二十道 niju：「二」軍突起

朋友小手術在即，所以，今晚相約出嚟唔止聚一聚，更喺術前壯壯聲威，預祝手術順利。所以，今次就唔想食得太普通，走遠少少過到嚟鰂魚涌，一試呢間隱世小店「二十道」，喺住喺東區嘅食友極力推介，同我講包有驚喜，就睇下堅唔堅！

門面細細，又唔起眼，差啲行過龍都唔知道，而踏進餐廳，L型吧枱位，一眼睇晒只有9個位，對住師傅做菜，做起嘅菜式直接交俾客人，更可以同師傅直接互動交流。由於地方細細，不時都會有人包場，所以，嚟之前最好先問問，避免摸門釘。

全店木系裝修，配以柔和燈光，牆上掛滿好多木製食物牌，一派居酒屋風格，讓人甚有晌日本小店嘅感覺。值得留意嘅喺，細心一睇牆身做成一節節不規則嘅竹紋，非常有心思，此外，每種餐具、盛器都好靚、好骨子，值得再多欣賞一下。

友人話店名嘅英文「niju」有「雙重」嘅意思，所以，你見門面都寫住「Ramen x Izakaya」，即拉麵 × 居酒屋，但中文名「二十道」，又有何意呢？背後牆上就有解說，包含「五味」、「五色」、「五法」及「五度」，非常之有意思。

食物方面，先介紹下個主餐牌，有拉麵套餐，有二人套餐，仲有多款散點菜式，更有3款懷石料理套餐，不過，溫馨一提，需1天前預訂，以便預備食材。此外，師傅更話有好多餐牌都無列出嚟嘅秘密料理，所以，今晚就試咗一趟「廚師發辦」式嘅料理，非常有驚喜。

油醋繡球菌 $48
小弟算食過唔少菇菌，「繡球菌」我都喺第一次聽，當然亦喺第一次見，乳白色嘅外貌，帶點光澤，墊上少少火箭菜做襯托，賣相已經幾唔錯。食落口感爽爽地，但又柔韌得嚟有啲彈性，帶微微嘅菌香，菌味屬於溫和，都幾得意。

青橘啫喱帆立貝配赤蝦 $44

呢度前菜賣相簡直喺一件藝術品，睇到嘅層次更加喺心機作，師傅更話喺每日限量出品，可遇不可求，食到喺你有運。底層喺日本帶子刺身，軟腍鮮甜，中層喺橙味啫喱，清甜盎然，面層則配上日本赤蝦刺身，可謂鮮味盡出，所以，一啖放入口，無論味道還是口感，都喺環環相扣，多變而有驚喜。

日本白梅貝 $44

又喺第一次試嘅食材，如果唔喺師傅介紹，真心以為喺加拿大嘅翡翠螺，只差喺色澤偏灰白，唔似翡翠螺有層綠色；而白梅貝多數做為熟食，較少用作刺身，咬落去肉質爽彈卻有咬口，味道清甜而沒會有苦澀味。

茄子天婦羅 $48
食咗幾款所謂生冷嘢，跟住來一道熱焫焫新鮮炸起嘅茄子天婦羅，通常做天婦羅嘅茄子都喺切片多，但今次啲茄子就角切，尺寸切到一口一粒，好方便食。炸出嚟嘅效果，粉漿好薄，入口不油，茄子好軟身，灑上少少七味粉就更加好食。

竹炭法包配無花果醬 $48

烘暖咗嘅竹炭法包，入口外脆內暖，亮點更喺塗上一層清香嘅無花果醬，其實味道已經好唔錯，再放咗少少 日本甜辣椒，微微辣，有種畫龍點睛之效，味道有咗化學變化，確喺幾得意。

熟成刺身丼 $98
最後，梗喺食番個海鮮丼墊墊肚，師傅介紹喺話個海鮮丼選用咗多款時令刺身，計有鯛魚、帶子、蟹籽海老、油甘……等等，再加埋玉子、蘿蔔漬，就連芥末都喺由新鮮山葵研磨製作，令到賣相色彩繽紛，非常靚仔，而且份量非常十足，絕無欺場。果然好好食，丼飯當然用上日本米，更加咗赤醋，令其更具風味。

由於師傅直接睇到食客嘅進食狀況，所以，佢會因應食客進食速度而調節上菜節奏，等客人食得更自在，慢慢咁一道菜接一道菜細嚐！

個人評分
味道：9/10
環境：8/10
服務：8/10
抵食：8/10
平均每人消費：HK$230

餐廳資料：
二十道 niju
地址：北角七姊妹道193號遠東大廈地下A號舖
電話：6398 1698