Bingo & Cook：仲夏美食協奏「Cook」

仲記得第一次幫襯「Bingo & Cook」（銅鑼灣店）覺得好抵食，又好有氣氛，睇番記錄，已經喺4年前嘅事，今次就到訪嘅喺尖沙咀店。位置有少少隱蔽，不過，小弟不時都過嚟尖沙咀食飯，對啲橫街窄巷都有留意，所以，對我嚟講就唔難搵，但朋友就兜咗個圈先搵到。

走到店內，裝修富時代感，好有個性嘅地磚，牆上又有不少塗鴉、手繪，加上一室柔和燈光，並會有不斷播放嘅K-pop，令氣氛非常輕鬆。

另外，鋪外仲有啲室外位，已架設晒帳篷，落雨都唔怕。不過呢排天氣咁熱，濕度又高，所以，都無乜客人坐出嚟，反而見到一兩個客坐向出面 純粹飲下啤酒。

餐廳採用二維碼落單，我估應該無正式餐牌喇。小弟就盡量將啲餐牌截圖，可能都有啲遺漏，當喺俾大家參考，知道有咩食物選擇，以及定價，其實，菜式選擇非常之多。

韓式前菜
甫坐低，就隨即先送上4款韓式前菜：泡菜、茄子、翠玉瓜及大豆芽，講真，都好少見啲韓國餐廳嘅前菜做得差，呢度亦唔例如，幾樣都好好食，尤其啲泡菜，夠辣勁，但點到即止，又帶點酸香。最正喺所有前菜都可以添食，侍應都會主動問你添唔添，啲招味非常好。

柚子茶 $32、茉莉花茶 $28
飲品方面，好酒嘅有好多韓國燒酒選擇，不過，同朋友都唔嗜酒，反而飲茶唔我哋喲，一來可以解吓辣，二來清清淡淡可以去去油膩感。

Bingo特製紫菜包飯 $80

包飯卷一睇就知捲住好多料，而且，都幾大條，大概有青瓜、甘筍絲、醃蘿蔔、蛋絲、芝士、牛蒡絲、牛肉……等等，再撒上好多白芝麻，所以，唔好食都幾難，口感豐富，味道富層次，可以講喺招牌包飯卷。

蒜香醬油炸雞+香腸年糕串 $140
一大籃炸雞，就算只喺半份都好夠份量，仲加上一大串炸香腸年糕串，炸嘅我都喺第一次食，感覺又幾唔錯喎，啲年糕外層焦脆，裡面就好軟糯；至於啲炸雞，件件都炸到金黃，但入口唔油膩，咬脆到咯咯聲，肉質卻意外咁嫩滑，醬油帶點甜味，並放滿炸蒜片，好有蒜香。此外，奉送咗碟酸椰菜，跟啲炸嘢間住食就最好不過。

50cm 韓式海鮮鍋 $380

嚟之前睇過啲人嘅食評，就已經好想試呢個海鮮鍋。50cm長嘅不銹鋼鍋，放晌一個雙體石油氣爐，夠晒霸氣，而鍋內放滿好多海鮮食材，包括扇貝、魷魚、虎蝦、沙白、青口、肉蟹及鮑魚，此外，湯內仲有唔少大豆芽、鮮菌片，非常豐富，而且，各款海鮮都鮮味十足，絕對喺交足貨有餘，的確喺好抵食。

怕你唔飽，仲附送一份手打麵條，放晌個泡菜湯度煮一煮， 麵條好有韌性，加上索滿湯，零舍滋味，仲有，依家先嚟飲一口湯，比最初嗰口就更鮮甜，，皆因吸收晒所有海鮮精華，雖然喺有啲辣勁，但算喺溫和。

呢度嘅侍應都喺啲西方人同韓國人，但都好有禮貌，招呼熨貼，好似會幫我哋剪魷魚，幫隔離枱剪豬腩肉，不時會過嚟望望有啲咩嘢要幫手，所以喺度用餐，整體感覺喺幾唔錯！

個人評分
味道：9/10
環境：8/10
服務：8/10
抵食：8/10
平均每人消費：HK$250

餐廳資料：
Bingo & Cook

地址：尖沙咀麼地道37-41號港匯廣場地下17-20 & 31-34號舖
電話：2363 1100