Le Jus：飲得出「昔」

健康喺人都想架啦，要健健康康話難唔難，話易亦唔叫得易，講就喺人都識講，但好多時運動又懶做，飲食又唔節制。前者就真喺幫你唔到，你唔願郁就真喺好難搞，但後者總有啲方法，今次分享嘅喺晌公司附近間健康飲品店「Le Jus」。

開得喺中環遮打大廈就知道目標客群喺附近一帶嘅上班族，尤其喺講求健美嘅女生，店舖裝修簡潔明亮，乾淨衛生，睇見都覺得讓人精神爽利。收銀櫃枱後，大櫃中堆滿新鮮生果，當然，仲有其他生果、蔬菜擺晒晌製作枱下嘅凍櫃啦。

從餐牌所見選擇非常之多，大類而言可以分為Wellness、Lean & Green、Super Avocado、Fitness、Classics、Mocktails同Hot Drink，絕大部分都喺賣$42一杯，跟飲杯靚咖啡差唔多價錢，加上100%全天然，無添加，以新鮮即榨，叫做買返啲健康返嚟。而且，每杯除列埋所含嘅卡路里之外，更有埋咩功效，如護目、抗氧化……等等。

價目表所標示嘅價錢喺以380ml杯裝計算，其實仲可以升級加量，只要加多$10就可以去到480ml杯裝，又或者加$13轉為480ml樽裝，後者比較便攜，又可以易於重用。

除咗以上價目表嘅散點之外，店家仲提供咗一套三日嘅「果昔之旅」，一連三日，早午晚，提供共9樽果昔。據店員介紹，跟上面散點嘅款式喺有啲唔同，屬特別製作，能減輕消化系統負擔，讓身體休養生息，可以講喺一個健康、營養飲食療程。

但如果想飲得抵啲，仲有計，就係揀「是日果昔」，同樣由多種新鮮蔬菜、生果打成，仲喺樽仔份量，只賣$42，所以，比起正常樽仔價平咗$13。另外，旁邊仲擺咗啲能量棒兼售。

最後，揀咗兩款唔同類型嘅，一黃一紅，色澤艷麗，睇起嚟份外吸引。店員特別叮囑，因為全部成品都以新鮮材料製作，所以，最好盡快飲用，否則，亦盡快放入雪櫃保鮮。

A2. Beauty Berries $52
同事就揀咗呢一款以雜莓、紅棗、蘋果、枸杞子混合而成嘅飲品，皆因有明目之效。從外觀睇落已感覺到喺好足料，而且，斟到滿滿無欺場。小弟都倒咗啲試試，果然果香味十足，莓香自然而清新，甜度柔和，唔會太冰，清涼消暑，飲落真喺好舒服。

Y2. Road Runner $55

小弟曾經飲過一款果酪，即喺生果加乳酪打成，所以，見到呢一款以希臘乳酪再混入芒果、香蕉、熱情果、脫脂奶打成嘅健美飲品，特別感興趣。同樣份量好足，入口味道複雜，清甜中，又滲出陣陣酸香味，口感近乎奶昔一類，卻很清爽，而且，飲完感覺仲幾飽肚吓。

晌等候期間，見到收銀櫃枱前展示咗啲禮券，有唔同款式、唔同面額，可謂送禮、自用都得，一班同事夾份大量買，仲有少少優惠添。 

由於都喺新鮮蔬果製作，全部都喺健康嘢，所以，完全喺零負擔，多飲都無妨。

個人評分
味道：9/10
環境：7/10
服務：8/10
抵食：8/10
平均每人消費：HK$50

餐廳資料：
Le Jus
地址：中環干諾道中8號遮打大廈1樓114號舖
電話：6257 0027