翠河餐廳 Green River Restaurant：興「翠」大減

一年一度先人嘅死忌日，所以，嚟到鑽石山墳場掃墓，之後就同屋企人一齊食晏。由於天氣好悶熱，所以，費事行咁遠，近近哋過嚟「慈雲山中心」搵食就算，原本打算飲茶，但仲要等好多張枱先有位，結果，好隨心搵咗樓上嘅「翠河」，話晒茶記都應該穩穩陣陣。

呢間鋪都幾大吓，環境乾淨企理，光猛闊落，嚟嘅大多數都喺附近街坊。除咗卡位，仲多張圓枱，我哋揀咗圓枱，方便傾吓偈。

除咗主餐牌之外，仲有個「精選餐牌」，日日提供6款碟頭嘢，包基本餐飲；其實對比過散點價，唔喺平好多，散點嘅話，唔包餐飲，但就送例湯。

上海炒粗麵 $52

個炒粗賣相甚有滬菜嘅濃油赤醬風格，確實炒得算唔錯，每炷麵條都上晒色，細佬亦話炒得香口又好惹味，無過鹹嘅問題，只喺餸料少咗啲，好似炒淨粗咁。

鮮魚湯鮮茄牛肉泡飯 $52

小弟就選食個湯飯，雖然寫住鮮茄，但配魚湯，唔講單睇樣，仲以為沙嗲牛添，不過，好老實，我就覺得好似喺鮮魚湯加沙嗲牛肉，啲味道都似似哋，而鮮茄好似額外咁加落去。整體OK嘅，個湯都香，至少飯粒分明，最怕啲飯爛仲用嚟整湯飯啫。

熱奶茶

餐飲我就例牌揀奶茶，「翠河」啲奶茶都唔差架，飲落幾香，茶底沖得唔錯，順滑度就未到絲咁滑，但已經算喺唔錯，頗有順口感。

涼瓜菜脯煎蛋飯 $53
6款「是日精選」 老婆都唔啱，所以，佢晌主餐牌揀咗呢個煎蛋飯，飲嘢需另外加錢，但會奉送例湯，都喺青紅蘿蔔煲豬骨一類，有啲油膩，所以，過咗俾細佬飲。

講咗少飯，都仲喺俾到咁大碟，最大鑊就喺個蛋，煎到好燶吓，最衰無影到個底，下面仲燶呀！直頭有少少燶味，所以，飯可以留，蛋就要求侍應幫忙煎過一底，但個侍應就索性全碟換過。以味道嚟講，其實個涼瓜菜脯煎蛋都做得唔差嘅，幾香口，搭上涼瓜同菜脯，味道幾有層次，喺比較油膩咗少少。

仲有細妹叫嘅燒汁雞扒德國腸意粉，因為無咩特別，就唔多寫，但4碟嘢中，佢碟意粉喺等超過20min，完全理解唔到點解要咁耐。另外，成個場得兩個侍應，明顯喺人手不足，廚房裡面就唔知喇，不過，我哋啲嘢出得咁慢，相信裡面人手都唔喺好夠。整體嚟講，今次嘅用餐體驗確喺麻麻，仲要上到喛頂層，少少自討沒趣嘅感覺！

個人評分

味道：7/10
環境：7/10
服務：6/10
抵食：7/10
平均每人消費：HK$54

餐廳資料：
翠河餐廳 Green River Restaurant
地址：慈雲山毓華街23號慈雲山中心6樓615-617號舖
電話：2572 2811