怡園粥麵小廚 Happy Garden：我的星期六美孚早餐 ~ 粥君好運

晌美孚區，想食粥嘅話，最近小弟住嘅屋苑就喺晌恆柏道內街嘅「味味佳粥麵店」（跟同區嘅味味佳茶記喺兩間鋪嚟），不過，4、5年前執咗笠，之後，就多數去萬事達廣場對面間「海皇粥店」。而再遠啲美孚廣場嗰邊有家「彬記粥麵小廚」，但兩三年前轉咗名，叫「怡園粥麵小廚」，嫌遠甚少過嚟幫襯。其實，實際路程就唔多遠，只喺懶行貪方便去「海皇」多啲啫。作為美孚街坊，點都要走過去試一次嘅，所以，今早趁星期六例出街食早餐，就嚟「怡園」食番餐，跟住行吓公園。

小店格局，雖然地方唔大，但都算乾淨企理，加上星期六一大朝早，又仲喺暑期，無乜返工、返學客，環境就更清靜。我哋揀咗靠埋牆嘅二人卡位，輕鬆自在。

早餐有兩類套餐，一款叫「早晨粥餐」，顧名思義啦，就喺食粥，4款粥供選擇，再配蝦米腸、炸兩、齋腸、油條或炒麵1客，定價$32，且可加錢配飲品。

另一款叫「醒晨早餐」，選擇類別多少少，有3款盅頭飯、鹹肉糉、4款腸粉供選擇，配熱飲，都一樣喺賣$32。最後，我哋兩個都揀粥餐。

炒麵

都幾大碟吓，比預期多，炒出嚟嘅質素不過不失咁啦，唔喺話好食，亦無話難食，只喺無乜豉油香，幸而炒出嚟唔算好油。

炸兩

腸粉喺新鮮拉，腸粉皮拉得夠薄，而油炸鬼大條又脆口，無話好油嘅感覺，配上甜醬、麻醬，好食。甜醬、麻醬要另外同店員講，佢先會幫你加落去。

魚片艇仔粥

老婆揀咗魚片艇仔粥，佢哋啲粥就算喺早餐都做成生滾粥，所以，粥底都特別綿，米花爆開晒，頗有米香。不過，料就肯定唔及海皇多，呢碗粥大多數都喺啲豬皮，少少魷魚鬚，而魚片大概4、5片左右。

皮蛋瘦肉粥

小弟想下下火，就揀皮蛋瘦肉粥，粥底同樣綿香，而皮蛋跟瘦肉嘅份量就有番咁上下，唔會一兩羹就無晒。本身佢哋啲粥都嚟細碗，加埋啲炸兩或炒麵，一人份嘅粥餐都唔嘢少。

無睇過食評就嚟食，反正口味嘅嘢，人人唔同，食過之後又唔喺好似其他啲食評講到咁差。喺轉咗手？喺改善咗？喺我要求低？定喺我好彩呢？總之，祝君好運，食到餐好嘅。

個人評分
味道：8/10
環境：7/10
服務：7/10
抵食：8/10
平均每人消費：HK$32

餐廳資料：
怡園粥麵小廚 Happy Garden
美孚美孚新邨第四期百老匯街96號地下B舖
2785 4546