J&A Cake Shop：好友狂嚐曲（79）

自從好友轉到去新蒲崗工作，不時所送嘅小手信都喺嚟自該區，睇番吓，新蒲崗區嘅食評都喺多得佢。今次，趁住一班好友相聚，佢所送嘅曲奇（再搭件蛋糕）又喺出自該區嘅小店「J&A Cake Shop」，睇個膠袋，就知喺街坊餅店嚟。

綠茶曲奇 $15

包裝以簡單嘅軟膠盒蓋住，因為唔喺好受得力，拎到返屋企都有啲壓爛咗。其實，啲曲奇嘅唧花做得幾靚，唧成貝殼形，線紋清晰，只喺綠茶味唔算好濃，而較大問題喺曲奇嘅質感太鬆散，拎起手大力少少都整爛，入口唔喺脆身，又唔喺軟腍，唔太似食曲奇，反而似咬落一堆粉嘅感覺。

斑蘭三角蛋糕 $6.5

個蛋糕嘅色澤碧綠得好緊要，而且，拎上手都幾墜，不過，食落真喺無乜斑蘭嘅香味可言，但若果唔理個味道，件蛋糕本身喺做得非常鬆軟，好有回彈力，只喺跟「斑蘭」一詞有落差。

因為喺朋友送贈，自不然唔知道小店嘅環境及服務喺點，但單價就由老友提供，當俾大家有個參考。雖然，今回嘅曲奇及蛋糕好一般，但喺，好友嘅心意完全接收晒，多得啲老友不時送啲曲奇俾小弟，先可以將呢個系列嘅食評得以延續。

個人評分
味道：5 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
J&A Cake Shop
新蒲崗彩虹道18號地舖
2341 9228