星記海鮮飯店 Sing Kee Seafood Restaurant：滋味提「星」

上年年尾嚟過一次「星記海鮮飯店」食飯，啲午市套餐都唔算貴，亦都夠質素，環境舒服，話晒都有「米芝蓮」加持，稍稍被睇高一線 。而今日約咗個好弟兄聚一聚，就再次嚟到「星記」食餐晏晝。

踏出電梯門就喺餐廳，上個食評都介紹過個環境，所以，今次就唔講太多，基本上嚟講，裝修雅致，枱與枱距離無話好逼，無太大侷促嘅感覺，座上客都喺較斯文嘅上班族，嘈極有個譜。

既然嚟食午餐，目標都喺佢哋嘅「午市精美小菜」套餐，包老火湯及甜品，定價都喺$96，另收茗茶$15位及加一服務費。兩個好兄弟，喺小組拍檔，自然同撈同煲，就叫兩個都喺煲仔菜應吓景。

老火湯
落好單，先嚟老火湯，每日不同，是日本來喺西洋菜，但改為「節瓜章魚煲豬骨」，其實嚟咩都無所謂，最緊要喺好飲，飲落夠老火。果然保持質素，湯味濃郁，有種好下火嘅感覺。

節瓜鮮魷鬚粉絲煲
上次試過招牌嘅鳳梨生炒骨，今次就唔翻兜，試試另外啲菜式。呢個粉絲煲勝在有好多節瓜，切到條條大細一致，煮出嚟口感啱啱好，鮮魷魚鬚份量不少，而且柔韌有口感，唔會韌到好似擦紙膠咁，加埋有唔少粉絲，整體味度上屬清淡少少，但又唔會太寡。

栗子鮮淮山炆雞煲
比起個粉絲煲，呢個雞煲送到嚟滋滋聲，香氣四溢，老友好識食，佢喺刻意揀呢個煲，睇到師傅功力。首先試的雞件，果然煮得火候啱啱好，雞肉熟透卻非常嫩滑，又有鮮雞味，再試啲鮮淮山 ，仲帶有少少爽脆感，栗子睇起嚟比較細粒，又較深色，但喺就好粉好甜，所以，成個煲每樣嘢都好好食。

甜品

今次嘅糖水就簡單啲，只喺蕃薯糖水，不過啲蕃薯用上「雞蛋黃」，都好靚仔，亦喺好甜，糖水就帶少少薑味，唔太重，仲加咗少少雪耳滋潤吓，所以，作為飯後甜品都幾唔錯。

老友第一次嚟「星記」， 除咗讚啲食物做得有水準之外，呢度啲招呼比起一般酒樓真喺好唔錯 ，以中環區而言，價錢又唔算貴，最緊要可以舒舒服服食餐飯嘛！

個人評分
味道：9/10
環境：8/10
服務：8/10
抵食：8/10
平均每人消費：HK$122

餐廳資料：
星記海鮮飯店 Sing Kee Seafood Restaurant
地址：中環擺花街1-7號1號廣場2樓
電話：2970 0988