈牙、清甜就已經好足夠。咪睇個飯好似好少，碟底深，加上其他菜式嘅份量都多，食埋個飯都有9乘飽。
焗蘋果卷伴冧酒提子雪糕 $68
最後，以一道甜點作結，點咗個焗蘋果卷共享。睇個賣相，只賣$68，真喺抵喎，點解？蘋果卷以酥皮做殼，入口超酥脆，有牛油香，裡面嘅蘋果肉煮得軟腍清甜，有微微玉桂香；冧酒提子雪糕無問到喺咩品牌，但懷疑喺自家製，因為冧酒味比一般遇到嘅強，而雪糕內又有超多提子，非常好食。
雖然Ember明顯喺一間酒吧，但食物絕對做得出色唔馬虎，用料無欺場，烹調手法有一手，服務亦都非常熨貼，而且，氣氛輕鬆，就算唔好酒，三五知己嚟食餐晚飯，都喺一件樂事。
個人評分
味道：8/10
環境：8/10
服務：8/10
抵食：8/10
平均每人消費：HK$305（信用卡9折優惠）
味道：8/10
環境：8/10
服務：8/10
抵食：8/10
平均每人消費：HK$305（信用卡9折優惠）
餐廳資料：
Ember
銅鑼灣告士打道229-230號宇宙商業大廈地舖
2171 4268
Ember
銅鑼灣告士打道229-230號宇宙商業大廈地舖
2171 4268
沒有留言:
發佈留言