奧海城都算嚟得多，所以，就算「Cocina 3」位處三期嗰邊，都好易搵到。餐廳裝修摩登、型格，門面有種酒窖嘅感覺，內裡樓底高，空間大，一室紅皮椅，甚有西班牙風格，播放住輕音樂，讓氣氛輕鬆。餐廳尾喺酒吧區，以高腳枱櫈為主，啱晒嚟輕酌；推門出外，仲有啲露天位，方便帶寵物嘅客人。
本來今次再訪就唔打算影餐牌，但發覺原來加入咗好多菜式，如意粉、甜點，所以，就再影多次餐牌俾大家參考，包括：湯品、沙律、西班牙小食、薄餅、石燒牛扒及海鮮、主菜、火腿片、意粉、拼盤及甜品，餐牌印刷精美，部份菜式更附有圖片作參考。佢啲西班牙小食選擇十分之多，所以，都以食西班牙小食為主，上次就試過「西班牙炒辣肉腸」、「西班牙香燒乳豬仔」及「馬德里燴藍蟹肉配香脆多士」，今次都以西班牙小食及一啲新菜式為主。
依家餐廳更特設牛扒菜單，美國西冷、肉眼就唔在講，仲有西班牙黑豚、阿根廷牛，甚至近年新興兼大熱嘅斧頭扒都有得供應，牛扒迷之福咯。
飲品方面，佢哋都有超多選擇，雞尾酒嘅款式多不勝數，而啤酒、烈酒、西班牙果酒當然唔少得，唔飲得酒嘅朋友都唔使擔心，非酒精類雞尾酒、果汁、汽水一樣有供應。部份更有分非歡樂時光（N.H.）及歡樂時光（H.H.）價錢，以9:00pm作界線。
墨西哥脆片 $40
不過，有一樣嘢明顯轉變咗，上次嚟喺無嘅，依家就惠顧晚市，每枱附上墨西哥脆片，兩人一份，如此類推，等同上中菜館嘅酸菜小食收費。抵唔抵就見仁見智，在乎你鍾唔鍾意食，因為呢份芝士味墨西哥脆片喺可以無張添加，而且，食落脆口，又唔會好似啲薯片得個鹹字，更伴以自家製嘅酸忌廉醬。
Strongbow Gold Apple、Strongbow Elderflower $46（歡樂時光價）
友人跟我同樣喺唔多飲酒嘅人，不過，我都推介佢試吓呢一款輕度酒精嘅Apple Cider，上次我嚟都喺飲佢，嗌兩支三個人共享都無問題。兩者色澤都喺金黃剔透，而貪佢入口夠清爽、酒精度又低，前者則有點青蘋果嘅果香嘅果香味，後者就有點花香及青檸味。
古秘魯海鮮沙律 $108
沙律有4款，以呢一道新菜式最有吸引力，曾晌中環嘅「Picada」食過一道類似嘅菜式「Peruvian Ceviche」，喺以是日魚鮮混合秘魯蔬菜做嘅秘魯菜。而呢一道「古秘魯海鮮沙律」就以大蝦、八爪魚、海鯛伴以沙律菜及車厘茄，再淋上大量橄欖油及灑上香草而成，用料無欺場，大蝦好爽彈、八爪魚柔韌好食、海鯛軟滑有油香。如果嫌未夠酸香，侍應放低支葡萄醋，可以自行添加再作調味。整體上，個人就建議橄欖油可以落少啲，唔使浸晒底，而海鯛切粒食起嚟一口一粒感覺更好。
西班牙正宗奄列 $68
呢幾年由於西班牙菜大熱，連帶小弟都食多咗，故西班牙奄列都試過唔少，但「Cocina 3」所做嘅奄列就可謂別樹一格，與慣常所見嘅蛋餅形完全唔同，而喺煎得比較實淨啲，再切成一件件咁。味道又唔錯喎，內裡混有薯仔粒、洋蔥、西班牙辣肉腸，惹味而富口感，唯一就喺試唔到雞蛋嘅嫩滑及流出蛋漿嘅滋味。
墨西哥雞肉卷 $82
有啲意外喺竟然將墨西哥卷當為一種西班牙小食，而小弟對西班牙小食嘅認識，喺西班牙人正餐前同朋友飲吓酒，食吓嘅小食，細細份，細細口咁，但呢道墨西哥雞肉卷就大大份，仲伴埋炸薯角，睇見都飽肚呀，哈哈！件雞肉卷超好食，外皮軟軟哋卻又有韌勁，餡料勁多，雞肉、洋蔥、沙律菜、燈籠椒……等等材料，多到瀉出嚟，好有口感，而且，醬汁非常香濃惹味，辣辣哋好醒胃，值得推介嘅新菜式。
西班牙傳統陳醋燴豬仔脾 $128
喺店家推介嘅菜式，曾經晌其他店食過呢款菜式，所以，特別推介俾老友。雖然，煮出嚟個樣「黑古勒突」，但嗰份陳醋滲出嚟嘅酸甜味實在好正，越食越開胃嘅感覺，配以燴得鬆化嘅豬仔脾，質感軟腍，簡直一流。一客有3支豬仔脾，啱啱好。此外，好鍾意佢哋晌好多菜式都加入大量野菜或沙律菜，呢一道都無例外，等我哋食得肉多都可以搵啲蔬菜嚟平衡吓。
雖然只喺1客沙律、3份西班牙小食，但因為份量大，而奄列及墨西哥卷又算得喺飽肚嘢，加埋無限量添加嘅墨西哥脆片，所以，一樣好夠食。再者，環境及氣氛好，招呼貼心，食物有水準，再翻兜喺明智嘅決定。
個人評分
味道：9/10
環境：8/10
服務：8/10
抵食：8/10
平均每人消費：HK$190
味道：9/10
環境：8/10
服務：8/10
抵食：8/10
平均每人消費：HK$190
餐廳資料：
Cocina 3 Tapas Restaurant & Bar
大角咀海泓道1號奧海城三期地下G22號舖
2362 2313
Cocina 3 Tapas Restaurant & Bar
大角咀海泓道1號奧海城三期地下G22號舖
2362 2313
沒有留言:
發佈留言