Andy's烘焙坊：「焙」佢一試

前文提要，話說同老婆嚟到鰂魚涌參加友人嘅結業禮，晌附近打個轉之餘，仲食咗碗傳統中式糖水先走。而離開時，逛逛東大街，見到呢一家糕店「Andy's 烘焙坊」有款季節限定「日本柚子」口味，老婆就最啱，所以，買一盒返去同屋企人共享。

初時第一眼嘅印象以為佢哋喺賣台式古早蛋糕，因為櫥窗內擺咗好多款長型嘅蛋糕，但再細心望望櫥窗之上，正寫著「北海道牛乳蛋糕」。個人感覺，台式古早蛋糕嘅熱潮已經過晒，依家啲人都只喺當一般嘅烘焙蛋糕店咁睇。唔知喺咪咁，所以你見仲有賣埋北海道牛乳卷蛋、日式芝士蛋糕。

加埋另一邊櫥窗有個所出爐時間表，更令我覺得佢最初喺賣台式古早蛋糕，可是始終熱潮減退，買嘅人無以往咁多，所以，出爐時間都唔再寫出嚟，因為去貨慢咗，只好睇吓邊款無先嚟製作。

從價目表所見，依家提供9款蛋糕，定價$55至$100。不過有一點仍讓小弟比較在意，價錢牌上明顯刻意寫住「北海道牛乳蛋糕」，當時未有察覺，所以無深究過去問問，喺咪所有蛋糕都用上北海道牛乳整，暫不得而知。

有一點值得一讚就喺內部環境，即喺櫥窗之內，好乾淨企理，就算依家大熱天時，都唔會見到有 半隻蚊滋、烏蠅之類飛飛吓。

日本柚子蛋糕 $75
反正都喺要切一件件，所以，事先已經叫店家幫忙切埋。初時以為個蛋糕中間會有啲柚子果蓉或果醬之旅造成夾心，明顯跟預期有啲落差，只喺成個蛋糕裡面加入柚子味嘅元素，食落柚子味確喺幾清香，咬到微粒嘅柚子青；蛋糕嘅質感未如古早蛋糕般濕潤，又唔似海綿蛋糕般輕盈，介乎兩者之間似的，但頗有蛋香，只不過喺亮點未叫好突出，簡單嚟講，似喺一個純柚子味嘅蛋糕而已。

今次都喺經過合眼緣幫襯下，所以，本身一早就唔會再有幫襯嘅打算，加上質素方面，更無太多理由專登過嚟再試其他款式喇。

個人評分
味道：6/10
環境：8/10
服務：8/10
抵食：7/10
平均每人消費：HK$20

餐廳資料：
Andy's烘焙坊
地址：筲箕灣筲箕灣東大街59-99號東威大廈地下6A-2號舖
電話：2845 3781