Bigger Burger Café：取長堡短

上次同姨甥仔食飯，講開食漢堡包，佢對麥記嘅漢堡喺不屑一顧，其實，我又OK喎，尤其MacCafe啲嘢，我覺得幾好架。咁問佢有咩食漢堡嘅好推介，隨口介紹咗佐敦嘅「Bigger Burger Cafe」，反正我都未食過，一於約埋一齊去試。

餐廳確喺幾受歡迎，只喺近7:00pm，未算最黃金嘅晚市時段，已經見有唔少客。環境唔錯，兩邊牆上都有別緻嘅裝飾，小弟就鍾意畫咁美食插畫嘅一邊。不過，唔知喺咪自動門壞咗，加埋風閘又壞埋，無形中任由冷氣外流，再者，室內嘅冷氣本身都唔強，我哋又坐近門口位，真喺食到有啲滴汗。

姨甥仔一早已心裡有數想食乜，小弟初嚟報到，就要掃一掃吓個餐牌。首兩版喺一系列漢堡及薯條類，漢堡一共有成15款，定價$78-$198，而有一款限定供應嘅經典四層牛肉漢堡（B0），賣$388，絕對唔喺一個人搞得掂嘅漢堡。

再繼續睇睇，下兩版就有啲小食、甜品、沙律、全日早餐、意大利麵及意大利飯嘅選項，選擇唔叫多，但就樣樣有啲。

順便就講講個晚餐，夾埋共10款，咩種類菜式都有，漢堡、意大利麵、墨西哥卷、飯品及牛扒都有，由$78-$98，相對喺划算嘅選項。不過，話就話晚餐，飲品喺要俾錢加配，另外收加一服務費。

最後，介紹埋飲品餐牌，冷熱飲品、梳打類（可以加酒精），一紙睇晒。此外，仲有啤酒、餐酒供應。

本餐具、調味已放晌枱面，自由取用。

藍色海洋菠蘿梳打 +$38、雪碧 $18

簡單嚟講，就喺杯菠蘿梳打，再加入藍色嘅糖水，令賣相更清爽。味道就一般般啦，但難得菠蘿唔喺罐頭貨。

牛油果墨西哥雞卷配薯條 $68

因為喺晚餐中嘅選項，無咩圖片做參考，但成品跟預期嘅有頗大落差，主要喺諗住牛油果會一片片或一粒粒咁夾晌雞卷內，點知佢做成個醬放晌側邊，要點住嚟食，等於漢堡包嘅醬汁另上咁，當然點嚟食比起原件無咁有口感啦，此外，雞卷亦比常見嘅細條兼餡料少，但味道就唔錯嘅，雞肉亦無話「嚡烚烚」。

藍芝士煙肉牛肉漢堡 $108

純睇外觀，喺幾吸引，不過，唔知點解個包有種頭重腳輕嘅感覺，個漢堡我就無試喇，都喺聽姨甥仔意見。個藍芝士醬汁夠澎湃，而且，味道濃郁，漢堡牛亦搓得厚身，煙肉亦睇得出喺靚貨，唔喺得啲肥膏嘅貨式，夾埋生菜、鮮蕃茄，整體味道不俗。

順便講吓服務，予人感覺就一般般，尤其上菜一環，嚟咗兩杯飲品後，差唔多等咗半個鐘先上第一客墨西哥卷，再多等十零分鐘先嚟埋個漢堡，雖然唔喺做緊快餐式漢堡，但都未免過耐。同埋，室內嘅冷氣真喺要處理吓，始終近排香港嘅天氣又濕又熱。正所謂「取長補短」，望能越做越好啦！

個人評分
味道：7/10
環境：7/10
服務：5/10
抵食：6/10
平均每人消費：HK$130

餐廳資料：
Bigger Burger Café
佐敦白加士街42-50號金寶樓地下6號舖
2873 6668