龍城冰室 Dragon City Cafe：再下一「城」

幾個月前到訪過旺角嘅「龍城冰室」，試過其「海鮮湯龍躉泡飯」，真喺好得，所以，對呢間茶記幾好印象。今晚出到嚟尖沙咀參加聚會，會前梗喺要搵一搵食，同個老友就晌聚會點附近亦有家「龍城冰室」，二話不說入咗去，夠穩陣嘛！

「龍城」都開咗好多家分店，算喺開始連鎖式，所以，環境格局差唔多，但就比好多茶記、冰室地方大，環境光猛，最好喺就算處於尖沙咀呢種旺區，都唔會擠到啲枱櫈好逼。

老套啲都要補充兩句，基本調味、餐具放晒晌枱側嘅抽櫃中。

食物選擇方面就喺一貫茶記嘅多元化，要乜有乜，乜餐物餐，碟頭粉麵飯……等等都一應俱全，自行慢慢睇個餐牌有咩啱食。而上次試咗泡飯，今次就試其他，睇睇其他嘢得唔得。

二維碼落單，慢慢揀，慢慢撳，個落單系統亦設計得唔錯，易用，選項多，例如：少冰、走甜……等等都揀到。

海鮮湯龍躉泡飯 $72

老友問我有咩推介，我就建議試佢哋嘅泡飯，所以，老友試番我上次食嘅「龍躉泡飯」。就算唔同分店，水準都保持一樣，啲龍躉炒過，既香口，又嫩滑，魚鮮味濃，而個湯底鮮甜，兼飯粒又分明，所以，老友都同我一樣全碗清晒。

蝦醬炒通菜牛肉鮮魷 $78（+$13轉套餐）

本來今次打算試下佢啲焗飯，不過，後尾睇到呢個小炒套餐就好有興趣，因為一款小裏裡邊有菜、有肉、又有海鮮，另外加$13轉埋套餐，就送上明火例湯同基本熱飲。

先講講個例湯，其實有西湯揀，即喺羅宋湯，小弟就想飲中湯，喺南瓜粟米甘筍煲豬骨，都幾濃郁，飲落亦好夠老火嘅感覺。

呢個小炒真喺炒得有一手，首先通菜炒得啱啱好，仍然保持到少少爽脆感，而牛肉好軟腍，又唔會好似啲舊式咁用梳打醃到無味，鮮魷就好鮮甜，口感柔韌，配蝦醬炒惹味到不得了啦。

凍鹹檸七 +$9
一向晌茶記自自然然揀熱奶茶，但今日用晒啲配額，朝早一杯咖啡，晏晝又飲咗杯果茶，所以，晚餐就改飲凍鹹檸七，睇見大大件鹹檸，好足味，入口冰涼清爽，嗰份鹹檸檬味好獨特，襯濃味嘅蝦醬，正呀喂。

再次來到「龍城」，食物保持到一定水準，地方夠大又好坐，招呼方面，都唔會有過多要求架喇，但至少都會主動收走碗碟，侍應亦有禮貌。

個人評分
味道：8/10
環境：7/10
服務：8/10
抵食：8/10
平均每人消費：HK$100

餐廳資料：
龍城冰室 Dragon City Cafe
地址：尖沙咀金馬倫道23-25號地下
電話：2111 1320